Ahmedabad: લલ્લા બિહારી અને તેના પુત્રનું ચંડોળામાં રિકન્સ્ટ્રક્શન, જુઓ

Ahmedabad: અમદાવાદના ચંડોળા તળાવ વિસ્તારમાં ગેરકાયદે વર્ષોથી બાંગ્લાદેશીઓની વસાહત ઉભી કરતાં લલ્લા બિહારી અને તેના પુત્રની પોલીસે ધરપકડ કરી લીધી છે. આજે તેમનું ચંડોળા ખાતે લઈ જઈ રિકન્સ્ટ્રક્શન કરાયું છે. જે જગ્યાએ ફાર્મ હાઉસ હતુ ત્યા પણ લઈ જવામાં આવ્યા છે.

લલ્લા બિહારીને રાજસ્થાનથી પકડી અમદાવાદ લવાયો છે. તે દબાણો હટાવવાની કામગીરી ચાલુ થાય તે પહેલા જ ભાગી ગયો હતો. જ્યારે તેનો પુત્ર ઝડપાઈ ગયો હતો. ત્યારે પિતા-પુત્રને ઝડપી પાડી અમદવાદ ક્રાઈમ બ્રાંચે ઝડપી લઈ કોર્ટમાં રજૂ કર્યા હતા. જેમના 14 દિવસના રિમાન્ડ માગ્યા હતા. જો કે કોર્ટે 6 દિવસના રિમાન્ડ મંજૂર કર્યા હતા. ત્યારે આજે ઘટનાનું રિકન્સ્ટ્રક્શન કરવા માટે પોલીસ લલ્લા બિહારી અને તેના પુત્ર ફતેહ મોહમ્મદને ચંડોળા વિસ્તારમાં લઈ ગઈ હતી. જ્યા તેમનું રિકન્સટ્રક્શન કરાયું હતુ. ત્યારબાદ ક્રાઈમ બ્રાન્ચ દ્વારા પરત લઈ જવામાં આવ્યા હતા.

પિતા પુત્ર પર શું છે આરોપ?

લલ્લા બિહારી, જેનું અસલી નામ મહેમૂદ પઠાણ છે, તે અમદાવાદના ચંડોળા તળાવ વિસ્તારમાં ગેરકાયદે બાંગ્લાદેશી ઘૂસણખોરોને આશરો આપવા અને ગેરકાયદે પ્રવૃત્તિઓ ચલાવવા માટે કુખ્યાત છે. તેની સામે ખોટા દસ્તાવેજો બનાવવા, ગેરકાયદે વીજળી કનેક્શન આપવા, વ્યાજખોરી, દેહવ્યાપાર અને ગેરકાયદે જમીન પચાવી પાડવાના આરોપો છે. તેણે ચંડોળા તળાવ પાસે આલીશાન ફાર્મહાઉસ અને અન્ય ગેરકાયદે બાંધકામો કર્યા હતા, જેને અમદાવાદ મ્યુનિસિપલ કોર્પોરેશન દ્વારા તોડી પાડવામાં આવ્યા.

તેના પુત્ર, ફતેહ મોહમ્મદ પઠાણ, પણ આ ગેરકાયદે પ્રવૃત્તિઓમાં સામેલ હતો. ફતેહની 29 એપ્રિલ, 2025ના રોજ અમદાવાદ ક્રાઇમ બ્રાન્ચ દ્વારા ધરપકડ કરવામાં આવી હતી, જ્યારે લલ્લા બિહારી ફરાર હતો. બાદમાં, 2 મે, 2025ના રોજ લલ્લા બિહારીની રાજસ્થાનના બાંસવાડા જિલ્લાના મોટી ઝેર ગામમાંથી ધરપકડ કરવામાં આવી હતી.

આ ઉપરાંત, લલ્લા બિહાહરી પર આરોપ છે કે તેણે બાંગ્લાદેશી ઘૂસણખોરોને ખોટા આધાર કાર્ડ અને અન્ય ઓળખપત્રો બનાવી આપ્યા, જેના માટે તે દરેક વ્યક્તિ પાસેથી 1.5 થી 3.5 લાખ રૂપિયા વસૂલતો હતો. તેની ગેરકાયદે પ્રવૃત્તિઓથી દર મહિને 10-20 લાખ રૂપિયાની કમાણી થતી હતી. પોલીસ તેની સંપત્તિ અને રાજકીય નેતાઓ સાથેના સંબંધોની પણ તપાસ કરી રહી છે.