Devbhoomi Dwarka : ગુજરાતની સૌથી મોટી નગરપાલિકાઓમાંની એક ઓખા નગરપાલિકા પર ભ્રષ્ટાચારના આરોપો લાગ્યા છે. ઓખાના સ્થાનિક અખબરમાં ઓખા દર્પણમાં જણાવ્યા મુજબ ઓખા નગર પાલિકાની બાંધકામ શાખાના અધિકારીઓના એક જવાબથી આ નગરપાલિકાની કામગીરી પર ગંભીર સવાલો ઉભા થયા છે. તા. 16-09-2025ના રોજ એક જાગૃત નાગરિકે માહિતી અધિકાર હેઠળ આરંભડા હાઈવે પર આવેલી હોટેલ દ્વારકેશના બાંધકામની મંજૂરીની નકલ અને સર્વે નં. 413 પૈકીના રહેણાંક હેતુ માટે બિન-ખેતીની જમીન પર હોટેલની મંજૂરી કેવી રીતે મળી તેની વિગતો માંગી હતી. તેના જવાબમાં નગરપાલિકાના અધિકારીએ જણાવ્યું કે, “આ માહિતી અમારા રેકોર્ડમાં ઉપલબ્ધ નથી.” આવા જવાબો નગરપાલિકાની બાંધકામ શાખાની નિયમિત પ્રથા બની ગયા હોય તેમ લાગે છે.
ઓખા નગરપાલિકાની બાંધકામ શાખામાં ભ્રષ્ટાચાર
ઓખા નગરપાલિકામાં ભ્રષ્ટાચારનું સંચાલન માત્ર 4-5 વ્યક્તિઓના હાથમાં કેન્દ્રિત છે. બાંધકામ શાખા ખાસ કરીને ભ્રષ્ટાચારનું કેન્દ્ર બની છે, જ્યાં નિયમોનું ઉલ્લંઘન અને ગેરકાયદેસર બાંધકામોને ખુલ્લું પ્રોત્સાહન આપવામાં આવે છે. છેલ્લા 20 વર્ષથી સત્તારૂઢ ભાજપના શાસનમાં આ ચોંકાવનારી પરિસ્થિતિ ચાલી રહી છે, જેમાં 80% નિર્ણયો લાંચ અને ભલામણના આધારે લેવાતા હોવાના આક્ષેપો છે.
મૂળભૂત સુવિધાઓ માટે નાગરિકોને વારંવાર કરવી પડે છે રજૂઆતો
નગરપાલિકાની સેવાઓ પણ નામની જ છે. રસ્તા, પાણી, વીજળી અને સફાઈ જેવી મૂળભૂત સુવિધાઓ માટે નાગરિકોને વારંવાર રજૂઆતો કરવી પડે છે, પરંતુ ચૂંટાયેલા સભ્યો અને અધિકારીઓ પર કોઈ અંકુશ નથી. ઘણા ચૂંટાયેલા સભ્યો ફક્ત કોન્ટ્રાક્ટના કામો મેળવવા માટે ચૂંટણી લડે છે, જેના કારણે પ્રજાની સમસ્યાઓનું નિરાકરણ થતું નથી. સફાઈની સ્થિતિ પણ દયનીય છે, જે મોટાભાગે ચૂંટાયેલા સભ્યોના વિસ્તારો પૂરતી મર્યાદિત રહે છે.આગામી ચૂંટણીની તૈયારીઓ વચ્ચે નગરપાલિકાના કર્મચારીઓ પણ ઉપરી અધિકારીઓના દબાણ હેઠળ પ્રચારમાં જોડાતા હોવાનું દેખાય છે.
હવે નાગરિકો કોર્ટનો સહારો લેવાની તૈયારીમાં
આરંભડાથી સુરજકરાડી જતા રસ્તાઓ પર ગેરકાયદેસર હોટેલોના બાંધકામો બેફામ ચાલી રહ્યા છે, પરંતુ તેને રોકવા વાળું કોઈ નથી. આ બાબતે રાજકોટના કમિશનર સુધી ફરિયાદો પહોંચી છે, પરંતુ ત્યાંથી પણ સમાધાનનો જવાબ મળે છે. આ સ્થિતિ સામે હવે નાગરિકો કોર્ટનો સહારો લેવાની તૈયારી કરી રહ્યા છે. આગામી દિવસોમાં સત્ય બહાર આવે તેવી આશા છે.
આ પણ વાંચો:
Barabanki Stampede: યુપીમાં મંદિર પરિસરમાં વીજકરંટ ફેલાતા ભાગદોડ, 2 ના મોત, 29 ઘાયલ
Sehore Ganesh Mandir: મંદિરની અંદર ખુલ્લેઆમ ગુંડાગીરી, હથિયાર સાથે ઘૂસેલા શખ્સે પૂજારીને આપી ધમકી
