Indian Americans leaving USA: અમેરિકામાં હાલમાં ભારતીય મૂળના 52 લાખથી વધુ લોકો વસવાટ કરે છે, જેઓ ત્યાંના અર્થતંત્રનો મજબૂત સ્તંભ ગણાય છે. જોકે, કાર્નેગી એન્ડોમેન્ટ ફોર ઇન્ટરનેશનલ પીસના ઇન્ડિયન અમેરિકન એટીટ્યુડ્સ સર્વે (IAAS) માં એક ચોંકાવનારો ખુલાસો થયો છે. આ સર્વે અનુસાર, લગભગ 40% ભારતીય મૂળના લોકો હવે અમેરિકા છોડીને અન્યત્ર સ્થળાંતર કરવા અથવા ભારત પરત ફરવા માંગે છે. આ નકારાત્મક વલણ પાછળ રાષ્ટ્રપતિ ડોનાલ્ડ ટ્રમ્પની બીજી ટર્મ પ્રત્યેની નારાજગી, ઇમિગ્રેશનની જટિલ પ્રક્રિયા, આસમાને પહોંચેલી મોંઘવારી અને વધતો જતો વંશીય ભેદભાવ મુખ્ય કારણો તરીકે જોવામાં આવે છે.
વધતો જતો અસંતોષ અને રાજકીય અસ્થિરતાનો પ્રભાવ
સર્વેમાં સામેલ 14% લોકોએ સ્વીકાર્યું છે કે તેમને સતત અમેરિકા છોડવાનો વિચાર આવે છે, જ્યારે 26% લોકો ક્યારેક આવું વિચારી રહ્યા છે. ભારતીય મૂળના 58% લોકોને અમેરિકાની વર્તમાન રાજનીતિ જરાય પસંદ નથી અને 54% લોકો રહેણીકહેણીના વધતા ખર્ચથી પરેશાન છે. સૌથી નોંધપાત્ર બાબત એ છે કે, અમેરિકાની કુલ વસ્તીમાં ભારતીયોનો હિસ્સો માત્ર 1.5% છે, પરંતુ દેશની કુલ ટેક્સ આવકમાં તેમનું યોગદાન અધધ 6% જેટલું છે. જો આટલો મોટો ટેક્સ આપતો વર્ગ દેશ છોડે, તો અમેરિકન ઇકોનોમી પર તેની સીધી અને ગંભીર અસર પડી શકે છે.
ટ્રમ્પની નીતિઓ અને ઓળખનું સંકટ
ભારતીય સમુદાયના 71% લોકો ટ્રમ્પની કામગીરી અને તેમની કાર્યશૈલીથી નારાજ છે. ટ્રમ્પ સરકારની “અમેરિકા ફર્સ્ટ” નીતિ અને ધાર્મિક સમાવેશનો અભાવ ભારતીયોમાં અસલામતી પેદા કરી રહ્યો છે. ઘણી નીતિઓ પરથી એવો સંકેત મળે છે કે અમેરિકા હવે માત્ર મૂળ અમેરિકનો માટે જ છે, જેના કારણે દાયકાઓથી ત્યાં રહેતા ભારતીયો પોતાની ઓળખ અને અસ્તિત્વને લઈને સવાલો ઉભા કરી રહ્યા છે. આ સ્થિતિમાં, બ્રેઈન ડ્રેઈન અથવા પ્રતિભા પલાયન થવાની પૂરેપૂરી શક્યતા સેવાઈ રહી છે.
હેલ્થકેર સેક્ટરમાં ભારતીયોનો દબદબો: અદ્રશ્ય કરોડરજ્જુ
અમેરિકાની આરોગ્ય પ્રણાલી ભારતીય ડોક્ટરો અને નર્સો વગર પાંગળી સાબિત થઈ શકે તેમ છે. અમેરિકામાં કાર્યરત અંદાજે 10 લાખ ડોક્ટરોમાંથી 60 હજારથી 1 લાખ તો માત્ર ભારતીય મૂળના જ છે, જે કુલ સંખ્યાના લગભગ 9% હિસ્સો ધરાવે છે. તેવી જ રીતે, ત્યાંની 34 લાખ નર્સોમાં 30 થી 35 હજાર ભારતીય મહિલાઓ છે, જેઓ હોસ્પિટલો, ઇમરજન્સી યુનિટ્સ અને ઓલ્ડ એજ હોમ્સમાં દિવસ-રાત સેવા આપે છે. આ મેડિકલ પ્રોફેશનલ્સ માત્ર સારવાર જ નથી કરતા, પરંતુ ઉચ્ચ આવક ધરાવતા હોવાથી મોટો ટેક્સ ભરીને અર્થતંત્રને મજબૂતી પણ આપે છે.
શિક્ષણ અને સંશોધન ક્ષેત્રે નિર્ણાયક ભૂમિકા
મેડિકલ ક્ષેત્ર ઉપરાંત, શિક્ષણ અને સંશોધનમાં પણ ભારતીયોની હાજરી પ્રચંડ છે. હાર્વર્ડ, જોન્સ હોપકિન્સ અને મેયો ક્લિનિક જેવી વિશ્વવિખ્યાત સંસ્થાઓમાં ભારતીય મૂળના પ્રોફેસરો, ડીન અને રિસર્ચ હેડ મહત્વના હોદ્દા પર બિરાજમાન છે. આશરે 10 થી 12 હજાર ભારતીય વિદ્યાર્થીઓ હાલમાં અમેરિકામાં મેડિસિનનો અભ્યાસ કરી રહ્યા છે. ગ્રામીણ વિસ્તારોમાં જ્યાં અમેરિકન ડોક્ટરો સેવા આપતા ખચકાય છે, ત્યાં ભારતીય ડોક્ટરો કોઈપણ ખચકાટ વગર સેવા આપીને જનતાના સ્વાસ્થ્યની રક્ષા કરી રહ્યા છે.
ટેકનોલોજી અને વિજ્ઞાનમાં ભારતીય પ્રતિભાનો વિજય
21મી સદી ટેકનોલોજીની સદી છે અને તેમાં ભારતીય વૈજ્ઞાનિકો તથા એન્જિનિયરોનું યોગદાન અજોડ છે. અમેરિકાના કુલ વૈજ્ઞાનિકોમાંથી 10-12% ભારતીય મૂળના છે. ગયા વર્ષે જ 26 ભારતીયોને પ્રતિષ્ઠિત નેશનલ એકેડેમી ઓફ ઇન્વેન્ટર્સ ફેલોશિપ માટે પસંદ કરવામાં આવ્યા હતા. આર્ટિફિશિયલ ઇન્ટેલિજન્સ (AI), બાયોટેકનોલોજી અને ફાર્માસ્યુટિકલ્સ જેવા ક્ષેત્રોમાં ભારતીય મગજ નવીનતા અને સંશોધન દ્વારા અમેરિકાને વિશ્વગુરુ બનાવી રાખવામાં મદદ કરી રહ્યું છે.
ટ્રમ્પ સરકારે વાસ્તવિકતા સમજવાની જરૂર
અમેરિકાની ટોચની ટેક કંપનીઓથી લઈને યુનિવર્સિટીઓ સુધી ભારતીયોનો દબદબો છે. ત્યાંની યુનિવર્સિટીઓમાં આશરે 22,000 ભારતીય મૂળના પ્રોફેસરો કાર્યરત છે. ટ્રમ્પ ભલે ગમે તેવા નિવેદનો આપે, પરંતુ સત્ય એ છે કે ભારતીય પ્રતિભા વગર અમેરિકાનો આર્થિક અને વૈજ્ઞાનિક વિકાસ રૂંધાઈ શકે છે. જો 40% ભારતીયો ખરેખર અમેરિકા છોડવાનો નિર્ણય લેશે, તો તે અમેરિકા માટે માત્ર સામાજિક નુકસાન નહીં, પણ એક મોટી આર્થિક અને બૌદ્ધિક આપત્તિ સાબિત થશે.
