Ahmedabad NPCI Fraud Case: અમદાવાદ સાયબર ક્રાઈમે એક એવા હાઈપ્રોફાઈલ ફ્રોડનો પર્દાફાશ કર્યો છે જેમાં ભેજાબાજ ઠગો સરકારી અધિકારી બનીને લોકોને લૂંટતા હતા. આ કેસમાં મિનિસ્ટ્રી ઓફ ફાયનાન્સ અને NPCI (નેશનલ પેમેન્ટ્સ કોર્પોરેશન ઓફ ઈન્ડિયા) ના ઉચ્ચ અધિકારી તરીકેની ખોટી ઓળખ આપીને એક નિર્દોષ નાગરિક પાસેથી ૪૮ લાખ રૂપિયા પડાવી લેવામાં આવ્યા હતા. સાયબર ક્રાઈમની ટીમે આ મામલે તપાસ હાથ ધરીને ઉત્તર પ્રદેશના ગાઝિયાબાદથી બે શખ્સો, સુમિતકુમાર કોલી અને આશુ અગ્રવાલની ધરપકડ કરી છે. આ ઘટના ફરી એકવાર સાબિત કરે છે કે સાયબર ગુનેગારો હવે સામાન્ય લોકોનો વિશ્વાસ જીતવા માટે સરકારી સંસ્થાઓના નામે બનાવટી દસ્તાવેજોનો સહારો લઈ રહ્યા છે.
વીમા પોલિસીમાં નફાની લાલચ આપી જાળ બિછાવી
છેતરપિંડીની શરૂઆત વીમા પોલિસીની મેચ્યોરિટીથી થઈ હતી. ફરિયાદીની એલઆઈસી (LIC) પોલિસી ૨૦૨૨માં મેચ્યોર થઈ ગઈ હતી અને તેમને પૈસા પણ મળી ગયા હતા. પરંતુ ૨૦૨૬માં આ ગેંગે તેમનો સંપર્ક કર્યો અને લાલચ આપી કે તમારા રોકાણ પર હજુ વધારાનો નફો મળવાનો બાકી છે. ઠગોએ એવી વાર્તા ઘડી કે અગાઉ તમારા જે પૈસા ફ્રોડમાં ફસાયા હતા, તે હવે પરત મળી શકે તેમ છે કારણ કે ગુનેગારો પકડાઈ ગયા છે. તેમણે ફરિયાદીને વિશ્વાસ અપાવ્યો કે તેમના ૧ કરોડ ૪૮ લાખ રૂપિયા વધારાના પડ્યા છે. આ રકમ મેળવવા માટે પ્રોસેસિંગ ફી અને વિવિધ ટેક્સના નામે ટુકડે-ટુકડે ૪૮ લાખ રૂપિયા પડાવી લેવામાં આવ્યા હતા.
બનાવટી ઈમેઈલ અને ઓફિશિયલ દસ્તાવેજોનો ખેલ
લોકોને છેતરવા માટે સુમિત કુમારે પોતે NPCI ના સિનિયર મેનેજર હોવાનું નાટક કર્યું હતું. ફરિયાદીનો વિશ્વાસ જીતવા માટે તેણે મિનિસ્ટ્રી ઓફ ફાયનાન્સ, સુપ્રીમ કોર્ટ અને સીબીઆઈ (CBI) જેવી પ્રતિષ્ઠિત સંસ્થાઓના નામે બનાવટી ઈમેઈલ એડ્રેસ બનાવ્યા હતા અને વોટ્સએપ દ્વારા ખોટા પત્રો મોકલ્યા હતા. આરોપી સુમિત અગાઉ ૨૦૨૦માં એલઆઈસીના કોલ સેન્ટરમાં કામ કરતો હોવાથી તેની પાસે ગ્રાહકોનો જૂનો ડેટા હતો, જેનો ઉપયોગ તેણે આ ગુનામાં કર્યો હતો. સરકારી લિસ્ટમાં નામ હોવાની વાત સાંભળીને કોઈપણ વ્યક્તિ સરળતાથી તેમની જાળમાં ફસાઈ જાય તેવી આખી વ્યૂહરચના તેમણે તૈયાર કરી હતી.
સીમકાર્ડ એક્ટિવેશન અને બાયોમેટ્રિક ફ્રોડની ગંભીરતા
આ કેસનો બીજો આરોપી આશુ અગ્રવાલ સીમકાર્ડ વેચવાનું કામ કરતો હતો અને તેણે જ આ ગુના માટે ગેરકાયદે સીમકાર્ડ પૂરા પાડ્યા હતા. તે રસ્તા પર છત્રી નાખીને સીમકાર્ડ વેચતો હતો અને જ્યારે કોઈ ગ્રાહક તેની પાસે કાર્ડ લેવા કે પોર્ટેબિલિટી માટે આવે, ત્યારે તેમની જાણ બહાર તેમના આધાર અને બાયોમેટ્રિક ડેટાનો ઉપયોગ કરીને વધારાના સીમકાર્ડ એક્ટિવેટ કરી લેતો હતો. તેણે જાન્યુઆરીથી અત્યાર સુધીમાં ૪૦થી વધુ આવા સીમકાર્ડ મુખ્ય આરોપીને પૂરા પાડ્યા હતા. પોલીસ અને તંત્રએ જનતાને સલાહ આપી છે કે સીમકાર્ડ હંમેશા અધિકૃત સ્ટોર પરથી જ ખરીદવા અને વારંવાર અંગૂઠાના નિશાન કે બાયોમેટ્રિક માંગતા ફેરિયાઓથી સાવધ રહેવું.
