BZ Group Scam: ગુજરાતમાં મોટી ચર્ચા જાગાવનાર BZ ગૃપ (BZ Group Scam) કૌભાંડમાં મુખ્ય આરોપી ભૂપેન્દ્રસિંહ ઝાલા હાલ જેલમાં છે. જોકે 6 હજાર કરોડનું ફૂલેકું ફેરવનાર ભૂપેન્દ્રસિંહ ઝાલાનાં સમર્થન સાથે અરવલ્લીમાં (Aravalli) પોસ્ટર લાગતા ખળભળાટ મચી ગયો છે. મોડાસા-રાજેન્દ્રનગર રોડ પર ઠેર ઠેર ‘WE SUPPORT BZ’ લખાણ સાથેનાં 50 થી વધુ મસમોટા હોર્ડિંગ લગાવાયા છે. કેટલાક અજાણ્યા શખ્સો દ્વારા ભૂપેન્દ્રસિંહ ઝાલાનાં સમર્થનમાં આ પોસ્ટર લગાવવામાં આવ્યા છે.
મસમોટા લાગ્યા હોર્ડિંગ્સ
ગુજરાતભરમાં લોકોને વધુ વળતરની લાલચ આપીને પોંઝી સ્કીમોમાં રોકાણ કરાવી હજારો કરોડ રૂપિયાનું સૌથી મોટું કૌભાંડ આચરનારા BZ ગૃપના માલિક ભૂપેન્દ્રસિંહ ઝાલાની મહેસાણાથી ક્રાઇમ બ્રાન્ચ દ્વારા ધરપકડ કરવામાં આવી હતી. ત્યાર બાદ ભૂપેન્દ્રસિંહ ઝાલાએ (Bhupendrasinh Zala) કોર્ટમાં જામીન અરજી કરી હતી. જો કે, ભૂપેન્દ્રસિંહ ઝાલાની જામીન અરજીને કોર્ટે ફગાવી હતી આથી કૌભાંડી ભૂપેન્દ્રસિંહ ઝાલા હાલ જેલમાં છે. દરમિયાન, અરવલ્લીમાં કેટલાક ઇસમો દ્વારા ભૂપેન્દ્રસિંહ ઝાલાનાં સમર્થનમાં ઠેર ઠેર ‘WE SUPPORT BZ’ નાં લખાણ સાથે મસમોટા હોર્ડિંગ્સ લગાવાયા છે.
શું છે સમગ્ર ઘટના?
BZ ગ્રુપના ભૂપેન્દ્ર ઝાલાએ એકના ત્રણ ગણા નાણા કરવાની અને સામાન્ય રોકાણની સામે ઊંચા વળતરથી લાલચ આપીને 6000 કરોડનું કૌભાંડ આચાર્યું હોવાના ગાંધીનગર CIDની ટીમે આક્ષેપ કર્યા છે. સરકારી વકીલે ગ્રામ્ય કોર્ટમાં રજૂઆત કરી હતી કે, ભૂપેન્દ્ર ઝાલા પાસે ફક્ત સાબરકાંઠાના તલોદ પુરતુ જ નાણા ધીરનારનું લાયસન્સ છે. તેમ છતાં તેણે એજન્ટોની નિમણૂક કરી આખુ નેટવર્ક ઊભુ કર્યું હતું. કોઈપણ જાતના લાયસન્સ કે પરવાનગી વગર કેટલીક કંપનીઓની પણ રચના કરી છે. જેમાં એજન્ટો મારફતે લોકો પાસે કરોડો રૂપિયાનું રોકાણ કરાવ્યું છે. સરકારી વકીલે કોર્ટને એ પણ માહિતી આપી હતી કે ભૂપેન્દ્ર ઝાલાએ પોતાના અને પરિવારના નામે કરોડો રૂપિયાની સ્થાવર અને જંગમ મિલ્કતો ઊભી કરી છે. આ સમગ્ર મામલે તપાસ કરવામાં આવી રહી છે.
આ પણ વાંચોઃ DANG: સાપુતારામાં ભયંકર અકસ્માત, 5નાં મોત, 35 ઈજાગ્રસ્ત, જાણો યાત્રાળુઓ ક્યાના છે?
