Donald Trump: અમેરિકાના રાષ્ટ્રપતિ ડોનાલ્ડ ટ્રમ્પે ગ્રીનલેન્ડના સમર્થનમાં આવેલા યુરોપિયન દેશો ઉપર ટેરીફ લગાવવાની ધમકી આપ્યા બાદ ભારે તણાવ ઉભો થયા પછી ટ્રમ્પે અચાનક આજે ગુરુવારે (ભારતીય સમય મુજબ) જણાવ્યું હતું કે યુરોપિયન દેશો ઉપર અમેરિકાએ 1 ફેબ્રુઆરીથી ટેરિફ લાદવાની કરેલી અગાઉની જાહેરાત પાછી ખેંચી લીધી છે અને ટેરીફ લગાવશે નહિ.
ડોનાલ્ડ ટ્રમ્પે જાહેરાત કરી હતી કે તેઓ સાથી દેશો પરના ટેરિફ રદ કરી રહ્યા છે, કારણ કે તેઓ અને નાટો નેતાઓ ગ્રીનલેન્ડની સુરક્ષા પર “ભવિષ્યના કરાર માટે ફ્રેમવર્ક” પર સંમત થયા છે, આ ટેરિફ 1 ફેબ્રુઆરીથી યુરોપિયન દેશો પર લાદવામાં આવનાર હતા,ટ્રમ્પે જણાવ્યું હતું કે નાટો સેક્રેટરી જનરલ માર્ક રુટ સાથે ખૂબ જ સકારાત્મક બેઠક બાદ આ નિર્ણય લેવામાં આવ્યો છે.
ટ્રમ્પે કહ્યું કે નાટોના મહાસચિવ માર્ક રુટ્ટે સાથેની બેઠક બાદ ગ્રીનલેન્ડ અને સમગ્ર આર્કટિક ક્ષેત્રને લગતા ભવિષ્યના કરાર માટે એક “ફ્રેમવર્ક” (માળખું) તૈયાર થઈ ગયું છે. તેમણે લખ્યું, “જો આ સમજૂતી થઈ જશે, તો તે યુનાઇટેડ સ્ટેટ્સ સહિત નાટો દેશો માટે ખૂબ જ ફાયદેમંદ રહેશે.
આ બેઠક બાદ આઠ યુરોપિયન દેશો પર લાગુ થનાર 10% ટેરિફ (જે ભવિષ્યમાં 25% સુધી વધી શકતો હતો) રદ કરી દેવામાં આવ્યો છે.
● યુએસ-નાટો સહયોગ પર ભાર
યુએસ રાષ્ટ્રપતિએ જણાવ્યું હતું કે પ્રસ્તાવિત માળખું યુએસ અને તેના નાટો સાથી દેશો બંનેના શ્રેષ્ઠ હિતમાં રહેશે.
આ જ કારણ છે કે તેમણે ટેરિફ લાદવાનો નિર્ણય પાછો ખેંચી લીધો. તેમણે એમ પણ કહ્યું કે ગ્રીનલેન્ડ અંગે “ગોલ્ડન ડોમ” અંગે વાટાઘાટો ચાલી રહી છે. ટ્રમ્પના મતે, આ વાટાઘાટોનું નેતૃત્વ ઉપરાષ્ટ્રપતિ જે.ડી. વાન્સ, સેક્રેટરી ઓફ સ્ટેટ માર્કો રુબિયો અને ખાસ દૂત સ્ટીવ વિટકોફ કરશે. જરૂર પડ્યે અન્ય અધિકારીઓ જોડાશે, અને બધા સીધા તેમને રિપોર્ટ કરશે.
● ડેનમાર્કની પ્રતિક્રિયા
ડેનમાર્કના વિદેશ પ્રધાન લાર્સ લોકે રાસમુસેને ટ્રમ્પના નિર્ણયનું સ્વાગત કર્યું. તેમણે કહ્યું કે ગ્રીનલેન્ડ અંગે યુએસ મહત્વાકાંક્ષાઓ વચ્ચે આ પગલું એક સકારાત્મક સંકેત છે. રાસમુસેને જવાબ આપતા કહ્યું, “દિવસ શરૂ થયો તેના કરતા ઘણો સારો અંત આવ્યો છે.”
● નાટો પ્રમુખે વિશ્વાસ વ્યક્ત કર્યો
નાટો સેક્રેટરી જનરલ માર્ક રુટેએ બેઠક દરમિયાન ટ્રમ્પને ખાતરી આપી હતી કે કટોકટીની સ્થિતિમાં યુએસ સાથી દેશો વોશિંગ્ટન સાથે મજબૂત રીતે ઉભા રહેશે. 9/11 પછી નાટોની ભૂમિકાનો ઉલ્લેખ કરતા, તેમણે કહ્યું કે સાથી દેશો અફઘાનિસ્તાનમાં યુએસ દળો સાથે લડ્યા હતા, જ્યાં કેટલાક સૈનિકો ક્યારેય પાછા ફર્યા નહીં. ટ્રમ્પે આ ખાતરીની પ્રશંસા કરી અને રુટને વિશ્વસનીય ગણાવ્યા, જોકે તેમણે એ પણ સંકેત આપ્યો કે ગ્રીનલેન્ડ પરના તણાવથી સાથી દેશોની પ્રતિબદ્ધતા અંગે કેટલીક શંકાઓ ઉભી થઈ હતી.
● ટ્રમ્પ ગ્રીનલેન્ડ પર લશ્કરી નિયંત્રણ મામલે કરી પીછેહઠ
દાવોસમાં તેમના ભાષણ દરમિયાન, ટ્રમ્પે ગ્રીનલેન્ડના લશ્કરી નિયંત્રણ વિશેના તેમના અગાઉના વક્તવ્યથી પણ પોતાને દૂર રાખ્યા. તેમણે ફરી એકવાર ગ્રીનલેન્ડને યુએસ રાષ્ટ્રીય સુરક્ષા માટે મહત્વપૂર્ણ ગણાવ્યું અને કહ્યું કે આર્કટિક ક્ષેત્રમાં વધતી વૈશ્વિક સ્પર્ધાને કારણે તેનું વ્યૂહાત્મક મહત્વ નોંધપાત્ર રીતે વધ્યું છે.
આમ,ગ્રીનલેન્ડના કબ્જા મામલે ટ્રમ્પનો યુરોપિયન દેશોએ કરેલો વિરોધ અને ટ્રમ્પની ટેરીફ ધમકી સામે વળતા ટેરીફની સાથી દેશોની ચીમકી બાદ હવે ટ્રમ્પ નરમ પડ્યા છે અને બળજબરીથી કઈ નહિ થાય અને નાટો સંગઠન તૂટવા સહિત અનેક મુસીબતો સામે દેખાતા હમણાં તો ટ્રમ્પે પીછેહઠ કરવામાં શાણપણ દાખવ્યું છે.
આ પણ વાંચો:
Police recruitment: ગુજરાત પોલીસમાં ભરતી માટે થઈ જાવ રેડી; PSI-LRDની શારીરિક કસોટીની તારીખો જાહેર!
