Bharuch: BJP ધારાસભ્યને કારણે ગામ લોકોએ કેમ કર્યો આત્મવિલોપનનો પ્રયાસ?

Bharuch: ભરૂચ જિલ્લાના વાગરા તાલુકાના વેંગણી ગામમાં પીવાના પાણીની સમસ્યાએ હવે ઉગ્ર સ્વરૂપ ધારણ કર્યું છે. છેલ્લા 20 વર્ષથી આ ગામ પાણીની અછતનો સામનો કરી રહ્યું છે, જેના કારણે ગ્રામજનોનું ધૈર્ય ખૂટી ગયું છે. આક્રોશના ભાગરૂપે, ગામના કેટલાક લોકોએ શરીર પર ડીઝલ છાંટી આત્મવિલોપનનો પ્રયાસ કર્યો છે તેમજ તેમણે અહીંના ભાજપના ધારાસભ્ય પર ગંભીર આક્ષેપ પણ પણ કર્યા છે. ત્યારે શું છે આ સમગ્ર મામલો? ધારાસભ્ય અરુણસિંહ રાણા કેવી રીતે ગામને પાણી મળતું અટકાવી રહ્યા છે તેને લઈને વેંગણી ગામના ધર્મેન્દ્ર ગોહિલે ધ ગુજરાત રિપોર્ટ સાથે વાત કરતા જણાવ્યું હતું.

GIDC ની પાઇપલાઇનમાં 85 જેટલા પંચર

કેન્દ્ર સરકારની ‘નલ સે જલ’ યોજના હોવા છતાં, વેંગણી ગામમાં પીવાના પાણીની સુવિધા હજુ સુધી પહોંચી નથી. ગ્રામજનોનું કહેવું છે કે, GIDC ની પાઇપલાઇનમાં 85 જેટલા પંચર હોવા છતાં તેનું સમારકામ કરવામાં આવ્યું નથી. આ ઉપરાંત ભાજપના ધારાસભ્ય અરુણસિંહરાણા પર ગ્રામજનોએ આક્ષેપ કર્યો છે કે, તેમણે આ સમસ્યાને નજરઅંદાજ કરી છે. ગ્રામજનોની સતત રજૂઆતો છતાં કોઈ નક્કર પગલાં લેવાયા નથી, જેના કારણે ગામનું વાતાવરણ તંગ બન્યું છે.

પાણી માટે ગ્રામજનોનો આત્મવિલોપનનો પ્રયાસ

વેંગણી ગામના રહેવાસીઓએ પાણીની સમસ્યાથી કંટાળીને આત્મવિલોપનનો પ્રયાસ કર્યો હતો. ગ્રામજનોએ શરીર પર ડીઝલ છાંટીને પોતાનો રોષ વ્યક્ત કર્યો, જેનો વીડિયો સોશિયલ મીડિયા પર વાયરલ થયો છે. આ ઘટનાએ સ્થાનિક વહીવટ અને રાજ્ય સરકારની નિષ્ફળતાને ઉજાગર કરી છે. ગ્રામજનોએ આરોપ લગાવ્યો છે કે, પાણી પુરવઠા વિભાગ અને હાઇડ્રોલોજીસ્ટ ગામની મુલાકાતે આવ્યા હોવા છતાં, સમસ્યાનું કોઈ નિરાકરણ આવ્યું નથી.

ધારાસભ્યએ આ સમસ્યાને લઈને શું કહ્યું ?

આ ઘટના અંગે ધારાસભ્ય અરુણ રણાએ જણાવ્યું હતું કે, પાઇપલાઇનમાં પંચર કરવું ગેરકાયદેસર છે, પરંતુ તેમણે પાણીની સમસ્યાના નિરાકરણ માટે કોઈ ચોક્કસ યોજના કે સમયમર્યાદા જણાવી નથી. આ નિવેદનથી ગ્રામજનોમાં વધુ નારાજગી ફેલાઈ છે, કેમ કે તેઓ વર્ષોથી આ સમસ્યાનો સામનો કરી રહ્યા છે.

ગ્રામજનોએ ધારાસભ્ય પર આક્ષેપ કરતા શું કહ્યું ? પાણી નહીં આપવામાં આવે તો તેમણે શું ચીમકી આપી જાણવા માટે જુઓ વીડિયો…