Gondal News: રાજકોટ જિલ્લાના ગોંડલમાં આમ આદમી પાર્ટી (AAP)નાં પ્રદેશ સંયુક્ત સચિવ જિગીષા પટેલ અહીંના ઘોઘાવદર રોડ પર આવેલા સરગમ પાર્ક નજીક સ્થાનિક લોકોના પ્રશ્નો સાંભળવા ગયા ત્યારે કેટલીક મહિલાઓના ટોળાએ જિગીષા પટેલની કારને ઘેરી લીધી હતી. અચાનક એક મહિલાએ મોટો પથ્થર લઈને કારનો કાચ ફોડી નાખી જિગીષા પટેલને બેત્રણ ઝાપટ મારી દેતા તેઓને ઈજા પહોંચી હતી, જોકે કારના ડ્રાઈવરે સ્થિતિને પારખીને કાર ભગાડી મૂકતા તેઓનો બચાવ થયો હતો.
જીગીશા બેન ને માથાના ભાગે વાગતા તેઓને ગોંડલ સિવિલ હોસ્પિટલમાંથી ટૂંકી સારવાર બાદ રાજકોટની ખાનગી હોસ્પિટલમાં ખસેડવામાં આવ્યાં છે. આ હુમલાની ઘટનાનો લાઈવ વીડિયો પણ સામે આવ્યો છે, ગોંડલના ઘોઘાવદર રોડ પર આવેલા સરગમ પાર્ક પાસે બનેલી આ ઘટનાને લઈ ભારે ચકચાર મચી ગઇ છે.
જિગીષા પટેલ આ સમયે પોતાની કારમાં હતાં અને મહિલાઓ એકત્ર થવા લાગતા કાર ચાલકે ચેતવ્યા હતા પણ જીગીશા પટેલ મક્કમ હતા તેઓ સ્થાનિક લોકોના પ્રશ્નોની રજૂઆત સાંભળવા આવ્યા હતા જોકે,અચાનક 4થી 5 અજાણી મહિલાઓ અને બે પુરુષોએ બાજી પલટી નાખી અને એક મહિલાએ પથ્થર મારી કાચ તોડી નાખી જીગીશા બેનને લાફા મારવાનું શરૂ કરી દેતા સમય પારખી કાર ચાલકે કાર ભગાવી મુકતા જીગીશા બેન ઉપર વધુ હુમલો થતા રહી ગયો હતો.
મહત્વનું છે કે તા.31 ઓક્ટોબરથી ગોંડલ શહેર અને તાલુકાનાં અલગ અલગ ગામોમાં આપના નેતાઓ સમસ્યા અને જનતાના પ્રશ્નો સાંભળવા મુલાકાત લેતા હતા આવા સમયે આ ઘટના બનતા ‘આપ’ના કાર્યકરોમાં ભારે રોષ ફેલાયો છે. બનાવની જાણ થતાં જ પોલીસકાફલો ઘટનાસ્થળે અને હોસ્પિટલ દોડી ગયો હતો. પોલીસે ગુનો નોંધી વધુ તપાસ હાથ ધરી છે.
