NEET UG Paper Leak CBI: NEET-UG 2026 પેપર લીક કેસની તપાસમાં કેન્દ્રીય તપાસ બ્યુરો (CBI)ને અનેક મહત્વપૂર્ણ કડીઓ મળી રહી છે. તપાસ દરમિયાન એવા 12 મહત્વના સાક્ષીઓના નિવેદનો નોંધવામાં આવ્યા છે, જેમના આધારે એજન્સી સમગ્ર કથિત ગેરરીતિના નેટવર્કને સમજવાનો પ્રયાસ કરી રહી છે. આ સાક્ષીઓમાં કથિત રીતે પ્રશ્નપત્ર મેળવવા માટે લાખો રૂપિયા ચૂકવનારા બે ડૉક્ટરો, લીક થયેલા પ્રશ્નો મેળવનારા ત્રણ વિદ્યાર્થીઓ, પ્રશ્નપત્રની ફોટોકૉપી માટે પોતાના ગૂગલ પે એકાઉન્ટમાંથી 235 રૂપિયાનું ચુકવણી કરનાર વ્યક્તિ તેમજ નાસિક અને પુણે વચ્ચે પ્રશ્નપત્ર પહોંચાડવામાં સંકળાયેલા લોકોનો સમાવેશ થાય છે.

ન્યાયિક મેજિસ્ટ્રેટ સમક્ષ નોંધાયા મહત્વના નિવેદનો

CBIએ આ કેસમાં 12 મુખ્ય સાક્ષીઓના નિવેદનો ભારતીય નાગરિક સુરક્ષા સંહિતા (BNSS), 2023ની કલમ 183(5) હેઠળ ન્યાયિક મેજિસ્ટ્રેટ સમક્ષ નોંધાવ્યા છે. કાનૂની રીતે આ પ્રકારના નિવેદનો તપાસ અધિકારીઓ સમક્ષ કલમ 180 હેઠળ નોંધાયેલા નિવેદનો કરતાં વધુ મહત્વ ધરાવે છે. એજન્સીએ કોર્ટમાં 160થી વધુ સાક્ષીઓની યાદી પણ રજૂ કરી છે, જેમના નિવેદનો કલમ 180 હેઠળ લેવામાં આવ્યા છે.

કેસમાં અત્યાર સુધી 13 આરોપીઓની ધરપકડ

શિક્ષણ મંત્રાલયની ફરિયાદના આધારે 12 મેના રોજ CBIએ કેસ નોંધ્યો હતો. ત્યારથી અત્યાર સુધી એજન્સીએ કુલ 13 લોકોની ધરપકડ કરી છે અને તમામ સામે ચાર્જશીટ દાખલ કરવામાં આવી છે. ધરપકડ કરાયેલા આરોપીઓમાં નેશનલ ટેસ્ટિંગ એજન્સી (NTA)ની પેનલ સાથે સંકળાયેલા ત્રણ વિષય નિષ્ણાતોનો પણ સમાવેશ થાય છે.

CBIના આરોપ મુજબ, વિષય નિષ્ણાત પી. વી. કુલકર્ણી અને મનીષા મંઢારે પોતાના નિવાસસ્થાને યોજાતા વિશેષ કોચિંગ વર્ગો દરમિયાન પ્રશ્નપત્ર લીક કરવામાં સંકળાયેલા હતા. જ્યારે ત્રીજા વિષય નિષ્ણાત મનીષા હવલદાર પર ફિઝિક્સના પ્રશ્નો મંઢારે સાથે શેર કરવા અને સ્થાનિક સ્ત્રોત મારફતે તેને આગળ પહોંચાડવાનો આરોપ મૂકવામાં આવ્યો છે.

બે ડૉક્ટરો પર 3-3 લાખ રૂપિયા ચૂકવવાનો આરોપ

તપાસ દરમિયાન CBIએ એવો દાવો કર્યો છે કે લાતૂરની સિદ્ધિવિનાયક હોસ્પિટલના માલિકે બે ડૉક્ટરોની મુલાકાત કુલકર્ણી સાથે કરાવી હતી. એજન્સીનો આરોપ છે કે આ બંને ડૉક્ટરોએ પોતાના પુત્રોને લીક થયેલા પ્રશ્નપત્ર અપાવવા માટે કુલકર્ણીને 3-3 લાખ રૂપિયા ચૂકવ્યા હતા.

પિતા અને પુત્રોના નિવેદનો ન્યાયિક મેજિસ્ટ્રેટ સમક્ષ નોંધવામાં આવ્યા હતા. તેમના જણાવ્યા મુજબ આ સોદો કુલકર્ણીના લાતૂર સ્થિત નિવાસસ્થાને થયો હતો. આ નિવેદનોના આધારે CBIને પ્રશ્નપત્ર લીક કરવાની કથિત પદ્ધતિ અને વિદ્યાર્થીઓ સુધી પ્રશ્નો પહોંચાડવાની સમગ્ર પ્રક્રિયા અંગે મહત્વની માહિતી મળી હોવાનું એજન્સીનું કહેવું છે.

વોટ્સએપ ગ્રુપથી ખુલ્યુ નવું કથિત નેટવર્ક

તપાસ દરમિયાન પુણેની વ્યવસાયી મનીષા વાઘમારેની પણ ધરપકડ કરવામાં આવી હતી. CBIએ તેને પ્રશ્નપત્ર લીકના સ્ત્રોત અને રાજસ્થાન સુધી પ્રશ્નો પહોંચાડનારા નેટવર્ક વચ્ચેની મહત્વની કડી ગણાવી છે.

એજન્સીના જણાવ્યા મુજબ, વાઘમારેના મોબાઇલ ફોનની તપાસ દરમિયાન એક વોટ્સએપ ગ્રુપની માહિતી મળી હતી, જેમાં કુલકર્ણી અને NEETની તૈયારી કરતા બે વિદ્યાર્થીઓ પણ સામેલ હતા. બંને વિદ્યાર્થીઓએ પોતાના નિવેદનમાં જણાવ્યું હતું કે તેઓ કુલકર્ણી અને મંઢારે દ્વારા ચલાવવામાં આવતા ખાસ કોચિંગ વર્ગોમાં હાજરી આપતા હતા.

તેમના નિવેદનોના આધારે તપાસ એજન્સીએ બાયોલોજી અને કેમિસ્ટ્રીના હાથથી લખાયેલા નોંધપત્રો પણ જપ્ત કર્યા છે. CBIનો આરોપ છે કે આ જ સામગ્રીનો ઉપયોગ કરીને લીક થયેલા પ્રશ્નોને ફરી તૈયાર કરવામાં આવ્યા અને પછી તેને નાસિકમાં શુભમ ખૈરનાર સુધી પહોંચાડવામાં આવ્યા.

ડેન્ટલ ક્લિનિકમાં તૈયાર થયા હોવાનો આરોપ

તપાસમાં એવો પણ દાવો કરવામાં આવ્યો છે કે મનીષા વાઘમારેએ બંને વિદ્યાર્થીઓ પાસેથી મળેલા પ્રશ્નોને પોતાના પતિના પુણે સ્થિત ડેન્ટલ ક્લિનિકમાં તૈયાર કર્યા હતા. ત્યારબાદ તે પ્રશ્નો કુલકર્ણી અને મંઢારેને મોકલવામાં આવ્યા હોવાનું CBIનું કહેવું છે.

એજન્સીએ ડેન્ટલ ક્લિનિકની બહાર લાગેલા CCTV કેમેરાની 20 એપ્રિલની ફૂટેજ પણ જપ્ત કરી છે. આ ફૂટેજમાં વાઘમારે અન્ય બે લોકો સાથે ક્લિનિકમાં પ્રવેશતી જોવા મળે છે. બંને વ્યક્તિઓના નિવેદનો પણ ન્યાયિક મેજિસ્ટ્રેટ સમક્ષ નોંધવામાં આવ્યા છે. તેમના જણાવ્યા મુજબ હાથથી લખાયેલા પ્રશ્નોને ક્લિનિકમાં ટાઇપ કરવામાં આવ્યા હતા.

235 રૂપિયાની ગૂગલ પે પેમેન્ટ પણ તપાસમાં મહત્વપૂર્ણ કડી

CBIએ 27 એપ્રિલની CCTV ફૂટેજ પણ પોતાના કબજામાં લીધી છે, જેમાં વાઘમારે ધનંજય લોખંડે અને અન્ય એક વ્યક્તિ સાથે જોવા મળે છે. તપાસ મુજબ લોખંડેના સાથીએ નજીકની દુકાનમાં લીક થયેલા પ્રશ્નપત્રની બે નકલો તૈયાર કરાવી હતી. તેમાં એક ટાઇપ કરેલી અને બીજી હાથથી લખેલી નકલ સામેલ હતી.

તપાસમાં મહત્વની બાબત એ પણ સામે આવી છે કે ફોટોકૉપી કરાવવા માટે તે વ્યક્તિએ પોતાના ગૂગલ પે એકાઉન્ટમાંથી 235 રૂપિયાની ડિજિટલ ચુકવણી કરી હતી. ત્યારબાદ આ નકલો પુણેની એક મોટી કોલેજની બહાર અન્ય વ્યક્તિને સોંપવામાં આવી હતી. આ બંને વ્યક્તિઓને પણ કેસમાં મહત્વના સાક્ષી બનાવવામાં આવ્યા છે.

નાસિકથી રાજસ્થાન સુધી પહોંચ્યુ કથિત પ્રશ્નપત્ર

CBIના જણાવ્યા અનુસાર, પુણેથી પ્રશ્નોની નકલો મેળવનાર વ્યક્તિ શુભમ ખૈરનારના નિર્દેશ પર નાસિકથી પુણે ગયો હતો અને ત્યાંથી લીક થયેલા NEET-UG 2026ના પ્રશ્નોની ફોટોકૉપી મેળવી હતી. એજન્સીએ નાસિકના અન્ય બે લોકોના નિવેદનો પણ નોંધ્યા છે. તેમાં એક વ્યક્તિએ કથિત રીતે ખૈરનારને પ્રશ્નપત્રની નકલો તૈયાર કરવામાં મદદ કરી હતી.

તપાસ મુજબ, ખૈરનારે લીક થયેલા પ્રશ્નો એક NEET વિદ્યાર્થીને આપ્યા હતા. ત્યારબાદ આ પ્રશ્નો ગુરુગ્રામમાં યશ યાદવ સુધી પહોંચ્યા અને અંતે રાજસ્થાનમાં અન્ય વિદ્યાર્થીઓ સુધી પહોંચાડવામાં આવ્યા હોવાનું CBIએ પોતાની ચાર્જશીટમાં જણાવ્યું છે.

તપાસ હજુ ચાલુ

CBIનું કહેવું છે કે સમગ્ર કથિત નેટવર્કની દરેક કડીની તપાસ હજુ ચાલુ છે. અત્યાર સુધીની તપાસમાં ડિજિટલ પુરાવા, CCTV ફૂટેજ, બેંકિંગ અને ઑનલાઇન પેમેન્ટ રેકોર્ડ તેમજ સાક્ષીઓના નિવેદનોના આધારે કેસને આગળ વધારવામાં આવી રહ્યો છે. કેસમાં વધુ લોકોની ભૂમિકા અને કથિત ગેરરીતિનું સમગ્ર નેટવર્ક બહાર લાવવા માટે એજન્સી તપાસ ચાલુ રાખી રહી છે.