Trump: ઈરાન ઉપર હુમલાની શરૂઆત ઈઝરાયેલે કરી અને ત્યારબાદ અમેરિકાએ પણ હુમલા શરૂ કર્યા અને આ હુમલાઓમાં ઇરાનના સુપ્રીમો ખામેનેઈનું મોત થઈ જતા ઈરાન હવે આરપારની લડાઈ લડી લેવાના મૂડમાં છે અને ઈરાન મરણીયું બની એકસાથે જ્યાં જ્યાં જે દેશોમાં અમેરિકાના સૈન્ય અડ્ડા છે તેવા 8 દેશોમાં હુમલા શરૂ કરતાં પારાવાર ખુવારી થઈ છે.આજે યુદ્ધના ત્રીજા દિવસે ઈરાનમાં 555 નાગરિકોના મોત થયાની ઇરાનની રેડ ક્રેસેન્ટ સોસાયટીએ પૃષ્ટિ કરી છે.
ઇરાને બહેરીન અને કુવૈતમાં અમેરિકાના ઠેકાણાઓ તથા એમ્બેસી પર સતત હુમલા ચાલુ રાખ્યા છે.આ બધા વચ્ચે કુવૈતમાં અમેરિકન ફાઈટર જેટ F-15 ક્રેશ થઈ ગયું છે. પ્લેન તૂટી પડતાં અમેરિકાને 100 મિલિયન ડૉલરનું નુકસાન થયાનો અંદાજ સેવાઇ રહ્યો છે.કુવૈતમાં અમેરિકાને મોટું નુકસાન થયાના અહેવાલ છે, કુવૈૈૈૈૈત ખાતેની અમેરિકન એમ્બેસીને ઇરાને ટાર્ગેટ કરી હુમલો કરતા એમ્બેસીમાં આગ લાગી ગઇ હતી.કુવૈતે કહ્યું- આજે ઘણા અમેરિકી વિમાનો ક્રેશ થયા.
કુવૈતના રક્ષા મંત્રાલયના પ્રવક્તાએ જણાવ્યું હતું કે આજે સવારે ઘણા અમેરિકી લશ્કરી વિમાનો ક્રેશ થયા હતા. જોકે, બધા ક્રૂ સભ્યો સુરક્ષિત છે. તેમને તાત્કાલિક બચાવી લેવામાં આવ્યા હતા અને હોસ્પિટલમાં લઈ જવામાં આવ્યા હતા. ડોકટરોની એક ટીમ તેમની સારવાર કરી રહી છે.અધિકારીઓએ જણાવ્યું હતું કે આ મામલે અમેરિકી સૈન્ય સાથે વાત કરવામાં આવી છે અને સંયુક્ત રીતે જરૂરી પગલાં લેવામાં આવ્યા છે. અકસ્માતનું કારણ જાણવા માટે તપાસ ચાલી રહી છે.
ઈરાન આટલી ભયાનક હદે મુકાબલો કરશે તેની ટ્રમ્પને કલ્પના પણ ન હતી અને હવે યુદ્ધની ગંભીરતાને લઈને વોશિંગ્ટન પોસ્ટ (The Washington Post) ના અહેવાલમાં કહેવામાં આવ્યું છે કે પેન્ટાગોન અને ટ્રમ્પ વહીવટીતંત્રના સભ્યોમાં ચિંતા છે કે ઈરાન સાથેનું આ યુદ્ધ “નિયંત્રણ બહાર” જઈ શકે છે. અમેરિકી સૈન્ય નેતાઓ ચિંતિત છે કે જો આ લડાઈ લાંબી ચાલીતો અમેરિકાના હવાઈ સંરક્ષણ (Air Defense) ના સાધનો અને ઈન્વેન્ટરીની અછત જેવા સવાલ ઉભા થઇ શકે છે.અમેરિકા સામે ઇરાને જોરદાર ટક્કર આપતા આખરે નાટો અને યુરોપિયન દેશો અમેરિકાને સાથ આપવા દોડી આવ્યા છે અને યુદ્ધમાં ઇરાનને ઘેરી હુમલો કરવાની યોજના બનાવી છે.બીજી તરફ દુનિયામાં એકલા પડી ગયેલા ઇરાનની પડખે એકમાત્ર લેબેનોનનું હિઝબુલ્લાહ સંગઠન મદદે આવ્યું છે અને તેણે પણ ઈઝરાયલ અને અમેરિકાના ઠેકાણાઓને નિશાન બનાવતા રોકેટ અને મિસાઈલ હુમલા કરવાનું શરુ કરી દીધું છે જેના લીધે ઈઝરાયલની મુશ્કેલી વધી ગઈ હતી. જોકે હવે ઈઝરાયલે તેમના હુમલાનો જવાબ આપતા લેબેનોનની રાજધાની બેરુતમાં હુમલા શરૂ કર્યા છે.
ઇરાને સાઉદી અરેબિયાની મોટી તેલ રિફાઇનરી રાસ તનૂરા પર હુમલો કર્યો છે. આ રિફાઇનરી સાઉદીની સરકારી તેલ કંપની સાઉદી અરામકોની છે. રોઇટર્સના અહેવાલ મુજબ, હુમલા બાદ રિફાઇનરી બંધ કરી દેવામાં આવી છે.આ રિફાઇનરીની ક્ષમતા લગભગ પ્રતિ દિન 5.5 થી 6 લાખ બેરલ આસપાસ માનવામાં આવે છે.
ઓઇલ એક્સપોર્ટ ટર્મિનલ રાસ તનૂરા વિશ્વના સૌથી મોટા ઓફશોર ઓઇલ લોડિંગ ટર્મિનલોમાંનું એક છે. અહીંથી મોટા તેલ ટેન્કરોમાં ક્રૂડ ઓઇલ ભરીને અમેરિકા, એશિયા અને યુરોપ સહિત ઘણા દેશોને મોકલવામાં આવે છેઆજ રિફાઇનરી ઉપર સાઉદીની અર્થ વ્યવસ્થા ટકેલી છે પર હુમલો કરી ઇરાને કમ્મર તોડવાનો પ્રયાસ કર્યો છે જેનાથી અંધાધૂંધી ફેલાઈ ગઈ છે.
ઈરાનની સેના અને મીડિયા રિપોર્ટ્સ મુજબ, તેમણે મધ્ય પૂર્વમાં 14 જેટલા અમેરિકી સૈન્ય ઠેકાણાઓ પર મિસાઈલ અને ડ્રોન હુમલા કર્યા છે, જેમાં 500 જેટલા અમેરિકન સૈનિકોના મોત થયા હોવાનો અને ‘USS અબ્રાહમ લિંકન’ એરક્રાફ્ટ કેરિયર પર હુમલો કર્યો હોવાનો દાવો કર્યો હતો.જોકે,અમેરિકાએ ઇરાનના દાવા ફગાવી દીધા છે.આમ,હવે ઈરાન મરણીયું બની એક સાથે અનેક દેશોને ટક્કર આપી રહ્યું છે ત્યારે આ ચિનગારીની આગ ક્યાંક વિશ્વયુદ્ધમાં ફેરવાઈ જાય તેવા એંધાણ વર્તાઈ રહયા છે.
