Gujarat Local Body Election: ગુજરાત સ્થાનિક સ્વરાજ્યની ચૂંટણી ૨૦૨૬ના પરિણામો જાહેર થયા બાદ રાજકીય ગલિયારાઓમાં એક જ ચર્ચા છે કે ભાજપ પછી રાજ્યમાં બીજા નંબરનો પક્ષ કયો? આમ આદમી પાર્ટીના પ્રદેશ અધ્યક્ષ ઈસુદાન ગઢવીએ દાવો કર્યો છે કે તેમની પાર્ટી જ ગુજરાતમાં બીજા નંબરની શક્તિ છે અને જનતાને નવો વિકલ્પ મળી ગયો છે. જોકે, ચૂંટણીના વાસ્તવિક આંકડા અને બેઠકોની સંખ્યા કંઈક અલગ જ ચિત્ર રજૂ કરે છે. મહાનગરપાલિકાથી લઈને તાલુકા પંચાયત સુધીના પરિણામોમાં કોંગ્રેસ હજુ પણ મજબૂત દેખાઈ રહી છે.
મહાનગરપાલિકા અને નગરપાલિકામાં કોંગ્રેસનો દબદબો
૧૫ મહાનગરપાલિકાઓના પરિણામો પર નજર કરીએ તો કોંગ્રેસે ૨૬.૪૬ ટકા મત સાથે કુલ ૫૬ બેઠકો મેળવી છે, જ્યારે આમ આદમી પાર્ટીને ૧૦.૨૭ ટકા મત અને માત્ર ૬ બેઠકો મળી છે. ‘આપ’ સુરતમાં ૨૭ બેઠકોથી ઘટીને ૪ પર આવી ગઈ છે. તેવી જ રીતે ૮૪ નગરપાલિકાઓમાં કોંગ્રેસ ૩૦.૬૮ ટકા મત અને ૪૫૯ બેઠકો સાથે બીજા ક્રમે છે, જ્યારે ‘આપ’ પાસે માત્ર ૧૮ બેઠકો અને ૪.૮૯ ટકા મત છે. આ આંકડાઓ સાબિત કરે છે કે શહેરી અને અર્ધ-શહેરી વિસ્તારોમાં કોંગ્રેસ હજુ પણ વિપક્ષ તરીકે પોતાની પકડ જાળવી રાખવામાં સફળ રહી છે.
પંચાયતી રાજમાં ‘આપ’ નો ઉભરો પણ કોંગ્રેસ આગળ
જિલ્લા પંચાયતોની ૧૦૯૦ બેઠકોમાંથી કોંગ્રેસે ૧૩૬ બેઠકો જીતી છે, જ્યારે ‘આપ’ને ૫૮ બેઠકો મળી છે. જોકે, એક નોંધપાત્ર બાબત એ છે કે આમ આદમી પાર્ટીએ નર્મદા જિલ્લા પંચાયત કબજે કરી છે, જ્યારે કોંગ્રેસ એક પણ જિલ્લા પંચાયત જીતી શકી નથી. તાલુકા પંચાયતોમાં પણ કોંગ્રેસ ૩૨.૮૯ ટકા મત અને ૧૦૫૦ બેઠકો સાથે ‘આપ’ (૪૦૭ બેઠકો) કરતા ઘણી આગળ છે. પરંતુ, ‘આપ’ ૧૨ તાલુકા પંચાયતોમાં શાસન કરશે, જે ગુજરાતમાં કોઈ ત્રીજા પક્ષ માટે એક નવો વિકલ્પ હોવાના સંકેત આપે છે.
વિશ્લેષકોનો મત: કોંગ્રેસ જ હજુ મુખ્ય વિપક્ષ
રાજકીય વિશ્લેષકોના મતે, ગુજરાતમાં હજુ પણ કોંગ્રેસ જ મુખ્ય વિપક્ષી પાર્ટી છે. કોંગ્રેસ પાસે સમગ્ર ગુજરાતમાં પથરાયેલું સંગઠન અને કાર્યકર્તાઓ છે, જ્યારે ‘આપ’ માત્ર ચોક્કસ પૉકેટ્સ અને ચહેરાઓ પર આધારિત છે. જોકે, નિષ્ણાતો માને છે કે ૨૦૨૭ની વિધાનસભાની સેમીફાઇનલ ગણાતી આ ચૂંટણીમાં વિપક્ષોની હાલત દયનીય છે. જો કોંગ્રેસ અને ‘આપ’ ગઠબંધન કરીને લડે તો જ ભાજપને મજબૂત ટક્કર આપી શકાય તેમ છે, પરંતુ નેતાઓ વચ્ચેની પરિપક્વતાનો અભાવ આ ગઠબંધનને મુશ્કેલ બનાવી રહ્યો છે.
આ પણ વાંચો:
