Sabarkantha: રાજ્યમાં ચોમાસાની શરુઆતમાં જ મેઘરાજા મનમુકીને વરસી રહ્યા છે પહેલા દક્ષિણ ગુજરાતમાં ધમાકેદાર બેટીંગ કર્યા બાદ હવે ઉત્તર ગુજરાતનો વારો આવ્યો છે. સાબરકાંઠામાં અનેક વિસ્તારોમાં ધોધમાર વરસાદ વરસ્યો હતો જેમાં સાબરકાંઠાના વડાલીમાં ભારે વરસાદના કારણે અનેક જગ્યાએ વરસાદી પાણી ભરાયા છે, ચાર ઇંચ વરસાદથી ખેતરો બેટમાં ફેરવાયા છે, તો ઈડર, વડાલી, ખેડબ્રહ્મા સહિત ગ્રામ્યમાં વરસાદ નોંધાયો છે, કડિયાદરા, ચોટાસણ, ચોરવાડમાં વરસાદના કારણે નદીનાળા છલકાયા છે. સાબરકાંઠાના વડાલીમાં ભારે વરસાદ સાબરકાંઠાના વડાલીમાં ભારે વરસાદના કારણે ખેતરો બેટમાં ફેરવાયા છે, અહીં બે કલાકમાં ચાર ઇંચ વરસાદ વરસ્યો છે. ત્યારે ભારે વરસાદથી સ્થાનિકોને હાલાકી પડી રહી છે, વડાલી અંડરબ્રિજમાં પાણી ભરાતા સ્થાનિકોને હાલાકી પડી રહી છે, પાણી ભરાવાથી વાહનચાલકોને હાલાકી પડી રહી છે તેમજ ખેડબ્રહ્મા પંથકમાં 24 કલાકમાં 5 ઇંચ વરસાદ ખાબકયો છે છે આ સાથે ઇડર અને પ્રાંતિજમાં બે ઇંચ કરતા વધુ વરસાદ નોંધાયો છે.
હરણાવ નદી પરનો ખેડવા ડેમ ઓવરફ્લો
સાબરકાંઠા જિલ્લાના ખેડબ્રહ્મામાં ભારે વરસાદ વરસ્યો છે. અહીં 4 કલાકમાં 5 ઈંચથી વધુ વરસાદ ખાબક્યો હોવાથી હરણાવ નદી પરનો ખેડવા ડેમ ઓવરફ્લો થયો છે. અહીં ડેમનો એક દરવાજો 1 ફૂટ ખોલીને 450 ક્યુસેક પાણી છોડવામાં આવ્યું છે. પાણીની આવક વધતા વધુ 2 દરવાજા ખોલવાની તૈયારી છે. મહત્વનું છે કે, ખેડવા ડેમનો દરવાજો ખોલતા હરણાવ નદી બેકાંઠે વહેતી થઈ છે.
સાબરકાંઠા ઈડર ખેડબ્રહ્મા સ્ટેટ હાઇવે રોડ પાણી ભરાયા
ભારે વરસાદના કારણે સાબરકાંઠા ઈડર ખેડબ્રહ્મા સ્ટેટ હાઇવે રોડ પાણી ભરાયા છે, વડાલી રેલવે અંડર બ્રિજમાં પાણી ભરાતા વાહન ચાલકોને હાલાકી પડી રહી છે, વાહનો પાણીમાં બંધ પડી ગયા છે, સવારના સમયે મુખ્ય માર્ગ મોટાભાગના વાહન ચાલાકો રાહદારીઓ સહિત મુસાફરોને હાલાકી પડી રહી છે, એક તરફ હિંમતનગર ખેડબ્રહ્મા રેલ્વે લાઈનનું નવીનીકરણનું કામ ચાલી રહ્યું છે ત્યારે, બીજી તરફ અંડરબ્રિજમાં પાણીના નિકાલ માટે અત્યાર સુધીમાં ચોક્કસ કામગીરી નથી કરાઈ.
ખેડબ્રહ્માની હરણાવ નદીમાં ભારે ઘોડાપૂર આવ્યું
ખેડબ્રહ્મા તાલુકામાં મોડી રાત્રે વરસી રહેલા ધોધમાર વરસાદથી હરણાવ નદીમાં ઘોડાપૂર આવ્યું છે ત્યારે હરણાવ નદી ભયજનજક સપાટીથી વહી રહી હોવાથી નીચાણવાળા ગામોને એલર્ટ કરાયા છે, અને નદી કિનારે નહી જવા માટે સૂચના આપવામાં આવી છે, વધુ વરસાદના કારણે તંત્ર પણ એલર્ટ મોડમાં છે.
અહેવાલ : ઉમંગ રાવલ
