Masoud Pezeshkian: વૈશ્વિક રાજકારણ અને મધ્ય-પૂર્વ (મિડલ ઈસ્ટ) માં યુદ્ધના વાદળો વચ્ચે એક મોટો રાજદ્વારી ગરમાવો આવી ગયો છે. અમેરિકી રાષ્ટ્રપતિ ડોનાલ્ડ ટ્રમ્પ દ્વારા ઈરાન પર સૈન્ય હુમલો કરવાની અને સમય પૂરો થઈ રહ્યો હોવાની ખુલ્લી ધમકી આપ્યા બાદ, ઈરાનના રાષ્ટ્રપતિ મસૂદ પેઝેશ્કિયાનએ તેને જડબાતોડ જવાબ આપ્યો છે. ઈરાની રાષ્ટ્રપતિએ સ્પષ્ટ અને આકરા શબ્દોમાં જણાવ્યું છે કે, અમેરિકા સાથે ન્યુક્લિયર ડીલ કે અન્ય કોઈ પણ મુદ્દે વાતચીત કરવાનો અર્થ એ બિલકુલ નથી કે તેમનો દેશ અમેરિકા સામે ‘સરેન્ડર’ (આત્મસમર્પણ) કરી રહ્યો છે. ઈરાન એક સાર્વભૌમ દેશ છે અને તે કોઈની પણ સૈન્ય તાકાત કે ધમકીઓથી ડરીને પોતાના હકોનું બલિદાન આપશે નહીં.
રાષ્ટ્રપતિ પેઝેશ્કિયાનની સોશિયલ મીડિયા પર ગર્જના: ગરિમા અને સત્તા સાથે જ થશે વાતચીત
ઈરાનના રાષ્ટ્રપતિ પેઝેશ્કિયાનએ સોશિયલ મીડિયા પ્લેટફોર્મ ‘એક્સ’ પર એક સત્તાવાર પોસ્ટ શેર કરીને વૈશ્વિક મંચ પર પોતાનું વલણ સ્પષ્ટ કર્યું છે. તેમણે લખ્યું કે, ‘વાતચીતનો અર્થ એ નથી કે સરેન્ડર કરવું.’ તેમણે દુનિયાને આશ્વસ્ત કરતા ઉમેર્યું કે, ઈરાન પૂરી ગરિમા, ઓથોરિટી (સત્તા) અને પોતાના દેશના સાર્વભૌમ અધિકારોની રક્ષા સાથે જ કોઈપણ આંતરરાષ્ટ્રીય વાતચીતમાં સામેલ થયું છે. દુનિયાની કોઈ પણ તાકાત ઈરાનને દબાવી શકશે નહીં અને કોઈપણ પરિસ્થિતિમાં ઈરાની લોકો તેમજ દેશના કાનૂની અને પરમાણુ અધિકારોથી ઈરાન એક ઇંચ પણ પાછળ નહીં હટે. આ નિવેદન ટ્રમ્પની એ પોસ્ટના જવાબમાં આવ્યું છે જેમાં તેમણે દાવો કર્યો હતો કે ઈરાને શાંતિ પ્રસ્તાવ મોકલ્યો હોવાથી તેમણે હુમલો ટાળ્યો છે.
અરબ દેશોની વિનંતી પર ટ્રમ્પે ઈરાન પરનો સૈન્ય હુમલો હાલ પૂરતો રોક્યો: ટ્રુથ સોશિયલ પર મોટો ખુલાસો
આ વિવાદની શરૂઆત ત્યારે થઈ જ્યારે અમેરિકી રાષ્ટ્રપતિ ડોનાલ્ડ ટ્રમ્પે પોતાના સોશિયલ મીડિયા પ્લેટફોર્મ ‘ટ્રુથ સોશિયલ’ પર એક અત્યંત ચોંકાવનારો પત્ર અને પોસ્ટ મૂકીને સનસનાટી મચાવી દીધી હતી. ટ્રમ્પે દાવો કર્યો હતો કે કતાર, સાઉદી અરેબિયા અને સંયુક્ત આરબ અમીરાત (UAE) ના ટોચના નેતાઓની અંગત વિનંતીને ધ્યાનમાં રાખીને ઈરાન પર થનારો ભયાનક સૈન્ય હુમલો હાલ પૂરતો રોકી દેવામાં આવ્યો છે. ટ્રમ્પના જણાવ્યા અનુસાર, કતારના અમીર શેખ તમીમ બિન હમદ અલ થાની, સાઉદી અરેબિયાના ક્રાઉન પ્રિન્સ મોહમ્મદ બિન સલમાન અલ સઉદ અને યુએઈના રાષ્ટ્રપતિ મોહમ્મદ બિન જાયદ અલ નાહયાનએ તેમને વ્યક્તિગત રીતે વિનંતી કરી હતી કે ઈરાન પર બીજા જ દિવસે થનારા પ્રસ્તાવિત સૈન્ય હુમલાને મુત્સદ્દીગીરીના ભાગરૂપે અત્યારે ટાળવામાં આવે.
ઈરાન પાસે ક્યારેય પરમાણુ હથિયાર નહીં હોય: ટ્રમ્પની અમેરિકી સેનાને કડક ગાઈડલાઈન
ડોનાલ્ડ ટ્રમ્પે આરબ નેતાઓની દલીલોને ટાંકીને કહ્યું કે, આ સમયે ઈરાન સાથે એક મોટી સમજૂતીને લઈને ખૂબ જ ગંભીર બેકચેનલ વાતચીત ચાલી રહી છે. મધ્ય-પૂર્વના દેશોના મતે, આ મંત્રણાના અંતે એક એવી સર્વગ્રાહી સમજૂતી થઈ શકે છે જે અમેરિકા, ખાડી દેશો અને બાકીની આખી દુનિયા માટે પણ સ્વીકાર્ય હશે. ટ્રમ્પે સ્પષ્ટ કર્યું કે આ સંભવિત ડીલમાં સૌથી મહત્વની અને બિન-વાટાઘાટપાત્ર શરત એ જ હશે કે ઈરાન પાસે ક્યારેય પણ ‘પરમાણુ હથિયાર’ (Nuclear Weapons) રહેશે નહીં. આ આરબ નેતાઓ પ્રત્યે સન્માન દર્શાવતા ટ્રમ્પે અમેરિકાના સંરક્ષણ મંત્રી પીટ હેગસેથ, જોઈન્ટ ચીફ્સ ઓફ સ્ટાફના ચેરમેન જનરલ ડેનિયલ કેન અને સમગ્ર અમેરિકી સેનાને આગામી હુમલો સ્થગિત કરવાનો આદેશ આપ્યો હતો. જો કે, તેમણે સેનાને એવો પણ કડક નિર્દેશ આપ્યો છે કે જો કોઈ સ્વીકાર્ય કરાર ન થાય, તો ગમે ત્યારે મોટા પાયે સૈન્ય કાર્યવાહી માટે સજ્જ રહેવું.
ઈરાન પાસે સમય ઓછો છે, બધું જ નષ્ટ થઈ જશે: ટ્રમ્પની સોશિયલ મીડિયા પર ખુલ્લી ધમકી
આ અગાઉ રવિવારે પણ ડોનાલ્ડ ટ્રમ્પે ઈરાનને ધમકાવતા સોશિયલ મીડિયા પર લખ્યું હતું કે, ‘ઈરાન માટે સમય બહુ ઝડપથી નીકળી રહ્યો છે અને તેમણે પરમાણુ મુદ્દે જલ્દી આગળ વધીને સોદો કરી લેવો જોઈએ, નહીંતર ભવિષ્યમાં તેમની પાસે બચાવવા માટે કંઈપણ બાકી રહેશે નહીં. આ યુદ્ધની સ્થિતિમાં સમય ખૂબ જ કિંમતી છે!’ અમેરિકી મીડિયા નેટવર્ક સીએનએનના એક એક્સક્લુઝિવ અહેવાલ મુજબ, ટ્રમ્પે વ્હાઇટ હાઉસમાં પોતાના વરિષ્ઠ રાષ્ટ્રીય સુરક્ષા અધિકારીઓ અને લશ્કરી કમાન્ડરો સાથે ઈરાનને આર્થિક અને સૈન્ય રીતે ઘેરવાની આગળની રણનીતિ પર વિસ્તૃત ચર્ચા કરી લીધી છે અને આગામી દિવસોમાં વધુ એક હાઈ-લેવલ બેઠક થવાની સંભાવના છે.
આ પણ વાંચો:
