BJP Love Jihad Laws: ફેબ્રુઆરી ૨૦૨૦ માં ખુદ નરેન્દ્ર મોદી સરકારના તત્કાલીન ગૃહ રાજ્ય મંત્રી જી. કિશન રેડ્ડીએ સંસદમાં એક લેખિત જવાબમાં સત્તાવાર રીતે સ્વીકાર્યું હતું કે ‘લવ જેહાદ’ જેવો કોઈ શબ્દ ભારતીય કાયદા હેઠળ વ્યાખ્યાયિત જ નથી, અને દેશની કોઈ પણ કેન્દ્રીય એજન્સીએ આવો કોઈ કેસ રિપોર્ટ કર્યો નથી. તેમણે બંધારણની કલમ ૨૫ નો હવાલો આપીને સ્પષ્ટ કર્યું હતું કે દેશના દરેક નાગરિકને કોઈ પણ ધર્મ માનવાની અને તેનો પ્રચાર કરવાની સંપૂર્ણ આઝાદી છે. કેરળ હાઈકોર્ટ સહિતની અદાલતોએ પણ આ જ વાતને યોગ્ય ઠેરવી છે. પરંતુ ચૂંટણીઓ જીતવા અને જનતામાં નફરત ફેલાવવા માટે ભાજપ નેતૃત્વ હંમેશા બેવડી વાતો કરે છે. ચૂંટણી રેલીઓમાં બંધારણીય મર્યાદાઓ ઓળંગીને આ નેતાઓ ‘લવ જેહાદ’ ને કોઈ બહુ મોટો સામાજિક ગુનો હોય તે રીતે રજૂ કરીને સસ્તી વોટબેંકનું રાજકારણ રમે છે.
મુખ્યમંત્રીઓની ઉશ્કેરણીજનક ભાષા અને કાયદાકીય જોહુકમી
આ કાલ્પનિક ષડયંત્રની થિયરીને હવા આપીને હિન્દુ-મુસ્લિમ વિખવાદ ઊભો કરવા માટે ભાજપ શાસિત રાજ્યોના મુખ્યમંત્રીઓએ મર્યાદાઓ ઓળંગી છે. કર્ણાટકના તત્કાલીન સીએમ બી.એસ. યેદિયુરપ્પા અને ગૃહમંત્રી બસવરાજ બોમ્મઈએ કોઈ પણ સત્તાવાર ડેટા કે કેસ ન હોવા છતાં તેને ‘સામાજિક બદી’ ગણાવી કડક કાયદાની બણગા ફૂંકી હતી. જ્યારે ઉત્તર પ્રદેશના મુખ્યમંત્રી યોગી આદિત્યનાથે તો ખુલ્લેઆમ ધમકી આપતા કહ્યું હતું કે, “જેઓ ઓળખ છુપાવીને આપણી બહેનોના સન્માન સાથે રમત કરશે, તેમની ‘રામ નામ સત્ય’ ની યાત્રા (અંતિમ સંસ્કાર) શરૂ થઈ જશે.” આ જ રસ્તે ચાલીને ઉત્તરાખંડના સીએમ પુષ્કરસિંહ ધામી, મધ્ય પ્રદેશના તત્કાલીન સીએમ શિવરાજસિંહ ચૌહાણ અને ગુજરાતના ગૃહ રાજ્ય મંત્રી હર્ષ સંઘવીએ વિધાનસભામાં ‘સલીમ-સુરેશ’ ના ઉદાહરણો આપીને વહીવટી તંત્રને કડક કાર્યવાહીના નામે લઘુમતી પુરુષોને ટાર્ગેટ કરવાનો ખુલ્લો પરવાનો આપી દીધો છે.
મહિલા આયોગનો ટાઇમ બોમ્બ અને આરટીઆઈ માં ફૂટેલો ભાંડો
રાષ્ટ્રીય મહિલા આયોગ (NCW) ના પૂર્વ અધ્યક્ષ રેખા શર્માએ કેરળ પ્રવાસ બાદ સનસનાટી ફેલાવવા માટે દાવો કર્યો હતો કે ‘લવ જેહાદ’ એક ટિક-ટિક કરતા ટાઇમ બોમ્બ જેવો છે અને હિન્દુ-ખ્રિસ્તી યુવતીઓને જબરદસ્તી ધર્માંતરણ કરાવીને વિદેશમાં સેક્સ ઓબ્જેક્ટ તરીકે સપ્લાય કરાય છે. પરંતુ જ્યારે ‘આર્ટિકલ 14’ દ્વારા એક આરટીઆઈ (RTI) અરજી દાખલ કરવામાં આવી, ત્યારે આયોગે સત્તાવાર રીતે સ્વીકારવું પડ્યું કે તેમની પાસે આખા ભારતમાં ક્યાંયથી પણ ‘લવ જેહાદ’ અથવા જબરદસ્તી ધર્માંતરણની પુષ્ટિ કરતો એક પણ સત્તાવાર ડેટા નથી. રેખા શર્માની કહેવાતી વિગતવાર તપાસ માત્ર ૩ દિવસના પ્રવાસ સિવાય કંઈ નહોતી, જેનો રિપોર્ટ પણ આયોગે સાર્વજનિક કરવાનો સાફ ઇનકાર કરી દીધો હતો. આનાથી સાબિત થાય છે કે સરકારી બંધારણીય સંસ્થાઓ પણ સત્તાના ઇશારે પ્રોપેગેન્ડા ચલાવી રહી છે.
ધર્માંતરણ વિરોધી કાયદાના નામે વ્યક્તિગત આઝાદીનું દમન
ભારતમાં અલગ-અલગ ધર્મના યુગલો માટે ૧૯૫૪ માં સંસદે ‘સ્પેશિયલ મેરેજ એક્ટ’ પસાર કર્યો હતો, જે કોઈ પણ ધર્મ બદલ્યા વિના પુખ્ત વયના પુરુષ (૨૧ વર્ષ) અને સ્ત્રી (૧૮ વર્ષ) ને લગ્ન કરવાની કાયદાકીય મંજૂરી આપે છે. પરંતુ આ કાયદામાં રહેલી ‘એક મહિનાની પબ્લિક નોટિસ’ આપવાની શરત આંતરધર્મી યુગલો માટે ફાંસીનો ફંદો બની ગઈ છે. કેરળ જેવા રાજ્યોએ આ નોટિસો ઓનલાઇન મૂકવાનું શરૂ કરતા જ પ્રાઈવસીનો અધિકાર ખતમ થઈ ગયો છે. હિન્દુત્વવાદી સંગઠનો આ નોટિસો પર નજર રાખીને યુગલોના ઘર સુધી પહોંચી જાય છે, તેમને ડરાવે છે અને મારપીટ કરે છે. આ અડચણોથી બચવા માટે જ્યારે યુગલો ધાર્મિક કાયદા હેઠળ લગ્ન કરવા ધર્મ બદલે છે, ત્યારે ભાજપ સરકારોએ કાયદામાં સુધારા કરીને લગ્નના ઉદ્દેશ્યથી થતા ધર્માંતરણને જ બિન-જામીનપાત્ર ગુનો બનાવી દીધો છે. મહારાષ્ટ્રના ૨૦૨૬ ના કાયદામાં તો ત્યાં સુધી જોગવાઈ કરાઈ છે કે જો આવા સંબંધથી કોઈ બાળક પેદા થાય, તો તેનો ધર્મ લગ્ન પહેલા તેની માતાનો હતો તે જ રહેશે, જે સત્તાવાળાઓની માનસિક વિકૃતિ દર્શાવે છે.
પોલીસ અને હિન્દુત્વવાદી ગુંડાઓની ખતરનાક સાંઠગાંઠ
જમીની હકીકત તપાસતા સ્વતંત્ર મીડિયા રિપોર્ટ્સમાં એક અત્યંત ડરામણો ચહેરો સામે આવ્યો છે. આંતરધર્મી યુગલોના મામલામાં હવે સ્થાનિક પોલીસ અને બજરંગ દળ કે ગૌ રક્ષા ફોર્સ જેવા હિન્દુત્વવાદી ગુંડાઓ એક સિક્કાની બે બાજુ બની ગયા છે. જેવા જ કોઈ યુગલના લગ્નની માહિતી મળે, ગુંડાઓ પોલીસને બોલાવે છે અને પોલીસ કાયદાનો ડર બતાવીને મુસ્લિમ પુરુષોને જેલમાં ધકેલી દે છે. આ સંગઠનો છોકરીઓને ‘કાઉન્સિલિંગ’ ના નામે એસિડ ફેંકવાની, નાક કાપી નાખવાની કે તેના પ્રેમીનું પોલીસ એન્કાઉન્ટર કરાવી દેવાની ધમકીઓ આપે છે. ૨૦૨૩ માં સંસ્કૃતિ શુક્લા અને જાવેદ ખાનના કિસ્સામાં મરજીથી લગ્ન કર્યા હોવા છતાં ગુંડાઓની ધમકીને કારણે યુગલને ભાગવું પડ્યું હતું. જ્યારે ટ્વિંકલ નામની યુવતીની આત્મહત્યાના કેસમાં તેના પતિ શાહરૂખની ધરપકડ આત્મહત્યા માટે નહીં પરંતુ કથિત ધર્માંતરણના કાયદા હેઠળ કરાઈ હતી, જેનો શ્રેય બિટ્ટુ બજરંગી જેવા ગુંડાઓ ખુલ્લેઆમ લે છે.
સુપ્રીમ કોર્ટના ચુકાદાઓનું સરેઆમ ઉલ્લંઘન અને યુસીસીનો સકંજો
ભારતની સર્વોચ્ચ અદાલતે ‘લતા સિંહ વિરુદ્ધ યુપી રાજ્ય’, ‘એસ. ખુશબૂ વિરુદ્ધ કનિયામ્મલ’ અને પ્રખ્યાત હદિયા કેસ (‘શફીન જહાન વિરુદ્ધ અશોકન’) માં વારંવાર સ્પષ્ટ કર્યું છે કે દરેક પુખ્ત નાગરિકને પોતાની પસંદગીનો જીવનસાથી પસંદ કરવાનો, તેની સાથે લગ્ન કરવાનો કે લિવ-ઇન રિલેશનશિપમાં રહેવાનો મૌલિક અને વ્યક્તિગત અધિકાર છે. પરંતુ નીચલી અદાલતો અને પોલીસ આ આદેશોને ઘોળીને પી ગઈ છે. ૨૦૨૪ માં ઉત્તરાખંડ સરકાર જે ‘યુનિફોર્મ સિવિલ કોડ’ (UCC) લાવી, તેમાં તો લિવ-ઇન કપલ માટે સત્તાવાળાઓ પાસે રજિસ્ટ્રેશન કરાવવું અનિવાર્ય કરી દેવાયું છે, જેનો ભંગ કરવા બદલ જેલની સજાની જોગવાઈ છે. તાજેતરમાં અલ્હાબાદ હાઈકોર્ટે પણ ‘કિરણ રાવત કેસ’ માં આંતરધર્મી લિવ-ઇન કપલને પોલીસ સુરક્ષા આપવાનો ઇનકાર કરી દીધો હતો.
આ આખા ભેદભાવયુક્ત કાયદાકીય માળખાની સૌથી ગંદી વાસ્તવિકતા એ છે કે જો કોઈ મુસ્લિમ મહિલા કોઈ હિંદુ પુરુષ સાથે પ્રેમ લગ્ન કરે છે, તો કાયદો કે ગુંડાઓ તેને અટકાવતા નથી. ઉલટું, પોલીસ અને હિન્દુત્વવાદી સંગઠનો આવા લગ્નોને સુરક્ષા આપે છે, મીઠાઈઓ વહેંચે છે અને જશ્ન મનાવે છે. આ વલણ સાબિત કરે છે કે સત્તાધારી તંત્ર સ્ત્રીને માત્ર એક ‘સંપત્તિ’ સમજે છે. જો મુસ્લિમ પુરુષ હિંદુ સ્ત્રી સાથે લગ્ન કરે તો તે હિંદુ સંપત્તિની ‘ચોરી’ છે અને જો હિંદુ પુરુષ મુસ્લિમ સ્ત્રી લાવે તો તે સંપત્તિનો ‘વધારો’ છે! નેશનલ લો યુનિવર્સિટીના પ્રોફેસર સરસુ એસ્થર થોમસ અને વકીલ મિહિર દેસાઈના જણાવ્યા અનુસાર, આ નીતિઓ સંકોચશીલ દક્ષિણપંથી રાષ્ટ્રવાદની આક્રમક પરાકાષ્ઠા છે, જેણે દેશના યુગલોને પોતાના જ દેશમાં ભગોડા અને ગુનેગાર તરીકે જીવવા મજબૂર કરી દીધા છે. હવે સમય આવી ગયો છે કે હંસા મહેતા અને રાજકુમારી અમૃત કૌર જેવી બંધારણ સભાની માતાઓના સપનાને પૂરું કરવા માટે સત્તાધારી કટ્ટરતા સામે નાગરિક અધિકારોનું નવું આંદોલન શરૂ કરાય.
આ પણ વાંચો:
Kutch Border Security Failure: પાકિસ્તાન સાથેની સરહદ ખરેખર સુરક્ષીત છે? – thegujaratreport.com
Narendra Modi: મહાત્મા ગાંધીની કોંગ્રેસ નથી ઈટાલિયન ગાંધીની- MODI – thegujaratreport.com
