મધ્યપ્રદેશ(MP)ના મુરેનાથી એક ચોંકાવનારો કિસ્સો પ્રકાશમાં આવ્યો છે. અહીં એક બળાત્કારનો આરોપી સ્થાનિક લોકો અને પોલીસના મારથી બચવા વીજળીના ટાવર પર ચઢી ગયો હતો અને એક હાઇ વોલ્ટેજ ડ્રામા કર્યો હતો. આ સમગ્ર ઘટનાનો એક વીડિયો પણ સામે આવ્યો છે, જેમાં યુવક વીજળીના ટાવર પર ચઢતો જોઈ શકાય છે. જોકે, પોલીસ ઘટનાસ્થળે પહોંચી ગઈ અને ગ્રામજનોની મદદથી યુવકને ટાવર પરથી નીચે ઉતારી આરોપીની ધરપકડ કરી લીધી હતી.

શું છે આખો મામલો?

પોલીસને માહિતી મળી હતી કે એક યુવાન આ વિસ્તારના કુટરાવલી ગામમાંથી પસાર થતી હાઇ ટેન્શન પાવર લાઇન પર ચઢી રહ્યો છે. પોલીસ ઘટનાસ્થળે પહોંચે તે પહેલાં જ સેંકડો ગ્રામજનો એકઠા થઈ ગયા હતા. પીડિતાના પરિવારે જણાવ્યું કે આરોપી યુવકનું નામ સોનુ જાટવ છે અને તે ધોબીપુરા પોલીસ સ્ટેશન ચિન્નોનીનો રહેવાસી છે.

પીડિતાના પરિવારે જણાવ્યું કે કુટરાવલી ગામની એક મહિલા ખેતરમાં તેના સસરાને ખાવાનું આપવા જઈ રહી હતી. દરમિયાન, ખારડિયા નાળા પાસે, એક માસ્ક પહેરેલા યુવકે મહિલાને પકડી લીધી અને તેના પર બળાત્કાર ગુજાર્યો હતો. આ દરમિયાન આરોપી યુવકે મહિલા પર હુમલો પણ કર્યો.

યુવકના ચુંગાલમાંથી છૂટવા મહિલાએ બૂમાબૂમ કરી હતી. જે બાદ મહિલાના સસરા અને ખેતરમાં કામ કરતા અન્ય ગ્રામજનો ઘટનાસ્થળે પહોંચ્યા અને આરોપી યુવકને પકડવા દોડ્યા હતા. જોકે તેમનાથી બચાવવા માટે, યુવક હાઇ-ટેન્શન વીજળીના ટાવર પર ચઢી ગયો હતો.

આરોપી યુવક 3 કલાક સુધી નાટક કરતો રહ્યો હતો. ગામલોકોએ તેનો વીડિયો બનાવીને સોશિયલ મીડિયા પર વાયરલ કર્યો. મહિલાની ફરિયાદ પર કૈલારસ પોલીસે આરોપી યુવક વિરુદ્ધ બળાત્કારનો કેસ નોંધ્યો છે.

પોલીસે શું કહ્યું?

આ ઘટના અંગે કૈલારસ પોલીસ સ્ટેશનના ડેપ્યુટી ઇન્સ્પેક્ટર રામ મંત્ર ગુપ્તાએ જણાવ્યું હતું કે, ‘કૈલારસ પોલીસ સ્ટેશનને માહિતી મળી હતી કે કુત્રાવલી ગામમાં કોઈ વિવાદને કારણે એક વ્યક્તિ ટાવર પર ચઢી ગયો છે, ત્યારબાદ કૈલારસ પોલીસ ઘટનાસ્થળે પહોંચી અને તે વ્યક્તિને સુરક્ષિત રીતે નીચે ઉતારી.’ આ વિવાદના સંદર્ભમાં, એક મહિલા દ્વારા ટાવર પર ચઢી ગયેલા આરોપી વિરુદ્ધ બળાત્કારનો કેસ નોંધવામાં આવ્યો છે. (ઇનપુટ: ઉપેન્દ્ર ગૌતમ)