Charlie Kirk News: અમેરિકન રાષ્ટ્રપતિ ડોનાલ્ડ ટ્રમ્પના સૌથી નજીકના સહાયક ચાર્લી કિર્કની ગોળી મારીને હત્યા કરવામાં આવી છે. બુધવારે ઉટાહમાં એક કોલેજ કાર્યક્રમ દરમિયાન તેમને ગોળી મારી દેવામાં આવી હતી. તેમને તાત્કાલિક નજીકની હોસ્પિટલમાં લઈ જવામાં આવ્યા હતા, પરંતુ થોડા સમય પછી તેમનું મૃત્યુ થયું હતું.
ટ્રમ્પ સમર્થકની સરાજાહેર હત્યા
યુએસ રાષ્ટ્રપતિ ડોનાલ્ડ ટ્રમ્પે સોશિયલ મીડિયા પર એક પોસ્ટમાં ચાર્લી કિર્કના મૃત્યુની પુષ્ટિ કરી હતી. આ હત્યાએ સમગ્ર અમેરિકામાં રાજકીય હિંસાના ભય તરફ બધાનું ધ્યાન ખેંચ્યું છે. યુવા રિપબ્લિકન મતદારોને એક કરવામાં ચાર્લી કિર્કે પ્રભાવશાળી ભૂમિકા ભજવી હતી. કિર્ક ઇઝરાયલના કટ્ટર સમર્થક પણ હતા.
ટ્રમ્પ બરાબરના ગુસ્સે ભરાયા
રાષ્ટ્રપતિ ટ્રમ્પે ટ્રુથ સોશિયલ પર લખ્યું, ‘મહાન અને સુપ્રસિદ્ધ ચાર્લી કિર્કનું અવસાન થયું છે. યુનાઇટેડ સ્ટેટ્સના યુવાનોના હૃદયને ચાર્લીથી વધુ સારી રીતે કોઈ સમજી શક્યું ન હોત.’ ઉટાહના ગવર્નર સ્પેન્સર કોક્સે તેને રાજ્ય માટે કાળો દિવસ ગણાવ્યો. તેમણે કહ્યું, ‘આ આપણા દેશ માટે સૌથી દુઃખદ દિવસ છે. હું સ્પષ્ટપણે કહેવા માંગુ છું કે આ એક રાજકીય હત્યા છે.’ 31 વર્ષીય કિર્ક તેમના ‘અમેરિકન કમબેક ટૂર’ના ભાગ રૂપે કેમ્પસમાં ભાષણ આપી રહ્યા હતા ત્યારે ગોળીબાર થયો. અધિકારીઓએ જણાવ્યું કે એક વ્યક્તિને કસ્ટડીમાં લેવામાં આવ્યો છે.
ઘટનાનો વીડિયો આવ્યો સામે
આ ઘટનાનો એક વીડિયો ઝડપથી વાયરલ થઈ રહ્યો છે, જેમાં કિર્કને ગળામાં ગોળી વાગતી જોવા મળી રહી છે. વીડિયોમાં, કિર્ક હાથમાં માઇક્રોફોન પકડીને સફેદ તંબુ નીચે બોલતો જોવા મળે છે. પછી ગોળી ચલાવવામાં આવે છે અને કિર્ક પોતાનો જમણો હાથ ઉપર તરફ ઉંચો કરતો જોવા મળે છે, જ્યારે તેની ગરદનની ડાબી બાજુથી ઘણું લોહી વહી રહ્યું છે. ન્યૂઝ એજન્સી એપીએ પુષ્ટિ આપી છે કે આ વીડિયો ઉટાહ વેલી યુનિવર્સિટી કેમ્પસમાં લેવામાં આવ્યા છે.
સાક્ષીઓએ જણાવ્યું હતું કે ગોળીબાર પછી તે ખૂબ લોહીલુહાણ થઈ રહ્યો હતો. અધિકારીઓના જણાવ્યા મુજબ, ફક્ત એક જ ગોળી ચલાવવામાં આવી હતી. ગોળીબાર પહેલા, કિર્ક પ્રેક્ષકો પાસેથી સામૂહિક ગોળીબાર અને બંદૂક હિંસા વિશે પ્રશ્નો પૂછી રહ્યા હતા. ઉટાહ વેલી યુનિવર્સિટીએ જણાવ્યું હતું કે કેમ્પસ તાત્કાલિક ખાલી કરાવીને બંધ કરી દેવામાં આવ્યું હતું. જે લોકો કેમ્પસમાં હતા તેમને પોલીસ અધિકારીઓ તેમને સુરક્ષિત રીતે બહાર ન લઈ જાય ત્યાં સુધી ત્યાં રહેવાનું કહેવામાં આવ્યું હતું.
ડેમોક્રેટિક નેતાઓએ પણ હિંસાની કડક નિંદા કરી
કિર્કની હત્યાએ અમેરિકન રાજકારણમાં હલચલ મચાવી દીધી છે. ટ્રમ્પની સાથે ડેમોક્રેટિક નેતાઓએ પણ હિંસાની કડક નિંદા કરી છે. આ ઉપરાંત કિર્કના રિપબ્લિકન સાથીઓએ પણ તેની નિંદા કરી છે.
કેલિફોર્નિયાના ડેમોક્રેટિક ગવર્નર ગેવિન ન્યૂસોમે X પર લખ્યું હતું કે, ‘ચાર્લી કિર્ક પર હુમલો ઘૃણાસ્પદ, ઘૃણાસ્પદ અને નિંદનીય છે.’ ન્યૂસોમે ગયા માર્ચમાં કિર્કને તેમના પોડકાસ્ટ પર હોસ્ટ કર્યો હતો. ભૂતપૂર્વ ડેમોક્રેટિક કોંગ્રેસના સભ્ય ગેબ્રિયલ ગિફોર્ડ્સે કહ્યું હતું કે, ‘ચાર્લી કિર્કની હત્યાથી હું ખૂબ જ દુઃખી છું. મારી ઊંડી સંવેદના તેની પત્ની, બે નાના બાળકો અને મિત્રો સાથે છે.’
ચાર્લી કિર્ક કોણ હતા?
31 વર્ષીય ચાર્લી કિર્ક એક પ્રખ્યાત જમણેરી કાર્યકર્તા હતા. કિર્ક ડોનાલ્ડ ટ્રમ્પના મજબૂત સમર્થક હતા. 2024 ની ચૂંટણીમાં તેઓ તેમની ટીમનો ભાગ હતા. તેઓ ડોનાલ્ડ ટ્રમ્પની એટલી નજીક હતા કે અમેરિકન રાષ્ટ્રપતિએ તેમને યુવાનોના હૃદયને સમજનાર વ્યક્તિ કહ્યા. તેનું કારણ એ હતું કે ચાર્લી કિર્કની યુવાનો પર સારી પકડ હતી. કિર્ક ઇઝરાયલના મોટા સમર્થક પણ હતા. આ માટે ઇઝરાયલી વડા પ્રધાન બેન્જામિન નેતન્યાહૂએ તેમને ‘ઇઝરાયલના સિંહ-હૃદય મિત્ર’ તરીકે વર્ણવ્યા હતા. કિર્કના પરિવારમાં તેમની પત્ની એરિકા છે, જે ભૂતપૂર્વ મિસ એરિઝોના યુએસએ સૌંદર્ય સ્પર્ધા વિજેતા છે, અને તેમના બે બાળકો છે.
ઘટના કેવી રીતે બની?
10 સપ્ટેમ્બરના રોજ, કિર્ક ઉટાહ વેલી યુનિવર્સિટીમાં એક ખુલ્લા મંચ પર સામૂહિક ગોળીબાર અંગેના પ્રશ્નોના જવાબ આપી રહ્યા હતા. અચાનક, ગળામાં ગોળી વાગતાં તે ખુરશી પરથી પડી ગયો. પ્રત્યક્ષદર્શીઓના જણાવ્યા અનુસાર, હુમલો બધાની સામે થયો હતો, જેના કારણે અરાજકતા ફેલાઈ ગઈ હતી. ચાર્લી કિર્કને તાત્કાલિક ખાનગી વાહનમાં હોસ્પિટલમાં લઈ જવામાં આવ્યા હતા, પરંતુ ત્યાં તેમનું મૃત્યુ થયું હતું. ઉટાહ ડિપાર્ટમેન્ટ ઓફ પબ્લિક સેફ્ટીના અધિકારી બ્યુ મેસનએ પુષ્ટિ આપી હતી કે ફક્ત એક જ ગોળી ચલાવવામાં આવી હતી અને કિર્ક એકમાત્ર પીડિત હતો. યુનિવર્સિટીને તાત્કાલિક ખાલી કરાવવામાં આવી હતી અને વર્ગો અનિશ્ચિત સમય માટે રદ કરવામાં આવ્યા હતા. ઉટાહના ગવર્નર સ્પેન્સર કોક્સે તેને “હત્યા” ગણાવી હતી અને કહ્યું હતું કે તે અમેરિકન લોકશાહી પર હુમલો છે.
શંકાસ્પદ કોણ છે અને તપાસ શું હતી?
એફબીઆઈના ડિરેક્ટર કાશ પટેલના જણાવ્યા અનુસાર, શંકાસ્પદ વ્યક્તિને કસ્ટડીમાં લેવામાં આવ્યો છે, જોકે કેટલાક અધિકારીઓના મતે હુમલાખોર હજુ પણ ફરાર છે. તપાસમાં રાજકીય દુશ્મનાવટની આશંકા છે, કારણ કે કિર્કના મંતવ્યો વિવાદાસ્પદ હતા. અહેવાલ છે કે યુએસ ઉપરાષ્ટ્રપતિ જેડી વાન્સ ઉટાહ પહોંચવાના છે અને તપાસમાં સહકાર આપશે.
ટ્રમ્પ માટે આ કેવી રીતે મોટો આંચકો છે?
ચાર્લી કિર્ક ડોનાલ્ડ ટ્રમ્પના રાજકીય અભિયાનનો એક મહત્વપૂર્ણ ભાગ હતા. ડોનાલ્ડ ટ્રમ્પે તેમના પર શોક વ્યક્ત કરતા કહ્યું કે દેશના યુવાનોના હૃદયને ચાર્લી કરતાં વધુ સારી રીતે કોઈ સમજી શક્યું નથી. કિર્ક બધાના પ્રિય હતા, ખાસ કરીને મારા. કિર્કે ટ્રમ્પને યુવા મતદારો સાથે જોડાવામાં મદદ કરી હતી, અને તેમના મૃત્યુથી રિપબ્લિકન પાર્ટીમાં એક શૂન્યતા પડી ગઈ છે. ટર્નિંગ પોઈન્ટ યુએસએને હવે તેના સ્થાપક વિના આગળ વધવું પડશે, જે ટ્રમ્પની 2028 ની ચૂંટણી વ્યૂહરચનાને અસર કરી શકે છે. જોકે, ટ્રમ્પે કિર્કના માનમાં ધ્વજ અડધી કાઠીએ લહેરાવવાનો આદેશ આપ્યો.
આ પણ વાંચો:
Nepal Gen-Z Revolution: ભાવનગરના 40થી વધુ શ્રદ્ધાળુઓ નેપાળમાં ફસાયા, મદદ માટે કરી અપીલ
