US Air strike Syria: અમેરિકાએ સીરિયામાં ISIS વિરુદ્ધ મોટી લશ્કરી કાર્યવાહી શરૂ કરી છે.CENTCOM એ ઓપરેશન હોકઆઈ સ્ટ્રાઈક હેઠળ 35 થી વધુ આતંકવાદી સ્થળો પર 90 થી વધુ હવાઈ હુમલા કર્યા છે.
યુએસ સેન્ટ્રલ કમાન્ડ (સેન્ટકોમ) એ ઓપરેશન હોકઆઈ સ્ટ્રાઈકના ભાગ રૂપે સીરિયામાં અનેક ઇસ્લામિક સ્ટેટ (ISIS) લક્ષ્યો પર મોટા પાયે હવાઈ હુમલો કર્યો છે, જેનો ઉદ્દેશ્ય આ પ્રદેશમાં કાર્યરત આતંકવાદી નેટવર્કને સંપૂર્ણપણે ખતમ કરવાનો છે.
સોશિયલ મીડિયા પ્લેટફોર્મ X પર માહિતી શેર કરતા, CENTCOM એ જણાવ્યું હતું કે આ હુમલાઓ યુએસ સમય મુજબ બપોરે લગભગ 12:30 વાગ્યે કરવામાં આવ્યા હતા. આ હુમલાઓ સીરિયાના વિવિધ વિસ્તારોમાં ISIS ના સ્થળોને નિશાન બનાવ્યા હતા.સેન્ટકોમના મતે, આ કાર્યવાહી અમેરિકાની આતંકવાદ સામે લડવાની સતત પ્રતિબદ્ધતાનો એક ભાગ છે.
આ કાર્યવાહીનો હેતુ યુએસ સૈનિકો અને સાથી દળો પર આતંકવાદી હુમલાઓને રોકવા, ભવિષ્યના જોખમોને દૂર કરવાનો અને પ્રદેશમાં સુરક્ષા સુનિશ્ચિત કરવાનો છે.સેન્ટકોમે સ્પષ્ટપણે કહ્યું, “જે કોઈ પણ આપણા સૈનિકોને નુકસાન પહોંચાડવાનો પ્રયાસ કરશે, તેઓ ગમે ત્યાં હોય, તેમને શોધી કાઢવામાં આવશે અને ખતમ કરવામાં આવશે.”
ઉલ્લેખનીય છે કે ઓપરેશન હોકઆઈ સ્ટ્રાઈક ૧૯ ડિસેમ્બર, ૨૦૨૫ ના રોજથી યુએસ પ્રમુખ ડોનાલ્ડ ટ્રમ્પના આદેશ બાદ શરૂ કરાઈ છે.એર સ્ટ્રાઈકનો નિર્ણય તા.૧૩ ડિસેમ્બર, ૨૦૨૫ ના રોજ સીરિયાના પાલમિરામાં ISIS ના હુમલામાં બે યુએસ સૈનિકો અને એક અમેરિકન નાગરિકનું મોત થયા બાદ લેવામાં આવ્યો હતો જેમાં માર્યા ગયેલા અમેરીકન સૈનિકોની ઓળખ આયોવા નેશનલ ગાર્ડના ૨૫ વર્ષીય સાર્જન્ટ એડગર બ્રાયન ટોરેસ ટોવર અને ૨૯ વર્ષીય સાર્જન્ટ વિલિયમ નાથાનીએલ હોવર્ડ તરીકે થઈ હતી.
બંને સૈનિકો આ વર્ષની શરૂઆતમાં મધ્ય પૂર્વમાં તૈનાત યુએસ લશ્કરી ટુકડીનો ભાગ હતા આ સૈનિકોના મોત બાદ અમેરિકા ભડકયું હતું અને આતંકીઓનો ખાત્મો કરવાનું નક્કી કર્યું હતું જે ઓપરેશનના ભાગરૂપે આજદિન સુધી અમેરિકા દ્વારા હુમલા ચાલુ છે.
સીએનએનના અહેવાલ મુજબ, આ લશ્કરી કાર્યવાહી દરમિયાન 90 થી વધુ ચોકસાઇવાળા દારૂગોળોનો ઉપયોગ કરવામાં આવ્યો હતો, જેમાં 35 થી વધુ આતંકવાદી ઠેકાણાઓને નિશાન બનાવવામાં આવ્યા હતા.આ હુમલામાં બે ડઝનથી વધુ ફાઇટર જેટ વિમાનોએ ભાગ લીધો હતો.
યુએસ અધિકારીઓનું કહેવું છે કે આ કાર્યવાહી ઓપરેશન ઇનહેરન્ટ રિઝોલ્વની ISIS ને સંપૂર્ણપણે હરાવવાની વ્યૂહરચનાનો એક ભાગ છે. નિષ્ણાતો માને છે કે આ કાર્યવાહીથી સીરિયામાં કાર્યરત આતંકવાદી નેટવર્કને મોટો ફટકો પડ્યો છે અને આગામી દિવસોમાં આવા ઓપરેશનોની સંખ્યા વધી શકે છે.અમેરિકાનું કહેવું છે કે અમારી સામે માથું ઊંચું કરનારાઓના માથા કચડી નાખીશું તેઓએ ISISને ચેતવણી આપી છે.
આ પણ વાંચો:
Police recruitment: ગુજરાત પોલીસમાં ભરતી માટે થઈ જાવ રેડી; PSI-LRDની શારીરિક કસોટીની તારીખો જાહેર!
