Trump: ઈરાન ઉપર ઈઝરાયેલ અને અમેરિકાએ સંયુક્ત લશ્કરી કાર્યવાહી કરી ઈરાનમાં 1000 જેટલા લક્ષ ઉપર હુમલો કર્યો છે અને 2000 બૉમ્બ વરસાવ્યા છે.અમેરિકા-ઇઝરાયલના હુમલામાં સુપ્રીમ લીડર ખામેની સહિત તેમના દીકરી-જમાઈ, પુત્રવધૂ-પૌત્રીનાં પણ મોત થઈ ચૂક્યા છે આ બધા વચ્ચે ટ્રમ્પે દાવો કર્યો છે કે “અમે એક જ ઝાટકે ઈરાનના 48 નેતાઓને ખતમ કરી દીધા છે.”ઈરાની મીડિયા અને સૂત્રોના જણાવ્યા અનુસાર ઈરાનમાં અત્યાર સુધીમાં 200થી વધુ ઈરાની નાગરિકો માર્યા ગયા છે અને 700થી વધુ ઘાયલ થયા છે.
ઈરાનમાં ઈઝરાયેલ અને અમેરિકા વિરુદ્ધ લોકોમાં ભારે ગુસ્સો જોવા મળી રહ્યો છે અને લોકો જાહેરમાં વિરોધ પ્રદર્શન કરી રહયા છે તેમજ મસ્જિદો ઉપર લાલ ઝંડા લગાવી બદલો લેવાની પ્રતિજ્ઞા લઈ રહયા છે.જ્યારે યુએસ પ્રમુખ ડોનાલ્ડ ટ્રમ્પે ઈરાન પરના આ હુમલાને “ઈરાની જનતા માટે આઝાદીની નવી તક” ગણાવી છે,પરંતુ લોકો હવે ટ્રમ્પને નફરત કરતા નજરે પડ્યા હતા તેઓ માટે ધર્મ સર્વોપરી છે અને ખામેનીના મોત બાદ શિયાઓ ક્યારેય ટ્રમ્પને માફ કરવાના મૂડમાં નથી.
1989થી સત્તામાં રહેલા 86 વર્ષીય અયાતુલ્લા અલી ખામેનેઈનું તેહરાનમાં તેમના નિવાસસ્થાન પર થયેલા હુમલામાં નિધન થયા બાદ લોકોમાં ભારે ગુસ્સો ફાટી નીકળ્યો છે અને ઈરાન જ નહીં પણ જ્યાં જ્યાં શિયા મુસલમાનો રહે છે તેવા દુનિયાના તમામ ભાગોમાં ઈઝરાયેલ અને અમેરિકા વિરુદ્ધ પ્રદર્શન થયા છે જે શિયાઓની એકતા દર્શાવે છે.
ઇઝરાયેલ અને અમેરિકાના સંયુક્ત હુમલા વચ્ચે ઈરાને પણ 8 દેશો ઉપર જ્યાં જ્યાં અમેરિકાના મિલિટરી બેઝ આવેલા છે તેવા ઠેકાણા ઉપર વળતા પ્રહાર શરૂ કર્યા છે અને ઈરાનના IRGC એ દાવો કર્યો છે કે તેમના મિસાઈલ અને ડ્રોન હુમલામાં અત્યાર સુધીમાં 560 અમેરિકન સૈનિકો માર્યા ગયા છે. તેમણે અમેરિકન યુદ્ધ જહાજ ‘USS અબ્રાહમ લિંકન’ પર ચાર બેલેસ્ટિક મિસાઈલોથી હુમલો કર્યો હોવાનું પણ ઇરાને જણાવ્યું છે, જોકે,ઇરાનના આ દાવાને અમેરિકાએ નકારી કાઢ્યો છે.
બીજી તરફ ઇરાને વળતા હુમલા શરૂ કરતાં હવે યુરોપિયન દેશો પણ અમેરિકાના સમર્થનમાં આવ્યા છે અને બ્રિટન, ફ્રાન્સ અને જર્મનીએ (E-3) સ્પષ્ટ કર્યું છે કે તેઓ આ ક્ષેત્રમાં પોતાના હિતોની રક્ષા માટે કોઈ પણ પગલાં લેવા તૈયાર છે.બ્રિટને ઈરાની મિસાઈલ ડેપો અને લોન્ચર્સ પર હુમલો કરવા માટે બ્રિટિશ સૈન્ય મથકોનો ઉપયોગ કરવાની અમેરિકાને છૂટ આપી છે,બ્રિટિશ વડાપ્રધાન કીર સ્ટારમરે આ જાહેરાત કરી છે.બ્રિટન, ફ્રાન્સ અને જર્મની પોતાના સાથી દેશોના હિતોની રક્ષા માટે ડ્રોન અને મિસાઈલ હુમલા કરવા માટે તૈયાર છે. આ ત્રણેય દેશો હવે અમેરિકાને સાથ આપશે.આમ,ઈઝરાયેલ બાદ યુરોપિયન દેશો પણ અમેરિકાની પડખે થઈ જતા ઈરાન ચારે તરફથી ઘેરાઈ ગયું છે.
