Donald Trump: અમેરિકાના રાષ્ટ્રપતિ ડોનાલ્ડ ટ્રમ્પે રશિયા પાસેથી તેલ ખરીદતા દેશો પર કડક પ્રતિબંધો લાદવા મામલે એક બિલને મંજૂરી આપી છે જેમાં ભારત અને ચીન પર અમેરિકાના ટેરિફમાં નોંધપાત્ર વધારો થઈ શકે છે,જે 500 ટકા સુધી પહોંચી શકે છે, આ પગલું યુક્રેન સંઘર્ષ વચ્ચે રશિયા પર દબાણ લાવવા માટેનું છે.
■ આ બિલ ઉપર આવતા અઠવાડિયે મતદાન થઈ શકે છે.
રિપબ્લિકન સેનેટર લિન્ડસે ગ્રેહામે સોશિયલ મીડિયા પર જાહેરાત કરી કે રાષ્ટ્રપતિ ટ્રમ્પે બિલને મંજૂરી આપી દીધી છે. તેમણે કહ્યું કે હવે, આવતા અઠવાડિયે સંસદમાં આ બિલ પર મતદાન થઈ શકે છે.
■ ભારત,ચીન અને બ્રાઝિલ પર વધશે દબાણ
સેનેટર ગ્રેહામના મતે, આ બિલ રાષ્ટ્રપતિ ટ્રમ્પને સસ્તા રશિયન તેલ ખરીદવાનું બંધ કરવા માટે ભારત, ચીન અને બ્રાઝિલ જેવા દેશો પર દબાણ લાવવાની સત્તા આપશે.ગયા વર્ષે, ટ્રમ્પે ભારતમાંથી આયાત થતી વસ્તુઓ પર 25 ટકા કર લાદ્યો હતો અને રશિયાથી ખરીદાતા તેલ પર વધારાનો 25 ટકા કર લાદ્યો હતો. આનાથી કેટલીક ભારતીય વસ્તુઓ પર કુલ કર 50 ટકા થઈ ગઈ અને બંને દેશો વચ્ચેના સંબંધોમાં ખટાશ આવી ગઈ છે.
■ અમેરિકા અને ચીન વચ્ચે પણ સંબંધો બગડ્યા છે.
અમેરિકા અને ચીન વચ્ચે ટેરીફ મામલે તણાવ વધી ગયો છે. અમેરિકાએ ચીની માલ પર ૧૪૫ ટકા સુધીનો કર લાદ્યો હતો, જેના જવાબમાં ચીને પણ અમેરિકન માલ પર ૧૨૫ ટકા કર લાદ્યો હતો.
■ ભારત અંગે પણ ટ્રમ્પનું નિવેદન આવ્યું હતું.
તાજેતરમાં ટ્રમ્પે ભારત પર નવા કર લાદવાની શક્યતાનો સંકેત આપ્યો હતો, એરફોર્સ વનમાં પત્રકારો સાથે વાત કરતા તેમણે કહ્યું કે વડા પ્રધાન નરેન્દ્ર મોદી જાણે છે કે હું નાખુશ છું. ટ્રમ્પે કહ્યું, પીએમ મોદી એક સારા માણસ છે, પરંતુ મને ખુશ રાખવો પણ ખૂબ મહત્વપૂર્ણ છે,હવે ખૂબ જ ટૂંક સમયમાં ટેરીફમાં વધારો કરવામાં આવશે.
■ ચોખા ઉપર પણ કર લાદવાની ધમકી આપી.
ગયા મહિને, ટ્રમ્પે ભારતીય ચોખા પર નવો કર લાદવાની ધમકી આપી હતી. અમેરિકન ખેડૂતોએ વ્હાઇટ હાઉસને ભારત, ચીન અને થાઇલેન્ડ દ્વારા સસ્તા અનાજ વેચવાની ફરિયાદ કર્યા પછી આ વાત સામે આવી છે.
■ વાટાઘાટો અટકી પડી છે.
ભારત અને અમેરિકા વચ્ચે કરવેરા વાટાઘાટો હાલમાં અટકી પડી છે,અમેરિકા ઇચ્છે છે કે ભારત અમેરિકન કૃષિ માલ પરના કરવેરા ઘટાડે.ભારત સરકારે સ્પષ્ટપણે કહ્યું છે કે તે તેના ખેડૂતો અને ડેરી ક્ષેત્રની સુરક્ષા સાથે કોઈ સમાધાન કરશે નહીં.
આ પણ વાંચો:
Police recruitment: ગુજરાત પોલીસમાં ભરતી માટે થઈ જાવ રેડી; PSI-LRDની શારીરિક કસોટીની તારીખો જાહેર!
