Dwarka: દ્વારકા જિલ્લાના ઓખામાં કોર્ટ મેરેજના માત્ર ત્રણ મહિનામાં લગ્નજીવનના તણાવને કારણે યુવકે પોતાના પત્નીને પેટ્રોલ છાંટીને આગ લગાવી દીધી, જેના કારણે દંપતી સહિત તેમને બચાવવા દોડી આવેલી સાસુ પણ ગંભીર રીતે દાઝી ગયા હતા. આ કરુણ બનાવે વિસ્તારમાં ચકચાર મચી ગયો છે, જ્યારે ત્રણેયને વધુ સારવાર માટે જામનગરની જી.જી. હોસ્પિટલ ખસેડવામાં આવ્યા છે.
પોલીસ તપાસ અનુસાર, મારુતિ નગર પાછળના રામદેવપીર મંદિર પાસે રહેતી મીનાબેન ચૌહાણની પુત્રી ઉર્મિલાબેનએ ત્રણ મહિના પહેલા કાર્બન સોસાયટીમાં રહેતા જય સુરેશભાઈ બારીયા સાથે કોર્ટમાં લગ્ન કર્યા હતા. લગ્ન પછી સંબંધોમાં વિવાદ વધતાં ઉર્મિલાબેન છેલ્લા ૧૦ દિવસથી માતાના ઘરે પરત ફરી હતી. મંગળવારે, તા. ૧૧મી, જય પેટ્રોલના કેન સાથે ઘરે આવ્યો અને પ્રથમ પોતાના શરીર પર પેટ્રોલ છાંટી દીવાસળી ચાંપી આગ લગાવી લીધી. ત્યારબાદ તેણે ઉર્મિલાને પણ બાથમાં ભીડી લીધી, જેથી બંને ભડભડ સળગવા લાગ્યા.આ દ્રશ્ય જોઈને મીનાબેન તેમને અલગ કરવાનો પ્રયાસ કરતાં તેઓ પણ આગના કારણે દાઝી પડી. ઘરનો કેટલોક સામાન પણ બળીને ખાક થયો. તાત્કાલિક પડોશીઓની મદદથી ત્રણેયને સ્થાનિક હોસ્પિટલમાં ખસેડવામાં આવ્યા, પરંતુ ગંભીર સ્થિતિને કારણે જામનગર રેફર કરાયા.
વધુમાં, ઉર્મિલાબેનના અગાઉના લગ્નથી એક બાળક પણ છે.મીનાબેનની ફરિયાદ પર ઓખા મરીન પોલીસે જય વિરુદ્ધ ભારતીય ન્યાયસંહિતાની વિવિધ કલમો હેઠળ ગુનો નોંધ્યો છે. નાયબ પોલીસ અધિક્ષક સાગર રાઠોડના માર્ગદર્શન હેઠળ પી.એસ.આઈ. આર.આર. ઝરુએ તપાસ શરૂ કરી છે. આ બનાવે લગ્નજીવનના તણાવ અને માનસિક આરોગ્યના મુદ્દા પર ચર્ચા જગાવી છે, જે સમાજ માટે ચિંતાનો વિષય બન્યો છે.
આ પણ વાંચો:
Amreli:રાજ્ય સરકારના સહાય પેકેજથી ભાજપમાં ભડકો, વરિષ્ઠ નેતાએ આપી દીધું રાજીનામું
chhotaudepur: “મને ડરાવી-ધમકાવીને ભાજપમાં જોડવાની કોશિશ કરી” AAP ધારાસભ્ય ચૈતર વસાવાનો મોટો ખુલાસો
Kirti Patel: કીર્તિ પટેલ સામે PASA હેઠળ કાર્યવાહી , વડોદરા જેલમાં ધકેલાઈ, ખંડણી અને ધમકીના 9 કેસો
