Gujarat University Swimming Pool: અમદાવાદમાં ઉનાળાની આગઝરતી ગરમી વચ્ચે જ્યારે લોકો ઠંડક મેળવવા વોટરપાર્ક અને સ્વિમિંગ પુલના સહારે જઈ રહ્યા છે, ત્યારે ગુજરાતની સૌથી મોટી ગુજરાત યુનિવર્સિટીમાંથી એક શરમજનક કિસ્સો પ્રકાશમાં આવ્યો છે. યુનિવર્સિટીમાં વિદ્યાર્થીઓને રમતગમતનું શ્રેષ્ઠ પ્લેટફોર્મ પૂરું પાડવાના બહાને ૩૦ કરોડના ખર્ચે સ્પોર્ટ્સ કોમ્પ્લેક્સ તૈયાર કરવામાં આવ્યું હતું. આ સંકુલના ભાગરૂપે ૭ કરોડ રૂપિયાના માતબર ખર્ચે અત્યાધુનિક અને ઓલિમ્પિક કક્ષાનો સ્વિમિંગ પુલ બનાવવામાં આવ્યો હતો. જોકે, આશ્ચર્યની વાત એ છે કે વર્ષ ૨૦૧૮માં આ પુલનું નિર્માણ કાર્ય પૂર્ણ થયા બાદ તેને આજદિન સુધી એક પણ વખત વિદ્યાર્થીઓ કે રમતવીરો માટે ખુલ્લો મૂકવામાં આવ્યો નથી. કરોડો રૂપિયાના ખર્ચે ઊભી કરાયેલી આ મિલકત અત્યારે માત્ર વહીવટી લાલીયાવાડીનો નમૂનો બનીને રહી ગઈ છે.
જાળવણીના અભાવે મશીનરી અને ઇન્ફ્રાસ્ટ્રક્ચર ખંડેર હાલતમાં
છેલ્લા સાત વર્ષથી આ સ્વિમિંગ પુલ બંધ હાલતમાં હોવાને કારણે તેની હાલત અત્યંત દયનીય બની ગઈ છે. ૨૫ બાય ૫૦ ફૂટના આ વિશાળ પુલને ભરવા માટે ૨૨ લાખ લિટર પાણીની ક્ષમતા અને આધુનિક ફિલ્ટ્રેશન સિસ્ટમ સાથેની મશીનરી બેસાડવામાં આવી હતી. ઉપયોગ અને યોગ્ય જાળવણીના અભાવે આ મોંઘીદાટ મશીનરીમાં કાટ લાગી ગયો છે અને તે ભંગારમાં ફેરવાઈ રહી છે. આધુનિક ચેન્જિંગ રૂમ અને અન્ય સુવિધાઓ ધૂળ ખાઈ રહી છે. સરકારી નાણાંનો આ રીતે વેડફાટ થતા વિદ્યાર્થી સંગઠન NSUI દ્વારા ઉગ્ર વિરોધ પ્રદર્શન અને આંદોલનની ચીમકી ઉચ્ચારવામાં આવી છે. જ્યારે મ્યુનિસિપલ કોર્પોરેશનના પુલમાં વેઇટિંગ લિસ્ટ ચાલી રહ્યું હોય ત્યારે યુનિવર્સિટીની આ બેદરકારી ઉડીને આંખે વળગે તેવી છે.
કુલપતિનો લૂલો બચાવ: મહેકમ અને સ્ટાફના વાંકે તાળું
આ ગંભીર બેદરકારી અંગે જ્યારે ગુજરાત યુનિવર્સિટીના વાઇસ ચાન્સેલર પ્રો. નીરજા ગુપ્તાને સવાલ પૂછવામાં આવ્યા, ત્યારે તેમણે જે જવાબ આપ્યો તે વધુ આશ્ચર્યજનક છે. કુલપતિના જણાવ્યા મુજબ, સ્વિમિંગ પુલ તૈયાર છે પરંતુ તેને ચલાવવા માટે જરૂરી સ્ટાફ માટે હજુ સુધી મહેકમની મંજૂરી મળી નથી. એટલે કે, ૭ કરોડનું ઇન્ફ્રાસ્ટ્રક્ચર માત્ર થોડાક કર્મચારીઓની ભરતી ન થવાને કારણે ધૂળ ખાઈ રહ્યું છે. છ વર્ષ જેટલો લાંબો સમય વીતવા છતાં જો યુનિવર્સિટી વહીવટી તંત્ર સ્ટાફની વ્યવસ્થા ન કરી શકતું હોય, તો તે સત્તાધીશોની ઈચ્છાશક્તિ પર મોટા સવાલો ઊભા કરે છે. આ બચાવ માત્ર પોતાની નિષ્ફળતા છુપાવવાનો પ્રયાસ હોય તેમ દેખાઈ રહ્યું છે.
૨૦૩૬ ઓલિમ્પિકના સપના અને જમીની હકીકત
ભારત જ્યારે ૨૦૩૦માં કોમનવેલ્થ ગેમ્સ અને ૨૦૩૬માં ઓલિમ્પિકની યજમાની કરવાના સપના જોઈ રહ્યું છે, ત્યારે ગુજરાત યુનિવર્સિટીનું આ ખંડેર સ્વિમિંગ પુલ વ્યવસ્થાની પોકળતા સાબિત કરે છે. ઓલિમ્પિક માપદંડ મુજબ તૈયાર થયેલો આ પુલ રાજ્ય અને રાષ્ટ્રીય સ્તરના ખેલાડીઓ માટે પ્રેક્ટિસનું શ્રેષ્ઠ કેન્દ્ર બની શક્યો હોત. જો રમતવીરોને તૈયાર કરવા માટેની સુવિધાઓ જ આ રીતે ભંગાર હાલતમાં પડી રહેશે, તો આંતરરાષ્ટ્રીય સ્તરે મેડલ જીતવાની આશા કેવી રીતે રાખી શકાય? શું માત્ર ઇમારતો બનાવી દેવી એ જ વિકાસ છે? તેની જાળવણી અને ઉપયોગિતા માટે જવાબદારી કોની?
જો સ્ટાફની મંજૂરી જ નહોતી, તો ૭ કરોડના ખર્ચે આટલું મોટું ઇન્ફ્રાસ્ટ્રક્ચર ઉભું કરવાની ઉતાવળ કેમ કરવામાં આવી? ૨૦૧૮ થી ૨૦૨૬ સુધીના આટલા લાંબા ગાળામાં સ્ટાફ ભરતીની પ્રક્રિયા પૂર્ણ ન કરવા બદલ જવાબદાર અધિકારીઓ સામે કયા પગલાં લેવામાં આવ્યા? હવે જ્યારે મશીનરી ભંગાર બની રહી છે, ત્યારે તેને ફરી કાર્યરત કરવા માટે થનારા વધારાના ખર્ચનો બોજ કોના માથે નાખવામાં આવશે? શું યુનિવર્સિટી સત્તાધીશો માટે વિદ્યાર્થીઓની સુવિધા કરતા ટેન્ડર અને બાંધકામની પ્રક્રિયા વધુ મહત્વની છે?
આ પણ વાંચો:
