એસોસિએશન ફોર ડેમોક્રેટિક રિફોર્મ્સ સહિત અનેક સંગઠનો દ્વારા દાખલ કરાયેલી મુખ્ય ચૂંટણી કમિશનર (CEC)ની નિમણૂક પ્રક્રિયાને સુપ્રિમ કોર્ટમાં પડકારી છે. તેઓ આજે(19 ફેબ્રુઆરી) ચાર્જ સંભાળે તે પહેલા અરજી પર કોર્ટમાં સુનાવણી થશે. એસોસિએશન ફોર ડેમોક્રેટિક રિફોર્મ્સ વતી એડવોકેટ પ્રશાંત ભૂષણ કોર્ટમાં પોતાનો કેસ રજૂ કરશે. અરજીમાં જણાવાયું છે કે બંધારણીય બેન્ચે 2023ના નિર્ણયમાં આપેલા નિર્દેશનું નિમણૂકમાં પાલન કરવામાં આવ્યું નથી. ઉલ્લેખનીય છે કે બંધારણીય બેન્ચે નિર્દેશ આપ્યો હતો કે CEC અને EC ની પસંદગી અને નિમણૂકો એક સમિતિ દ્વારા કરવામાં આવશે જેમાં મુખ્ય ન્યાયાધીશનો સમાવેશ થશે.
જ્ઞાનેશ કુમારને નવા CEC બનાવવામાં આવ્યા
સોમવારે ચૂંટણી કમિશનર જ્ઞાનેશ કુમારને નવા મુખ્ય ચૂંટણી કમિશનર તરીકે નિયુક્ત કરાયા છે. કાયદા મંત્રાલયે આ માહિતી આપી હતી. ચૂંટણી પંચના સભ્યોની નિમણૂક માટે નવા કાયદા હેઠળ નિયુક્ત થનારા કુમાર પ્રથમ મુખ્ય ચૂંટણી કમિશનર છે. તેમનો કાર્યકાળ 26 જાન્યુઆરી, 2029 સુધી રહેશે.
જ્ઞાનેશ કુમારની નિમણૂક અંગે વિવાદ
ચૂંટણી કમિશનરમાંથી મુખ્ય ચૂંટણી કમિશનર (CEC) તરીકે બઢતી પામેલા જ્ઞાનેશ કુમારની નિમણૂક અંગે વિવાદ ચાલી રહ્યો છે. લોકસભામાં વિપક્ષના નેતા રાહુલ ગાંધીએ નિમણૂક પ્રક્રિયા પર પ્રશ્નો ઉઠાવ્યા છે. ઉલ્લેખનીય છે કે સોમવારે સાંજે દિલ્હીમાં વડાપ્રધાન નરેન્દ્ર મોદી, કેન્દ્રીય ગૃહમંત્રી અમિત શાહ અને લોકસભામાં વિરોધ પક્ષના નેતા રાહુલ ગાંધીની અધ્યક્ષતામાં પસંદગી સમિતિની બેઠક મળી હતી. આમાં, મુખ્ય ચૂંટણી કમિશનર રાજીવ કુમારના અનુગામી તરીકે જ્ઞાનેશ કુમારને નવા CEC તરીકે ચૂંટવામાં આવ્યા હતા. નિમણૂક પછી, વિરોધ પક્ષ તરફથી ભારે વિરોધ થયો છે.
