Vadodara: પગાર ન ચુકવાતા સયાજી હોસ્પિ.ના સફાઈ કર્મીઓના ધરણાં, ઉચ્ચારી આંદોલનની ચીમકી #separator_saVadodara: પગાર ન ચુકવાતા સયાજી હોસ્પિ.ના સફાઈ કર્મચારીઓના ધરણાં, ઉચ્ચારી આંદોલનની ચીમકી

Vadodara: રાજ્યમાં હાલ સફાઈ કર્મચારીઓની હાલત કફોળી થઈ ગઈ છે. સફાઈ કર્મચારીઓ પાસે કામ કરાવી લેવામાં આવે છે પરંતુ જ્યારે તેમને પગાર આપવાની વાત આવે ત્યારે તંત્ર હાથ અધ્ધર કરી લે છે. ત્યારે આવું જ કંઈક વડોદરાના સફાઈ કર્મચારીઓ સાથે થયું છે. વડોદરાની સયાજી હોસ્પિટલમાં વર્ગ ચારના સફાઈ કર્મચારીઓનો પગાર ન થતા ધરણા પર બેસવાની ફરજ પડી છે. મોટી સંખ્યામાં સફાઈ કર્મચારીઓ આરએમઓ ઓફિસ ખાતે ધરણા પ્રદર્શન કરી રહ્યા છે.

સયાજી હોસ્પિ.ના વર્ગ 4ના 600 જેટલા કર્મચારીઓના ધરણાં

મળતી માહિતી મુજબ વડોદરાની સયાજી હોસ્પિટલમાં રજત એન્ટરપ્રાઇઝ નામની ખાનગી એજન્સી દ્વારા હંગામી ધોરણે વર્ગ ચારના સફાઈ કરણીઓને લેવામાં આવ્યા હતા. જેમાં સયાજી હોસ્પિટલમાં 600 જેટલા કર્મચારીઓ કામ કરી રહ્યા છે. તેઓને પગાર આપવામાં ગલ્લાતલ્લા કરવામાં આવતા તેઓ રોષે ભરાયા હતા અને આજે તેઓ આરએમઓ ઓફિસ ખાતે જઈને ધરણાં પ્રદર્શન કરીને વિરોધ નોંધાવવામાં આવ્યો હતો. જો કે, આરએમઓ દ્વારા બે દિવસમાં પગાર આપવાનું આશ્વાસન આપવામાં આવતા તમામ કર્મચારીઓએ હડતાળ સમેટી પણ લીધી હતી.

સફાઈ કર્મચારીઓનું શું કહેવું છે ?

આ મામલે સફાઈ કર્મચારીઓનું કહેવું છે કે, તેમનો પગાર વારંવાર લેટ થાય છે. જેથી તેમને ના છુટકે કામનો બહિષ્કાર કરી હડતાલ પર ઉતરવું પડ્યું છે આરએમઓ સાથે મધ્યસ્થી થઈ છે. પરંતુ જો બે દિવસમાં પગાર નહીં થાય તો સફાઈ કર્મચારીઓએ ગાંધી ચિંધ્યા માર્ગે આંદોલનની ચીમકી ઉચ્ચારી છે.

સયાજી હોસ્પિટલના આરએમઓએ શું કહ્યું ?

જ્યારે આ મામલે સયાજી હોસ્પિટલના આરએમઓ ડો હિતેન્દ્ર ચૌહાણનું કહેવું છે કે, થોડી વહીવટી પ્રક્રિયામાં વિલંબના કારણે પગાર લેટ થયો છે. તેમણે વર્ગ ચારના કર્મચારીઓને પગાર મળી જાય તેનો પ્રયાસ કરવા જણાવ્યું હતું. આમ વહીવટી પ્રક્રિયામાં ખામીના કારણે આ પગાર લેટ થતો હોય છે તેમ જણાવ્યું હતું. આ સાથે તેમણે એમ પણ જણાવ્યું હતુ કે, આની જવાબદારી એજન્સીની છે અને તેમને સુચના આપી દેવામાં આવે છે અને જરૂર જણાશે તો નોટિસ પણ આપવા જણાવ્યું છે.