હાલ યુવાનોમાં ઈ-સિગારેટ પીવાનો ક્રેશ વધી રહ્યો છે. યુવાનો વિદેશમાંથી મંગાવી ઈ-સિગારટ પી રહ્યા છે. ત્યારે અમદવાદના વસ્ત્રાપુરમાંથી ઈ-સિગારેટનો મોટો જથ્થો ઝડપાયો છે. સાથે જ એક શખ્સની ધરપકડ કરાઈ છે.
પોતાના શોખ પુરા કરવા યુવાને મંગાવ્યો જથ્થો
ઇલેક્ટ્રિક સિગારેટના જથ્થા સાથે ઝડપાયેલા યુવકે કબૂલ્યું છે કે તેણે મોજશોખ માટે ઓનલાઇન મંગાવ્યો હતો. જેથી પોલીસે અલગ અલગ ફ્લેવરની 27 ઈ-સિગરેટ સહિત 5.27 લાખનો મુદ્દામાલ કબજે કર્યો છે. વસ્ત્રાપુર પોલીસે ગુનો નોધી વધુ તપાસ શરૂ કરી છે.
આ રીતે ઝડપાઈ ઈ-સિગારેટ
વસ્ત્રાપુર પોલીસ સ્ટેશનના પીઆઇ એસ.જે. કંડોરીયા સહિતની ટીમ ગત રોજ IIMથી વસ્ત્રાપુર તળાવ જવાના રસ્તા પર વાહનોની તપાસ કરી રહી હતી. વાહનચેકિંગ દરમિયાન એક કાળા કલરની ક્રેટા કાર પૂરઝડપે IIM બ્રીજથી વસ્ત્રાપુર તરફ આવી રહી હતી. પોલીસે ક્રેટા કારને રોકવા ઇશારો કર્યો હતો. પોલીસે કાર રોકીને જોતા તેમાં ઇ-સિગારેટ પડી હતી. જશવર્ધન દીપકભાઇ સંઘવી( પાલડી ચંદનબાલા એપાર્ટમેન્ટ) નામના યુવકની કારની તલાશી લેતાં અલગ અલગ ફ્લેવરની કુલ 27 ઇ-સિગારેટ મળી આવી હતી. જેથી આરોપી યુવાનની ધરપકડ કરી વધુ કાર્યવાહી હાથ ધરી છે.
ઓનલાઈન મંગાવ્યાનું કબૂલ્યું
યુવકે કબૂલ્યું હતુ કે તે ઇ-સિગારેટ પીવાનો શોખીન છે. ઇ-સિગારેટ પર પ્રતિબંધ હોવાથી તે ઓનલાઇન ઓર્ડર કરતો હતો. જશવર્ધન ઇન્સ્ટાગ્રામ વાપરે છે જેમાં ઇ-સિગારેટની જાહેરાત આવી હતી. જાહેરાત વાંચી તેણે ઇ-સિગારેટ મંગાવી લીધી હતી. પાંચ લાખ રૂપિયાની ક્રેટા કાર જપ્ત કરી છે. જશવર્ધન ઇન્સ્ટાગ્રામ પર જાહેરાત જોઇને ઇ-સિગારેટ મંગાવતો હતો.
