Gujarat Rain Update: ગુજરાતમાં ચોમાસાએ રૌદ્ર સ્વરૂપ ધારણ કર્યું છે. શનિવારે (21 જૂન) રાજ્યના અનેક વિસ્તારોમાં ભારે વરસાદે( Heavy Rain) જનજીવનને અસ્તવ્યસ્ત કરી દીધું, ખાસ કરીને ઉત્તર ગુજરાતના સાબરકાંઠા જિલ્લામાં જળબંબાકાર જેવી સ્થિતિ સર્જાઈ. હવામાન વિભાગે 25 જૂન સુધી રાજ્યના કેટલાક જિલ્લાઓમાં ભારે વરસાદની આગાહી જાહેર કરી છે.

સાબરકાંઠામાં મેઘોની ધડબડાટી

હવામાન વિભાગના આંકડા અનુસાર, સાબરકાંઠાના વડાલી તાલુકામાં 24 કલાકમાં 12.2 ઈંચ વરસાદ નોંધાયો, જ્યારે ખેડબ્રહ્મામાં 10.3 ઈંચ વરસાદ પડ્યો. ઈડરમાં 4.9 ઈંચ અને જિલ્લાના અન્ય વિસ્તારોમાં લગભગ 1 ઈંચ વરસાદ નોંધાયો. આ ભારે વરસાદે રસ્તાઓ, ગામડાંઓ અને ખેતરોમાં પાણી ભરાવ્યું, જેના કારણે સ્થાનિક વહીવટીતંત્ર એલર્ટ પર છે.

અરવલ્લી અને બનાસકાંઠામાં પણ પ્રકોપ

અરવલ્લી જિલ્લામાં 4.6 ઈંચ અને બનાસકાંઠાના દાંતામાં 8.9 ઈંચ વરસાદ નોંધાયો. રાજ્યના 159 તાલુકાઓમાં વરસાદ નોંધાયો, જેમાં મોડાસા (4.3 ઈંચ), સતલાસણા (4.6 ઈંચ), ઉમરપાડા (3.3 ઈંચ), અને વિજયનગર (3 ઈંચ) જેવા વિસ્તારોનો સમાવેશ થાય છે.

સૌરાષ્ટ્રમાં 20 ટકા વરસાદ

ચોમાસાની શરૂઆતથી અત્યાર સુધી સૌરાષ્ટ્રમાં 20 ટકા અને પૂર્વ-મધ્ય ગુજરાતમાં 16 ટકા વરસાદ નોંધાયો. દક્ષિણ ગુજરાતના સુરતમાં 3.3 ઈંચ વરસાદ પડ્યો, જેના કારણે શહેરી વિસ્તારોમાં હળવી અસર જોવા મળી.

અમદાવાદ-ગાંધીનગરની સ્થિતિ

રાજ્યના પાટનગર ગાંધીનગરમાં 1.3 ઈંચ, અમદાવાદમાં 1 ઈંચ અને વડોદરામાં 1.1 ઈંચ વરસાદ નોંધાયો. આ વિસ્તારોમાં હાલ સ્થિતિ સામાન્ય છે, પરંતુ નીચાણવાળા વિસ્તારોમાં સાવચેતીની સૂચના આપવામાં આવી છે.

આગાહી: 25 જૂન સુધી ભારે વરસાદ

હવામાન વિભાગે 25 જૂન સુધી ઉત્તર ગુજરાત, સૌરાષ્ટ્ર અને દક્ષિણ ગુજરાતના કેટલાક જિલ્લાઓમાં ભારે વરસાદની ચેતવણી આપી છે. 30 જૂન સુધી રાજ્યમાં મધ્યમ વરસાદની શક્યતા છે. નાગરિકોને સાવચેત રહેવા અને હવામાનની અપડેટ્સ પર નજર રાખવા વિનંતી કરવામાં આવી છે.

24 કલાકમાં નોંધાયેલા વરસાદની માહિતી