Government Spying Controversy: ગુજરાત સહિત સમગ્ર દેશમાં લોકશાહીના નામે કઈ રીતે જાસૂસશાહી ચાલી રહી છે તેનો વધુ એક જીવંત પુરાવો મહેસાણામાં કોંગ્રેસની બેઠક દરમિયાન સામે આવ્યો છે. ઉત્તર ગુજરાતના કોંગ્રેસના વરિષ્ઠ આગેવાનો અને પ્રદેશ પ્રમુખ અમિત ચાવડાની હાજરીમાં ચાલી રહેલી એક ગુપ્ત સમીક્ષા બેઠકમાં સરકારનો એક જાસૂસ પત્રકારનો સ્વાંગ રચીને ઘૂસી ગયો હતો. પકડાયેલા આ સરકારી એજન્ટે કોઈ પણ જાતની પરવાનગી વગર બેઠકની ગુપ્ત વિડિયોગ્રાફી શરૂ કરી દીધી હતી જેથી વિપક્ષની આગામી રણનીતિ, નેતાઓની ગતિવિધિ અને ખાનગી ચર્ચાઓની વિગતો સત્તાધીશો સુધી પહોંચાડી શકાય. આ ઘટનાએ સાબિત કર્યું છે કે શાસક પક્ષ જનતાના પ્રશ્નો ઉકેલવાને બદલે વિપક્ષને દબાવવા માટે આખી સરકારી મશીનરીનો દુરુપયોગ કરી રહ્યો છે.
જાસૂસના મોબાઈલમાંથી નીકળ્યું સરકારી પાપોનું પોટલું અને અશ્લીલ વિડીયો
કોંગ્રેસના કાર્યકરોએ જ્યારે આ શંકાસ્પદ જાસૂસને રંગેહાથ પકડી પાડ્યો અને તેનો મોબાઈલ ફોન જપ્ત કર્યો, ત્યારે હોબાળો મચી ગયો હતો. આ ફોનની તપાસ પોલીસની હાજરીમાં કરવામાં આવી ત્યારે તેમાંથી માત્ર કોંગ્રેસની જાસૂસીના જ નહીં, પરંતુ ખુદ પોલીસ તંત્રમાં ચાલતા ભયંકર ભ્રષ્ટાચાર, હપ્તાખોરી અને કમિશન રાજના ચોંકાવનારા વિડીયો પુરાવા મળી આવ્યા હતા. એટલું જ નહીં, ફોનમાંથી ઉચ્ચ અધિકારીઓના કૌભાંડોની કડીઓ અને અત્યંત આપત્તિજનક, ન જોઈ શકાય તેવા અશ્લીલ વિડીયો પણ હાથ લાગ્યા હતા. આ ઘટના પર આક્રોશ વ્યક્ત કરતા કોંગ્રેસ પ્રમુખ અમિત ચાવડાએ મુખ્યમંત્રી અને ગૃહમંત્રીને સીધો સવાલ કર્યો છે કે, “ચોર, ઉચક્કા અને બુટલેગરો પાછળ આઈબી (IB) લગાવવાના બદલે વિપક્ષની પાછળ કેમ લગાડી છે?” દેશના વડાપ્રધાન અને ગૃહમંત્રી ગુજરાતના હોવા છતાં સરહદો પરથી કરોડોનું ડ્રગ્સ અને ગલી-ગલીમાં દારૂના કન્ટેનરો ઘૂસી જાય છે જેની આઈબીને ખબર નથી હોતી, પણ વિપક્ષી નેતા કોને મળે છે તેની પળેપળની માહિતિ રાખવામાં આખું પોલીસ તંત્ર મંડી પડ્યું છે.
૯૦ દિવસમાં ૯૩ હજાર ફોન ટેપિંગ: ગુજરાતમાં સર્વેલન્સની જૂની બીમારી
સત્તાના જોરે નાગરિકોની ખાનગી જીંદગીમાં ડોકિયું કરવાનો આ ખેલ ગુજરાતમાં કંઈ નવો નથી, તેની શરૂઆત વર્ષ ૨૦૦૧ થી જ થઈ ચૂકી હતી. આ જાસૂસીની પરાકાષ્ઠા વર્ષ ૨૦૧૩ માં જોવા મળી હતી જ્યારે માત્ર ૯૦ દિવસની અંદર ૯૩,૦૦૦ જેટલા ફોન કોલ્સના પ્રાઈવેટ ડેટા (CDR – કોલ ડિટેઇલ રેકોર્ડ્સ) ગેરકાયદેસર રીતે મેળવવામાં આવ્યા હતા. તત્કાલીન ડીજીપી અમિતાભ પાઠકે પણ આ વાત જાહેરમાં સ્વીકારવી પડી હતી કે પોલીસ દ્વારા મોટા પાયે આ ડેટા મેળવાયો હતો અને ભવિષ્યમાં મંજૂરી વગર આવા ડેટા નહીં મેળવવાની ખાતરી આપવી પડી હતી. સત્તા ટકાવી રાખવા માટે આખી રાજ્ય વ્યવસ્થાને કઈ રીતે જાસૂસીના મોડલ પર ગોઠવી દેવામાં આવી છે, આ આંકડા તેનો સચોટ પુરાવો છે.
સ્નૂપગેટ કૌભાંડ: જ્યારે અમિત શાહ અને મોદી એક યુવતીની જાસૂસીમાં ઘેરાયા
ગુજરાત સરકારના આ કાળા ઇતિહાસનું સૌથી મોટું પ્રકરણ એટલે ‘સ્નૂપગેટ’ (Snoopgate). જૂન ૨૦૧૩ માં તત્કાલીન આઈબી ઓફિસર જી. એલ. સિંગલે સીબીઆઈ (CBI) ને ૨૬૭ ઓડિયો રેકોર્ડિંગ્સ અને પેનડ્રાઈવ સોંપીને સણસણતો ખુલાસો કર્યો હતો. આ સત્તાવાર રેકોર્ડ મુજબ, તત્કાલીન ગૃહ રાજ્ય મંત્રી અમિત શાહે નરેન્દ્ર મોદીના સીધા આદેશથી ૪ ઓગસ્ટ ૨૦૦૯ થી ૧૦ સપ્ટેમ્બર ૨૦૦૭ દરમિયાન એક યુવતીની ગેરકાયદેસર અને ઘનિષ્ઠ જાસૂસી કરાવી હતી. આ ઓડિયો ટેપમાં પોલીસ અધિકારીઓ કંપનીઓ પાસેથી લોકેશન ટાવરના સેલ આઈડી મેળવીને પળેપળનો રિપોર્ટ સાહેબ સુધી પહોંચાડતા હોવાની કથિત વાતો સ્પષ્ટ સાંભળવા મળી હતી, જેણે દેશભરમાં ખળભળાટ મચાવ્યો હતો.
વિપક્ષથી લઈને પોતાના જ મંત્રીઓ સુધી… કોઈ સુરક્ષિત નથી!
આ જાસૂસી તંત્રની જાળ એટલી ખતરનાક છે કે શાસક પક્ષના પોતાના નેતાઓ પણ આનાથી બચી શક્યા નથી. ભૂતપૂર્વ મુખ્યમંત્રી કેશુભાઈ પટેલ, સુરેશ મહેતા, પૂર્વ ગૃહમંત્રી હરેન પંડ્યા અને ગોવર્ધન ઝડફિયા જેવા ભાજપના જ દિગ્ગજોએ પણ ભૂતકાળમાં સ્વીકાર્યું હતું કે તેમના ફોન ટેપ થઈ રહ્યા છે અને તેમની હિલચાલ પર નજર રખાય છે. વિધાનસભામાં ગોવર્ધન ઝડફિયાએ આ અંગે સત્તાવાર નિવેદન પણ આપ્યું હતું. બીજી તરફ વિપક્ષના નેતાઓ જેવા કે શંકરસિંહ વાઘેલા, અર્જુન મોઢવાડિયા અને પરેશ ધાનાણીએ પણ આક્ષેપો કર્યા હતા કે વિપક્ષના અવાજને દબાવવા, ધમકાવવા અને બ્લેકમેલ કરવા માટે તેમની ખાનગી માહિતી એકઠી કરવામાં આવે છે. ખુદ સરકારી મંત્રીઓએ પણ સ્વીકારવું પડ્યું છે કે સરકારને કોઈના વ્યક્તિગત જીવનમાં દખલ કરવાનો અધિકાર નથી, છતાં આ સિસ્ટમ બેરોકટોક ચાલે છે.
પેગાસસથી લઈને CIA ની કથિત ટ્રેનિંગનો સનસનીખેજ દાવો
આ જાસૂસી માત્ર સીડીઆર (CDR) સુધી સીમિત નથી રહી, પરંતુ ‘પેગાસસ’ જેવા ખતરનાક ઇઝરાયેલી સોફ્ટવેર દ્વારા નેતાઓ, પત્રકારો અને સામાજિક કાર્યકરોના મોબાઈલમાં ઘૂસીને તેમના મેસેજ, લોકેશન અને કેમેરા પર કબ્જો મેળવવાની કવાયત પણ કેન્દ્ર સ્તરે ચર્ચામાં રહી છે. આ ભયાનક વાતાવરણ વચ્ચે નરેન્દ્ર મોદી પર પુસ્તક લખનાર લેખિકા મધુ કિશ્વરે એક અત્યંત ગંભીર અને સનસનીખેજ દાવો કર્યો હતો કે ૧૯૯૩ માં નરેન્દ્ર મોદીએ અમેરિકાની કુખ્યાત જાસૂસી સંસ્થા સીઆઈએ (CIA) ની સહયોગી સંસ્થા ACYPL માં ટ્રેનિંગ લીધી હતી, જેનો એજન્ડા ત્રીજા વિશ્વના નેતાઓને શિખર પર લાવવાનો છે. મુખ્યમંત્રી બનતા પહેલા મોદીએ કમ સે કમ ૩૦ વખત અમેરિકાના પ્રવાસો કર્યા હોવાનો દાવો પણ આ વિવાદમાં ઉમેરો કરે છે.
૨૦૦૧ થી ૨૦૨૬: જાસૂસી ટેકનોલોજીનું ક્રૂર અપગ્રેડેશન
સમયની સાથે જનતાની સેવાની ટેકનોલોજી સુધરી કે નહીં, પણ જાસૂસીનું વિજ્ઞાન ચોક્કસ અધ્યતન બન્યું છે. ૨૦૦૧ માં બેઝિક કોલ ડેટાથી શરૂ થયેલી આ સફર ૨૦૦૫ માં IMEI ટ્રેકિંગ અને ૨૦૦૮ માં વ્યાપક CDR એનાલિસિસ સુધી પહોંચી. ત્યારબાદ ૨૦૧૦ માં સીએમએસ (CMS) યુગ, ૨૦૧૫ માં સોશિયલ મીડિયા ઇન્ટેલિજન્સ અને ૨૦૧૮ માં ડિજિટલ ફોરેન્સિક લેબની સ્થાપના કરવામાં આવી. વર્ષ ૨૦૨૦ માં યુપીઆઈ ફ્રોડ ટ્રેકિંગના નામે સર્વેલન્સ વધારાયું અને ૨૦૨૩ માં એઆઈ (AI) આધારિત વિશ્લેષણ શરૂ કરાયું. વર્તમાન વર્ષ ૨૦૨૬ માં ક્રિપ્ટોકરન્સી અને ડાર્ક વેબ ઇન્ટેલિજન્સના ઓઠા હેઠળ નાગરિકોના ડિજિટલ અસ્તિત્વ પર વોચ રાખવામાં આવી રહી છે. ટૂંકમાં, વર્ષ ૨૦૦૧ થી ૨૦૨૬ સુધીનો ઇતિહાસ સાક્ષી છે કે આ લોકતાંત્રિક સરકારો વાસ્તવમાં ‘જાસૂસોની સરકાર’ બનીને રહી ગઈ છે, જ્યાં જનતાની સુરક્ષા ગૌણ અને સત્તાની ચોકીદારી મુખ્ય છે.
આ પણ વાંચો:
Gujarat Jyotigram Scheme Reality: મોદીએ ફાંકા માર્યા તે ન થયું, જનતા પર ઝૂલમ – thegujaratreport.com
