CUET UG Re Exam: નવી દિલ્હીમાં નેશનલ ટેસ્ટિંગ એજન્સી (NTA) ની ઘોર બેદરકારી અને વહીવટી લાપરવાહીનો વધુ એક કિસ્સો પ્રકાશમાં આવ્યો છે. કોમન યુનિવર્સિટી એન્ટ્રન્સ ટેસ્ટ (CUET-UG) 2026 ના આયોજન દરમિયાન શનિવારે (30 મે, 2026) ના રોજ સરકારી પરીક્ષા વ્યવસ્થાના લીરેલીરા ઊડી ગયા. પરીક્ષાની પહેલી શિફ્ટ ઘણા સેન્ટર્સ પર ગંભીર ટેકનિકલ ખામીના કારણે નિર્ધારિત સમય પર શરૂ જ થઈ શકી નહોતી. આ વહીવટી અણઘડતાના કારણે હજારો ઉમેદવારો અને તેમના વાલીઓને કલાકો સુધી ભારે માનસિક પ્રતાડના અને અનિશ્ચિતતાનો સામનો કરવો પડ્યો હતો. સ્થિતિ એટલી હદે બગડી ગઈ હતી કે જે વિદ્યાર્થીઓ કડક સુરક્ષા વચ્ચે બાયોમેટ્રિક વેરિફિકેશન પૂરું કરી ચૂક્યા હતા, તેમાંથી 3,765 ઉમેદવારો સત્તાવાળાઓની લાપરવાહીથી કંટાળીને પરીક્ષા આપ્યા વગર જ સેન્ટર્સ પરથી પાછા ફર્યા હતા.
NTA એ સરકારી બચાવ પ્રયુક્તિઓ શરૂ કરી
અહેવાલ અનુસાર, શનિવારે સવારની શિફ્ટ સંપૂર્ણપણે ખોરવાઈ જવા પાછળનું મુખ્ય કારણ એક ગંભીર ટેકનિકલ સમસ્યા હતી, જેનું નિવારણ લાવવામાં સરકારી તંત્ર કલાકો સુધી નિષ્ફળ રહ્યું. ભારે હોબાળા બાદ છેવટે NTA એ સત્તાવાર રીતે સ્વીકારવું પડ્યું કે કેટલાક પરીક્ષા કેન્દ્રો પર ટેકનિકલ ખામીના કારણે પરીક્ષા સમયસર શરૂ થઈ શકી નહોતી. હંમેશની જેમ પોતાની આબરૂ બચાવવા એજન્સીએ એવો દાવો કર્યો કે મોટાભાગના સેન્ટર્સ પર સમસ્યા દૂર કરીને મોડેથી પણ પરીક્ષા આયોજિત કરી લેવામાં આવી હતી. પરંતુ વાસ્તવિકતા એ છે કે મોટી સંખ્યામાં માસૂમ વિદ્યાર્થીઓ કલાકો સુધી પરીક્ષા શરૂ થવાની રાહ જોયા વગર, સિસ્ટમથી કંટાળીને કેન્દ્રો છોડીને ચાલ્યા ગયા હતા.
Update on CUET (UG) 2026 — 30 May, Shift 1
Earlier today, some centres faced a technical glitch that delayed the start of Shift 1. We know this was stressful, and we’re sorry for the anxiety it caused.
The technical service provider, TCS iON, has been asked to conduct a…
— National Testing Agency (@NTA_Exams) May 30, 2026
ભોગ બનેલા વિદ્યાર્થીઓ માટે આંખ આડા કાન કર્યા પછી ફરીથી પરીક્ષાનું ગાજર લટકાવતી એજન્સી
ચારેબાજુથી થૂ-થૂ થતાં આખરે NTA એ જાહેરાત કરવી પડી છે કે જે 3,765 ઉમેદવારો પરીક્ષા આપ્યા વિના પાછા ફર્યા છે, તેમના માટે વિશેષ રૂપે ફરીથી પરીક્ષા આયોજિત કરવામાં આવશે. એજન્સીએ આ વ્યવસ્થાને ‘એક વખતની વિશેષ તક’ તરીકે ગણાવી છે, પરંતુ આ પુનઃપરીક્ષા ક્યારે લેવાશે તેની તારીખ કે અન્ય કોઈ ચોક્કસ વિગતો જાહેર કરવાની તસ્દી હજુ સુધી લીધી નથી. વારંવાર પરીક્ષાઓ રદ થવા કે પાછી ઠેલાવાના કારણે વિદ્યાર્થીઓનું ભવિષ્ય અંધકારમય બની રહ્યું છે અને સરકારી એજન્સીઓ માત્ર કાગળ પર આશ્વાસનો આપીને પોતાની જવાબદારીમાંથી હાથ ઊંચા કરી રહી છે.
ટેકનિકલ પાર્ટનર TCS નો બચાવ, સત્તાવાર દાવાઓ અને જમીની હકીકત વચ્ચે મોટો વિરોધાભાસ
આ પરીક્ષાના ટેકનિકલ આયોજનની જવાબદારી સંભાળતી ખાનગી કંપની ટાટા કન્સલ્ટન્સી સર્વિસીસ (TCS) પણ હવે સવાલોના ઘેરામાં છે. કંપનીના ચીફ એક્ઝિક્યુટિવ ઓફિસર (CEO) કે. કૃતિવાસને આ ગંભીર બેદરકારીને ‘નાની ટેકનિકલ સમસ્યા’ ગણાવીને ઢાંકવાનો પ્રયાસ કર્યો હતો. તેમણે દાવો કર્યો કે સવારની શિફ્ટમાં ખામીના કારણે પરીક્ષા શરૂ થવામાં માત્ર બે કલાકનું મોડું થયું હતું અને ટેકનિકલ ટીમે તેને ઝડપથી સુધારી લીધી હતી. કંપનીએ એવો પણ દાવો કર્યો છે કે આનાથી પરીક્ષાની નિષ્પક્ષતા કે ગુપ્તતા પર કોઈ અસર પડી નથી, પરંતુ હજારો વિદ્યાર્થીઓનો કિંમતી સમય અને માનસિક શાંતિ છીનવાઈ ગઈ તેનું શું, તેનો કોઈ જવાબ તેમની પાસે નથી.
સોશિયલ મીડિયા પર વાલીઓનો રોષ ફાટી નીકળ્યો
સરકારી અને કોર્પોરેટ દાવાઓથી વિપરીત, સોશિયલ મીડિયા પર પીડિત વિદ્યાર્થીઓ અને તેમના વાલીઓએ તંત્રના જૂઠાણાંનો પર્દાફાશ કર્યો છે. વાલીઓના જણાવ્યા અનુસાર, પરીક્ષા શરૂ થવામાં બે કલાક નહીં, પરંતુ ત્રણથી ચાર કલાક જેટલો લાંબો સમય લાગ્યો હતો અને ત્યાં સુધી વિદ્યાર્થીઓને બંધ રૂમમાં ગોંધી રાખવામાં આવ્યા હતા. ઇન્ટરનેટ પર આવા ઘણા વીડિયો વાયરલ થયા છે, જેમાં ઉશ્કેરાયેલા ઉમેદવારો અને લાચાર વાલીઓ પરીક્ષા કેન્દ્રોની બહાર ઊભા રહીને એજન્સીના નબળા મેનેજમેન્ટ અને સત્તાવાળાઓ વિરુદ્ધ ઉગ્ર વિરોધ પ્રદર્શન અને સૂત્રોચ્ચાર કરતા જોવા મળી રહ્યા છે.
બીજી શિફ્ટના સમયમાં ફેરફાર કરીને એજન્સીએ વિદ્યાર્થીઓને ભારે મુશ્કેલીમાં મૂક્યા
પોતાની ભૂલો છુપાવવા માટે NTA એ સોશિયલ મીડિયા પ્લેટફોર્મ ‘X’ પર એક નિવેદન જાહેર કરીને જણાવ્યું કે સમસ્યા ઉકેલાઈ ગઈ છે અને પ્રભાવિત વિદ્યાર્થીઓને નુકસાન ન થાય તે માટે પૂરો વધારાનો સમય આપવામાં આવ્યો હતો. પરંતુ આ અંધાધૂંધીની અસર બપોરની શિફ્ટ પર પણ પડી. એજન્સીએ છેલ્લી ઘડીએ બપોરની શિફ્ટના સમયમાં ફેરફાર કરવો પડ્યો, જેના કારણે દૂર-દૂરથી આવેલા વિદ્યાર્થીઓને એન્ટ્રી પ્રોસેસ અને પરીક્ષા શરૂ થવાના નવા સમય મુજબ કલાકો સુધી કેન્દ્રોની બહાર તડકામાં અટવાવું પડ્યું હતું.
સમાન તકો આપવાના બણગા ફૂંકતી સરકારી શિક્ષણ નીતિના દાવાઓ ખોટા સાબિત થયા
ઉલ્લેખનીય છે કે, નેશનલ એજ્યુકેશન પોલિસી 2020 હેઠળ વર્ષ 2022 માં CUET પરીક્ષાની શરૂઆત કરવામાં આવી હતી. આ પરીક્ષા પાછળ સરકારે એવો દાવો કર્યો હતો કે દેશભરની સેન્ટ્રલ, સ્ટેટ, ડીમ્ડ અને પ્રાઇવેટ યુનિવર્સિટીઓમાં એડમિશન માટે એક સમાન પ્લેટફોર્મ મળશે અને અંતરિયાળ કે ગ્રામીણ વિસ્તારોના ગરીબ વિદ્યાર્થીઓને સમાન તક ઉપલબ્ધ કરાવાશે. પરંતુ વારંવાર સર્જાતી આવી વહીવટી અરાજકતા એ સાબિત કરે છે કે મોટા-મોટા દાવાઓ માત્ર કાગળ પર જ સીમિત છે અને જમીની સ્તરે સરકારી તંત્ર સંપૂર્ણપણે લાચાર છે.
છેલ્લા કેટલાક વર્ષોથી NTA ની કલંકિત કથા: પેપર લીક અને ભ્રષ્ટાચારનું કેન્દ્ર
દેશની સૌથી મોટી પરીક્ષા એજન્સી હોવાનો દાવો કરતી NTA નો ટ્રેક રેકોર્ડ છેલ્લા કેટલાક વર્ષોથી અત્યંત કલંકિત રહ્યો છે. વર્ષ 2024 માં દેશવ્યાપી કરોડો વિદ્યાર્થીઓના ભવિષ્ય સાથે જોડાયેલી NEET-UG પરીક્ષાના પ્રશ્નપત્ર લીક થવાના ગંભીર આરોપો લાગ્યા હતા, જેની તપાસ હાલ સેન્ટ્રલ બ્યુરો ઓફ ઇન્વેસ્ટિગેશન (CBI) કરી રહી છે. આ કૌભાંડમાં સીબીઆઈ અત્યાર સુધીમાં ડઝનબંધ વગદાર લોકો વિરુદ્ધ ચાર્જશીટ પણ દાખલ કરી ચૂકી છે, જે શિક્ષણ વ્યવસ્થામાં વ્યાપેલા ભ્રષ્ટાચારની સાબિતી છે.
આ વર્ષે પણ NEET-UG 2026 પરીક્ષા રદ કરવી પડી
ચાલુ વર્ષે પણ તંત્ર પોતાની આદતો સુધારવામાં નિષ્ફળ રહ્યું છે. ગત 3 મેના રોજ લેવાયેલી NEET-UG 2026 ની પરીક્ષામાં ફરીથી પેપર લીકની વ્યાપક ફરિયાદો ઉઠ્યા બાદ સરકારે આખી પરીક્ષા રદ કરીને ફરીથી યોજવાનો શરમજનક નિર્ણય લેવો પડ્યો છે. આ મામલામાં શિક્ષણ મંત્રાલયના આદેશ પર સીબીઆઈ તપાસ ચાલી રહી છે અને અત્યાર સુધીમાં 13 જેટલા આરોપીઓની ધરપકડ કરવામાં આવી છે. આ ઘટનાઓ દર્શાવે છે કે સરકાર દેશના લાખો યુવાનોના ભવિષ્યને સુરક્ષિત રાખવામાં સદંતર નિષ્ફળ ગઈ છે.
સમગ્ર શૈક્ષણિક મૂલ્યાંકન પ્રણાલી ખાડે ગઈ
CUET ની આ તાજી ટેકનિકલ ખામી એવા સમયે સામે આવી છે જ્યારે સેન્ટ્રલ બોર્ડ ઓફ સેકન્ડરી એજ્યુકેશન (CBSE) ની 12મા ધોરણની ઉત્તરવહીઓની ઓન-સ્ક્રીન માર્કિંગ (OSM) મૂલ્યાંકન સિસ્ટમ પણ ભારે વિવાદોમાં ઘેરાયેલી છે. એક પછી એક સામે આવી રહેલા શૈક્ષણિક કૌભાંડો અને વહીવટી ખામીઓએ દેશની સમગ્ર પરીક્ષા સંચાલન અને મૂલ્યાંકન પ્રક્રિયાઓની વિશ્વસનીયતા પર મોટો પ્રશ્નાર્થચિહ્ન મૂકી દીધો છે. દેશના કરોડો વિદ્યાર્થીઓ અને વાલીઓ આજે આક્રોશ સાથે સવાલ પૂછી રહ્યા છે કે, અબજો રૂપિયાનું બજેટ ધરાવતી આ સરકારી એજન્સીઓ આખરે ક્યારે સુધરશે? પેપર લીક, ટેકનિકલ ખામીઓ અને વહીવટી અરાજકતા એ આપણી સરકારી વ્યવસ્થાનો કાયમી નિયમ બની ગઈ છે અને વિદ્યાર્થીઓનું ભવિષ્ય રોળાઈ રહ્યું છે.
આ પણ વાંચો:
Narendra Modi: મહાત્મા ગાંધીની કોંગ્રેસ નથી ઈટાલિયન ગાંધીની- MODI – thegujaratreport.com
Kutch Border Security Failure: પાકિસ્તાન સાથેની સરહદ ખરેખર સુરક્ષીત છે? – thegujaratreport.com
