Iran Israel Ceasefire Violation: અમેરિકાની મધ્યસ્થીથી ઈઝરાયલ અને ઈરાન વચ્ચે યુદ્ધવિરામ કરાર થયો હોવા છતાં, પરિસ્થિતિ ફરી વણસી રહી હોય તેવું લાગે છે. ઈઝરાયલી સેના પ્રમુખે આજે મંગળવારે( 24 જૂન, 2025) એક નિવેદનમાં કહ્યું કે ઈરાને યુદ્ધવિરામનો ભંગ કર્યો છે. જેને ઈઝરાયલ સહન નહીં કરે. તેમણે સ્પષ્ટ કર્યું કે ઈઝરાયલ ટૂંક સમયમાં આ ઉલ્લંઘનનો જવાબ આપશે.

ઇઝરાયલ ફરી ઈરાન પર હુમલો કરશે

ઇઝરાયલી સંરક્ષણ પ્રધાન ઇઝરાયલ કાત્ઝે મંગળવારે જાહેરાત કરી કે તેમણે સેનાને તેહરાન પર લશ્કરી હુમલો કરવાનો આદેશ આપ્યો છે કારણ કે ઇરાને તાજેતરમાં જાહેર કરાયેલા યુદ્ધવિરામનું ઉલ્લંઘન કરીને ઇઝરાયલ પર મિસાઇલો છોડી છે. આ નિવેદન એવા સમયે આવ્યું છે જ્યારે યુએસ રાષ્ટ્રપતિ ડોનાલ્ડ ટ્રમ્પે થોડા કલાકો પહેલા જ ઈરાન અને ઇઝરાયલ વચ્ચે યુદ્ધવિરામની જાહેરાત કરી હતી. ઇઝરાયલી સંરક્ષણ સંસ્થા આ હુમલાને ગંભીર ઉશ્કેરણી તરીકે જોઈ રહી છે અને હવે તેનો જવાબ આપવાની તૈયારી કરી રહી છે.

ઈરાને કહ્યું – યુદ્ધવિરામ ઉલ્લંઘનનો આરોપ ખોટો

બીજી તરફ ઈરાનની ISNA સ્ટુડન્ટ ન્યૂઝ એજન્સીએ આ આરોપોને ફગાવી દીધા છે. તેમણે કહ્યું કે યુદ્ધવિરામ અમલમાં આવ્યા પછી ઈરાન તરફથી ઈઝરાયલ પર કોઈ મિસાઈલ હુમલો થયો નથી. ઈરાને આ અહેવાલોને “ખોટા અને ભ્રામક” ગણાવ્યા અને તેને ઈઝરાયલની ઉશ્કેરણીજનક રણનીતિ ગણાવી છે. બંને દેશોના વિરોધાભાસી દાવાઓ વચ્ચે હવે મધ્ય પૂર્વમાં તણાવ ફરી એકવાર ચરમસીમાએ પહોંચી ગયો છે.

ઈરાનની સુપ્રીમ નેશનલ સિક્યુરિટી કાઉન્સિલની ચેતવણી

ઈરાનની સુપ્રીમ નેશનલ સિક્યુરિટી કાઉન્સિલ (SNSC) એ ચેતવણી આપી છે કે દેશની સશસ્ત્ર દળો કોઈપણ નવી આક્રમક કાર્યવાહીનો જવાબ આપવા માટે તૈયાર છે. કાઉન્સિલે એવો પણ દાવો કર્યો હતો કે ઈરાને તેના સશસ્ત્ર દળોના અવિશ્વસનીય પ્રયાસોથી ઈઝરાયલને હરાવ્યું છે. આ નિવેદન એવા સમયે આવ્યું છે જ્યારે આ ક્ષેત્રમાં તાજેતરના યુદ્ધવિરામ છતાં તણાવ હજુ પણ ચાલુ છે.