Kadi Assembly By-Election: કોંગ્રેસનો જોરદાર પ્રચાર, રમેશ ચાવડાને જીતાડવા રણનીતિ

Kadi Assembly By-Election: મહેસાણા જિલ્લાની કડી વિધાનસભા બેઠકની પેટાચૂંટણી માટે 19 જૂનના રોજ મતદાન યોજાશે, જ્યારે 23 જૂનના રોજ મેવડ સ્થિત ઇન્સ્ટિટ્યૂટ ઓફ ટેકનોલોજી એન્ડ રિસર્ચ (જીટીયુ-આઈટીઆર) ખાતે મતગણતરી હાથ ધરાશે. આ ચૂંટણી જીતવા માટે રાજકીય પક્ષો વચ્ચે રસાકસી ચરમસીમાએ છે. કોંગ્રેસ પક્ષે ગઈકાલે કડી વિધાનસભા વિસ્તારમાં જોરદાર પ્રચાર અભિયાન ચલાવીને પોતાના ઉમેદવાર રમેશ ચાવડાને જીતાડવા માટે રણનીતિ ઘડી છે.

કોંગ્રેસે રમેશ ચાવડાના સમર્થનમાં કડી શહેર, નંદાસણ, ધનાલી, આલમપુર અને જાસપુરના વિવિધ વિસ્તારોમાં ડોર-ટુ-ડોર પ્રચાર કર્યો. આ અભિયાનમાં પૂર્વ ધારાસભ્ય ગ્યાસુદ્દીન શેખ સહિત અનેક કોંગ્રેસ કાર્યકરોએ ભાગ લીધો. ગ્યાસુદ્દીન શેખની ઉપસ્થિતિમાં એક મહત્ત્વપૂર્ણ મિટિંગ યોજાઈ, જેમાં ગુજરાત કોંગ્રેસ પ્રભારી મુકુલ વાસનિક, વિધાનસભામાં કોંગ્રેસ નેતા , પૂર્વ પ્રદેશ પ્રમુખ ભરતસિંહ સોલંકી, સાંસદ ગેની બેન ઠાકોર, ધારાસભ્યો શૈલેષ પરમાર, ઇમરાન ખેડાવાલા અને સહેઝાદ ખાન પઠાણ સહિત અન્ય આગેવાનો ઉપસ્થિત રહ્યા.

આ મિટિંગમાં રમેશ ચાવડાને ભારે બહુમતીથી જીતાડવા માટેની રણનીતિ પર ચર્ચા થઈ. કોંગ્રેસના આગેવાનોએ મતદારોને પક્ષના વિકાસલક્ષી એજન્ડા અને રમેશ ચાવડાના સ્થાનનો ઉલ્લેખ કરીને કોંગ્રેસને મત આપવાનો આહ્વાન કર્યું.

પ્રચાર દરમિયાન કોંગ્રેસના કાર્યકરોએ ગામડાઓના લોકો સુધી પહોંચી સ્થાનિક મુદ્દાઓ પર ચર્ચા કરી અને કોંગ્રેસના ઉમેદવારને જીતાડવા માટે સમર્થન માંગ્યું. આ પેટાચૂંટણીમાં કડીના મતદારોની નજર રાજકીય પક્ષોના પ્રચાર અને ઉમેદવારોની રણનીતિ પર ટકેલી છે.

આગામી દિવસોમાં પ્રચારની ગતિ વધુ તીવ્ર થવાની શક્યતા છે, કેમ કે રાજકીય પક્ષો મતદારોનો વિશ્વાસ જીતવા માટે કોઈ કસર બાકી રાખવા માંગતા નથી.