Hayli Gubbi volcano eruption: ઇથોપિયાના જ્વાળામુખીની અસર ભારત સુધી ફેલાઈ ગઇ છે અને રાજસ્થાન સહિત દિલ્હીના આકાશમાં રાખના વાદળો છવાઈ ગયા છે.10,000 વર્ષ બાદ ફાટેલા ઇથોપિયાના હેલી ગુબ્બી જ્વાળામુખીમાંથી નીકળેલી રાખના વાદળી આકાશ માર્ગે ભારતમાં પહોંચતા ખાસ કરીને હવાઈ મુસાફરી પ્રભાવિત થઈ છે.અનેક ફ્લાઈટ પ્રભાવિત થતા અસંખ્ય મુઝફરો અટવાયા છે.DGCA દ્વારા આ માટે એડવાઈઝરી જાહેર કરવામાં આવી છે.હવામાન વિભાગ પણ રાખના વાદળ પર નજર રાખી રહ્યુ છે.
રાખના વાદળો સૌથી પહેલાં રાતા સમુદ્ર, તે બાદ યમન-ઓમાન, જે બાદ અરબી સમુદ્ર થઈને ગુજરાત સુધી આવ્યાં હતાં.જે બાદ રાજસ્થાન, દિલ્હી, ઉત્તર પ્રદેશ, નેપાળ થઈને તે ચીન તરફ જશે. જેથી 26 નવેમ્બરથી તેની અસર ભારત પર રહેશે નહીં.ગુજરાત પરથી આ વાદળો પસાર થઈ ગયાં છે અને હવામાન વિભાગની માહિતી પ્રમાણે સામાન્ય રીતે આની અસર સીધી જ આપણે થતી નથી. તેની સૌથી વધારે અસર વિમાની સેવાને થાય છે.
આ વાદળ લાલ સમુદ્રને પાર કરીને લગભગ ૧૩૦ કિલોમીટર પ્રતિ કલાકની ઝડપે ભારત તરફ આગળ વધ્યુ હતું જે હવે દિલ્હી સુધી પહોંચ્યું છે જેનાથી પહેલેથી જ ભયાનક પ્રદૂષણનો સામનો કરી રહેલા દિલ્હીના આકાશમાં રાખના વાદળો છવાઈ ગયા છે.
આ રાખના વાદળ ભારતના પશ્ચિમ રાજસ્થાનમાં જોધપુર અને જેસલમેર સહિતદિલ્હી, હરિયાણા અને રાજસ્થાનના મોટા ભાગોમાં ફેલાઈ ગયા છે.આ રાખના વાદળ જમીનથી 25,000 થી 45,000 ફૂટની ઊંચાઈ પર છે,સમગ્ર વિસ્તારમાં ઝેરી ધુમ્મસ છવાઈ ગયું છે.
CPCB (સેન્ટ્રલ પોલ્યુશન કંટ્રોલ બોર્ડ) અનુસાર,દિલ્હીમાં હવા ગુણવત્તા સૂચકાંક (AQI) 402 નોંધાયો છે જે “ગંભીર” શ્રેણીમાં આવે છે. આ સ્તરે, હવાને અત્યંત જોખમી માનવામાં આવે છે.દિલ્હીમાં કટોકટી જાહેર કરી નોકરી કરતા કર્મચારીઓને ઘરેથી ઓફીસના કામો કરવા સૂચના અપાઈ છે ત્યારે રાખના વાદળો છવાતા દિલ્હીમાં હવે હવાઈ સેવા પ્રભાવિત થઈ છે.ભારત માટે આ પરિસ્થિતિ ખૂબ જ ગંભીર છે કારણ કે રાખના નાના કણો વિમાનના એન્જિનને ગંભીર નુકસાન પહોંચાડી શકે છે. પરિણામે, નાગરિક ઉડ્ડયન મહાનિર્દેશાલય (DGCA) એ તમામ ભારતીય એરલાઇન્સને તાત્કાલિક ચેતવણી જારી કરી છે
■પરિસ્થિતિની ગંભીરતાને જોતા ડિરેક્ટોરેટ જનરલ ઓફ સિવિલ એવિએશન (DGCA) એ તમામ એરપોર્ટ અને એરલાઈન્સ માટે તાત્કાલિક એડવાઈઝરી જાહેર કરી છે. જેમાં નીચે મુજબના પગલાં લેવા આદેશ અપાયો છે
●રૂટ બદલો: એરલાઈન્સને અસરગ્રસ્ત હવાઈ ક્ષેત્ર અને ઊંચાઈથી દૂર રહીને ફ્લાઈટ ઓપરેટ કરવા જણાવાયું છે.
●એક્સ્ટ્રા ફ્યુઅલ: વિમાનોને ડાયવર્ઝન માટે તૈયાર રહેવા વધારાનું ઈંધણ સાથે રાખવા આદેશ અપાયો છે.
●મોનિટરિંગ: એરપોર્ટ્સને રનવે અને ટેક્સીવે પર રાખના થર જામ્યા છે કે નહીં તેનું સતત નિરીક્ષણ કરવા અને જરૂર પડે તો ઓપરેશન બંધ કરવા સૂચના છે.
●પાઈલટ રિપોર્ટિંગ: જો પાઈલટને કેબિનમાં સલ્ફરની ગંધ આવે કે એન્જિનમાં ફેરફાર જણાય તો તુરંત રિપોર્ટ કરવો પડશે.
●ટેકનિકલ ચેક: અસરગ્રસ્ત વિસ્તારમાંથી પસાર થયેલા વિમાનોના એન્જિન અને બોડીનું લેન્ડિંગ બાદ ફરજિયાત ચેકિંગ કરવાનું રહેશે.
અત્રે ઉલ્લેખનીય છે કે આફ્રિકાના આફર રિફ્ટમાં આવેલા ઇથિયોપિયામાં હાયલી ગુબ્બી નામનો જ્વાળામુખી ૧૦,૦૦૦ વર્ષ કરતાં વધુ સમય બાદ ઇતિહાસમાં પ્રથમ વખત ફાટ્યો હતો. આ જ્વાળામુખીમાંથી લાવા નહિવત પ્રમાણમાં બહાર નીકળ્યો છે, પરંતુ આ સ્થાન સલ્ફર પડ ધરાવતી જગાએ પ્રચંડ શક્તિશાળી રીતે ફાટ્યો હોવાથી હવામાં લગભગ ૪૫,૦૦૦ ફૂટ સુધી રાખ, ધૂળ, સલ્ફર, કાચ, પથ્થરો ઉડ્યા હતા. આ જોખમી વાદળો સખત પવનને કારણે ૩૬ કલાકમાં જ ૧૨૦ કિ.મી.ની ઝડપે ભારતના પશ્ચિમ ભાગ તરફ આવી પહોંચ્યા છે. જેના કારણે આ જ સમયગાળામાં ગુજરાત,રાજસ્થાનસહિતના ભાગોમાં હવામાનમાં સામાન્ય ફેરફાર જોવા મળ્યો છે અને ઠંડીમાં થોડો ઘટાડો તેમજ શિયાળુ પવન અને વાતાવરણમાાં ઓચિંતા પવન સાથે રાખ અને ધૂળને કારણે સમગ્ર વાતાવરણ ધૂળિયું બની ગયું છે.
ઇથોપિયાના અફાર પ્રદેશમાં આ જ્વાળામુખી ફાટ્યો હતો. ઇતિહાસમાં ક્યારેય સક્રિય ન હોવાનો રેકોર્ડ ધરાવતો આ જ્વાળામુખી અચાનક ફાટતા વૈજ્ઞાનિકો પણ ચોંકી ગયા છે. નજીકનું આફડેરા ગામ સંપૂર્ણપણે રાખના થર નીચે દટાઈ ગયું છે. જોકે, સદનસીબે કોઈ જાનહાનિના સમાચાર નથી.
આ પણ વાંચો:
Rupee Hits Record Low Against Dollar: ભારતના ઇતિહાસમાં પ્રથમવાર રૂપિયો આટલો નબળો પડયો:મોંઘવારી વધશે
