પાટણના Satalpur માં દલિત આધેડનું રહસ્યમય મોત, સળગેલી હાલતમાં મળ્યો મૃતહેદ

Dalit Murder in Satalpur: ગુજરાતમાં છેલ્લા કેટલાય દિવસોથી દલિતો પર અત્યાચારની ઘટનાઓ સામે આવી રહી છે. તાજેતરમાં જ અમરેલીમાં અનુસૂચિત જાતિ(SC)ના યુવક નિલેશ રાઠોડની ‘બેટા’ કહીને બોલાવવાને કારણે હત્યા કરી દેવામાં આવી હતી હજુ તો આ ઘટનાના પડઘા શાંત નથી પડ્યા ત્યાં વધુ એક દલીતની હત્યાની ઘટના સામે આવી હોવાનું સામે આવ્યું છે. જેમાં પાટણ જિલ્લાના સાંતલપુરના જાખોત્રા ગામે અર્ધ સળગેલી હાલતમાં આધેડનો મૃતદેહ મળી આવ્યો છે આ આધેડને ઘાઘરો તેમજ પગમાં ઝાંઝરી પહેરાવેલ હતી. આ મામલે ધારાસભ્ય જીગ્નેશ મેવાણીએ લોકોને રોડ પર ઉતરવા અને આ મામલે આંદોલન કરવા આહ્વાન કર્યું છે. બીજી તરફ આ મામલે પોલીસે પણ કાર્યવાહી હાથ ધરી છે.

સળગેલી હાલતમાં આધેડનો મળ્યો મૃતદેહ

પાટણ જિલ્લાના સાંતલપુરના જાખોત્રા ગામે એક રહસ્યમય અને ચોંકાવનારી ઘટના સામે આવી છે, જ્યાં 50 વર્ષીય આધેડનો અર્ધ સળગેલી હાલતમાં મૃતદેહ મળી આવ્યો હતો. આ મૃતદેહની ઓળખ હરજીભાઇ દેવાભાઇ સોલંકી તરીકે થઈ છે જેઓ એક સાધુ હતા અને જાખોત્રા ગામનજીક આવેલ વૌવા નજીક રહેતા હતા. ત્યારે જે હાલમાં વૃદ્ધનો મૃતદેહ મળી આવ્યો છે હત્યાની આશંકા વ્યક્ત કરે છે. કારણ કે, આધેડના પગમાં ઝાંઝર, ચણિયો પહેરાવવામાં આવ્યો હતો. આ ઘટના સામે આવતા ગામમાં ખળભળાટ મચી ગયો છે અને લોકોમાં રોષની લાગણી જોવા મળી રહી છે.

પોલીસે હાથ ધરી તપાસ

આ ઘટનાની જાણ થતા પોલીસ પણ ઘટના સ્થળે આવી પહોંચી હતી અને આ મામલે વધુ તપાસ તેમજ પેનલ ફોરેન્સિક પીએમ અર્થે મૃતદેહને ધારપુર મેડિકલ કોલેજ ખાતે લાવવામાં આવેલ છે અને ઘટનાની ગંભીરતાને જોતાં પાટણ એલસીબીએ તપાસનો ધમધમાટ શરૂ કર્યો છે.

ધારાસભ્ય જીજ્ઞેશ મેવાણીએ વ્યક્ત કર્યો રોષ

આ ઘટનાને લઇને ધારાસભ્ય જીજ્ઞેશ મેવાણીએ પોતાનો રોષ વ્યક્ત કર્યો છે. અને તેમણે લોકોને પાટણના ધારપુરની સિવિલ હોસ્પિટલ પહોંચીને ન્યાય માટે વિનંતી કરી છે. આસાથે તેમણે સરકાર પાસે પીડિત પરિવારને યોગ્ય વળતર અને 2 એકર ખેતીની જમીન પણ આપવાની માંગ કરી છે.