Gondal: અલ્પેશ કથીરિયાનો એકબાજુ વિરોધ, બીજી બાજુ સમર્થન

Gondal: ગણેશ જાડેજાના પડકાર બાદ અલ્પેશ કથીરિયા રાજકોટના ગોંડલમાં પહોંચ્યા છે. જ્યા તેમના પર હુમલાનો પ્રયાસ કરાયો છે. ગાડીના કાચ તોડ્યા છે. પોલીસની હજરીમાં કથીરિયાની કાર પર હુમલો થયો છે. જેથી ગોંડલમાં તણાવભરી સ્થિતિ છે. ગણેશ અને જયરાજસિંહના લગભગ બે હજાર સમર્થકો કથીરિયાનો વિરોધ કરી રહ્યા છે.

જિગીષા પટેલ અને અલ્પેશ કથીરિયાએ આંબેડકરની પ્રતિમાને ફૂલહાર કર્યા

જિગીષા પટેલ અને અલ્પેશ કથીરિયાએ કડિયા લાઈનમાં આંબેડકર ચોકમાં ડોક્ટર બાબા સાહેબ આંબેડકરની પ્રતિમાને હાર પહેરાવ્યો છે. ઉલ્લેખનીય છે, કાર પર હુમલો થયા બાદ કથીરિયા અને જીગીષા પટેલની સુરક્ષામાં વધારો કરાયો છે. ઉલ્લેખનીય છે કે ગણેશ જાડેજાએ કથીરિયાને પડકાર ફેક્યો હતો કે માનું ધાવણ પીધુ હોય તો મેદાનમાં આવી જજો. જેનો પડકાર ઝીલી આજે અલ્પેશ કથીરિયા પોતાના સમર્થકો સાથે ગોંડલ પહોંચ્યા છે. જો કે અહીં ગણેશ જાડેજાના સમર્થકો વધુ છે. જેથી કથીરિયાની સુરક્ષામાં વધારો કર્યો છે. ગોંડલમાં હાલ તણાવભરી સ્થિતિ છે.

કથીરિયાની કાર પર હુમલો

અલ્પેશ કથીરિયા સૌપ્રથમ ગોંડલ ખાતે આવેલા આશાપુરા મંદિરે દર્શન કરવા ગયા હતા. ત્યાર બાદ મંદિરથી પાછા ફરતાં તેમની કાર પર હુમલો થયો છે. ગાડીના કાચ તોડી નાખવામાં આવ્યા છે. ‘જ્યાં સુધી અમે ગોંડલમાં રહેશું ત્યાં સુધી વિરોધ થશે. આ જ તો મિર્ઝાપુર છે. ગોંડલમાં કોઈ વ્યક્તિ આવવા ન જોઈએ. આવે તો હુમલા કરવાના. જ્યારે બીજી બાજુ જીગીષા પટેલ સામે પણ હાય હાયના નારા લાગી રહ્યા છે.

ગણેશ ગોંડલે કથીરિયાને શું ચેલેન્જ આપી હતી?

તાજેતરમાં સુરતમાં ગણેશ જાડેજા અને જયરાજસિંહ જાડેજા વિરૂધ્ધમાં એક સભા મળી હતી જેમાં મેહુલ બોઘરા, અલ્પેશ કથીરિયા અને જીગીશા પટેલે જયરાજસિંહ જાડેજા અને ગણેશ જાડેજા પર ગુંડાગીરીના આક્ષેપો કર્યા હતા.જે બાદ ગોંડલના સુલતાનપુર ગામે પૂર્વ ધારાસભ્ય જયરાજસિંહ જાડેજા અને ગણેશ જાડેજાના સમર્થનમાં પાટીદાર સમાજ દ્વારા જનાક્રોશ સભાનું આયોજન કરાયું હતુ. આ સભામાં અલ્પેશ કથીરિયા, મેહુલ બોઘરા અને જિગીષા પટેલને આડે હાથ લીધા હતા અને તેમના પર આકરા પ્રહારો કરાયા હતા. આ સભામાં ગણેશ જાડેજાએ અલ્પેશ કથીરિયાને પડકાર ફેંકતા કહ્યુ હતુ કે, ‘તારા પર 14-14 પાટીદાર દીકરાના મૃત્યુનું પાપ છે, પહેલા એ ધોઈ લો પછી ગોંડલ આવજો’ મા નું ધાવણ પીધું હોય તો આવી જજો મેદાનમાં” ત્યારે હવે અલ્પેશ કથીરિયાએ ગણેશ ગોંડલનો આ પડકાર ઝીલી ગોંડલ પહોંચી રહ્યા છે.