Ahmedabad plane crash: વિમાન ડોક્ટર્સની હોસ્ટેલ પર ક્રેશ થયું, ઇમારત પર ફસાયેલો દેખાયો

Ahmedabad plane crash: એર ઇન્ડિયાની લંડન જતી ફ્લાઇટ AI-171 અમદાવાદમાં ટેકઓફ કર્યાના 5 મિનિટ પછી ક્રેશ થઈ ગઈ. આ ઘટના મેઘાણીનગર વિસ્તારમાં બની છે. વિમાન બીજે મેડિકલ કોલેજના રેસિડેન્ટ ડોક્ટર્સ હોસ્ટેલ પર પડ્યું, જેના કારણે ઇમારતમાં આગ લાગી ગઈ. ફ્લાઇટમાં 242 મુસાફરો હતા, જેમાં ઘણા વિદેશી નાગરિકોનો પણ સમાવેશ થાય છે. આ અકસ્માતમાં મોટી સંખ્યામાં લોકોના મોત થવાની આશંકા છે. DGCA એ તપાસ શરૂ કરી છે. આ વિમાનમાં ગુજરાતના પૂર્વ મુખ્યમંત્રી વિજય રુપાણી પણ હતા. જેમની હાલત ગંભીર હોવાની માહિતી માળી રહી છે.

ઘટના બાદ અંધાધૂંધી મચી ગઈ હતી. દુર્ઘટના પછી જે તસવીરો સામે આવી છે તે સ્પષ્ટપણે દર્શાવે છે કે વિમાનની પૂંછડી મેડિકલ કોલેજના રેસિડેન્ટ ડોક્ટર્સ હોસ્ટેલની ઉપર ફસાયેલી દેખાઈ છે.

કેપ્ટન સુમિત સભરવાલ વિમાન ઉડાડી રહ્યા હતા

એવું કહેવામાં આવી રહ્યું છે કે ક્રેશ થયેલ વિમાન કેપ્ટન સુમિત સભરવાલ ઉડાડી રહ્યા હતા, જ્યારે ફર્સ્ટ ઓફિસર ક્લાઈવ કુંદર તેમની સાથે હતા. સુમિત સભરવાલ ખૂબ જ અનુભવી પાયલોટ હતા અને તેમને 8200 કલાક ઉડાનનો અનુભવ હતો. આ અકસ્માત બાદ દિલ્હીથી અમદાવાદની બધી ફ્લાઇટ્સ રદ કરવામાં આવી છે.

વિમાનમાં કયા દેશના કેટલા લોકો સવાર હતા?

આ ઘટના બાદ એર ઈન્ડિયા તરફથી એક નિવેદન પણ બહાર આવ્યું છે જેમાં ક્રેશ થયેલા વિમાનમાં હાજર મુસાફરો વિશે માહિતી આપવામાં આવી છે. આ વિમાનમાં 169 ભારતીય નાગરિકો, 53 બ્રિટિશ નાગરિકો, 1 કેનેડિયન નાગરિક અને 7 પોર્ટુગીઝ નાગરિકો સવાર હતા.