Bandi Sanjays son POCSO Case: કેન્દ્રીય ગૃહ રાજ્ય મંત્રી બંડી સંજય કુમારના પુત્ર બંડી સાઈ ભાગીરથ વિરુદ્ધ ‘બાળ જાતીય અપરાધ સંરક્ષણ અધિનિયમ’ (પોક્સો) હેઠળ કેસ નોંધાતા તેલંગાણાના રાજકારણમાં ખળભળાટ મચી ગયો છે. ૧૦ મે રવિવારે જ્યારે વડાપ્રધાન નરેન્દ્ર મોદી હૈદરાબાદમાં જનસભા સંબોધી રહ્યા હતા, ત્યારે જ ભાજપ આ ગંભીર કેસથી હચમચી ગયું હતું. આ મામલાની ગંભીરતા જોતા મુખ્યમંત્રી એ. રેવંત રેડ્ડીએ પોલીસ મહાનિર્દેશક (ડીજીપી) સીવી આનંદ સાથે બેઠક કરી તપાસની વિગતો મેળવી હતી. મુખ્યમંત્રીના કડક નિર્દેશ બાદ ડીજીપીએ કુક્ટપલ્લીના ડીસીપી આઈપીએસ અધિકારી રિતિરાજની આગેવાનીમાં એક વિશેષ તપાસ ટીમ (SIT) ની રચના કરી છે.
ફરિયાદકર્તા મહિલાના ચોંકાવનારા આક્ષેપો: ફાર્મહાઉસ પર ગેરવર્તન અને માનસિક આઘાત
૮ મેના રોજ ૧૭ વર્ષીય છોકરીની માતાએ નોંધાવેલી ફરિયાદ મુજબ, ૩૧ ડિસેમ્બરના રોજ હૈદરાબાદના મોઈનાબાદ સ્થિત એક ફાર્મહાઉસમાં ભાગીરથે તેમની પુત્રીનું જાતીય શોષણ કર્યું હતું. ફરિયાદમાં આરોપ છે કે છોકરીને તેની મરજી વિરુદ્ધ દારૂ પીવા મજબૂર કરવામાં આવી અને તેને રાતભર અન્ય સાત છોકરા-છોકરીઓ સાથે રોકાવા માટે દબાણ કરાયું. મહિલાના જણાવ્યા મુજબ, ભાગીરથે લગ્નનો ભરોસો આપીને છોકરીનું શારીરિક શોષણ કર્યું અને બાદમાં સંબંધ પૂરો કરી દીધો. આ આઘાતને કારણે પીડિતાએ જાન્યુઆરીમાં બે વાર આત્મહત્યાનો પ્રયાસ પણ કર્યો હતો. પરિવારનો દાવો છે કે જ્યારે તેમણે માર્ચમાં કાનૂની કાર્યવાહીનો પ્રયાસ કર્યો ત્યારે તેમના પર કેસ પાછો ખેંચવા દબાણ કરવામાં આવ્યું હતું.
ભાગીરથની વળતી ફરિયાદ: હની ટ્રેપ અને ૫ કરોડની ખંડણીનો દાવો
સામે પક્ષે બંડી સાઈ ભાગીરથે પણ છોકરીના પરિવાર વિરુદ્ધ કરીમનગરના ટુ ટાઉન પોલીસ સ્ટેશનમાં વળતી ફરિયાદ નોંધાવી છે. ભાગીરથનો દાવો છે કે છોકરી અને તેના માતા-પિતા સાથે તેના મૈત્રીપૂર્ણ સંબંધો હતા અને તેઓ સાથે મંદિરે પણ ગયા હતા. ફરિયાદ મુજબ, જ્યારે તેણે લગ્ન કરવાની ના પાડી ત્યારે પરિવારે તેને ખોટા કેસમાં ફસાવવાની ધમકી આપી ૫ કરોડ રૂપિયાની માંગણી કરી હતી. ભાગીરથે એવો પણ દાવો કર્યો કે ડરના કારણે તેણે અગાઉ ૫૦,૦૦૦ રૂપિયા આપ્યા હતા, છતાં પરિવારે માનસિક ત્રાસ આપવાનું ચાલુ રાખ્યું હતું.
પોલીસ કાર્યવાહી અને તપાસના આકરા તેવર
પેટ બશીરાબાદ પોલીસે ભાગીરથ વિરુદ્ધ ભારતીય ન્યાય સંહિતા (BNS) અને પોક્સો એક્ટની વિવિધ કલમો હેઠળ ગુનો નોંધ્યો છે, જ્યારે છોકરીના પરિવાર વિરુદ્ધ જબરન વસૂલાત અને ધમકીના કેસ નોંધાયા છે. SIT ની ટીમે ઘટનાસ્થળના સીસીટીવી ફૂટેજ અને કોલ ડિટેલ રેકોર્ડ (સીડીઆર) એકત્ર કરવાનું શરૂ કરી દીધું છે. ડીસીપી રિતિરાજે સ્પષ્ટ કર્યું છે કે જો ગુનો સાબિત થશે તો આરોપીની ધરપકડ કરવામાં આવશે. મુખ્યમંત્રીએ તપાસમાં કોઈ પણ પ્રકારની બેદરકારી ન રાખવા અને દરરોજ રિપોર્ટ સોંપવા આદેશ આપ્યો છે.
રાજકીય આક્ષેપ-પ્રતિઆક્ષેપ અને ભાગીરથનો વિવાદાસ્પદ ભૂતકાળ
આ સમગ્ર મામલે રાજનીતિ તેજ બની છે. કેન્દ્રીય મંત્રી બંડી સંજયે આને તેમને બદનામ કરવાનું ‘રાજકીય ષડયંત્ર’ ગણાવ્યું છે, જ્યારે બીઆરએસ નેતા કેટી રામા રાવે સવાલ ઉઠાવ્યો છે કે શું દેશમાં પહેલીવાર કોઈ કેન્દ્રીય મંત્રીનો પુત્ર ફરાર છે? નોંધનીય છે કે ભાગીરથ અગાઉ પણ યુનિવર્સિટીમાં સાથી વિદ્યાર્થી સાથે મારપીટના કેસમાં સસ્પેન્ડ થઈ ચૂક્યો છે. આ વિવાદ વચ્ચે બંડી સંજયના સમર્થકોએ વિરોધ પક્ષના નેતાઓની ઓફિસો અને વાહનોમાં તોડફોડ કરી હોવાના અહેવાલ પણ સામે આવ્યા છે. ભાગીરથના વકીલોએ આગોતરા જામીન માટે હાઈકોર્ટના દરવાજા ખટખટાવ્યા છે.
આ કિસ્સો સત્તા, રાજકારણ અને કાયદાના રક્ષણ વચ્ચેની પાતળી રેખા પર અનેક સવાલો ઉભા કરે છે. શું કેન્દ્રીય મંત્રીનો પુત્ર હોવાને કારણે તપાસમાં કોઈ પ્રભાવ પડી શકે? જો પીડિતાના આક્ષેપો સાચા છે, તો ૬ મહિના સુધી ફરિયાદ કેમ ન થઈ અને જો ભાગીરથનો ખંડણીનો દાવો સાચો છે, તો તેણે અગાઉ પોલીસને જાણ કેમ ન કરી? શું SIT ખરેખર નિષ્પક્ષ તપાસ કરી શકશે કે પછી રાજકીય દબાણ હેઠળ કેસ નબળો પડશે?
આ પણ વાંચો:
