Rajkot, TRP Game Zone Fire incident: રાજકોટ મહાનગરપાલિકાના પૂર્વ ટાઉન પ્લાનિંગ ઓફિસર (TPO) મનસુખ ધનાભાઈ સાગઠિયાની મુશ્કેલીઓમાં સતત વધારો થઈ રહ્યો છે. કારણ કે એન્ફોર્સમેન્ટ ડિરેક્ટોરેટ (ED) દ્વારા તેમની સામે મની લોન્ડરિંગ હેઠળ કેસ નોંધવા માટે રાજકોટ મહાનગરપાલિકા (RMC) પાસે મંજૂરી માંગવામાં આવી છે.
આ કેસ રાજકોટના TRP ગેમઝોન અગ્નિકાંડ (25 મે, 2024) સાથે જોડાયેલો છે, જેમાં 27 લોકોના મોત થયા હતા. આ ઘટનામાં ગેરકાયદે બાંધકામ અને ભ્રષ્ટાચારના આરોપોમાં સાગઠિયાની ભૂમિકા સામે આવી હતી.
EDની તપાસ અને મંજૂરીની પ્રક્રિયામનસુખ સાગઠિયા, જે વર્ગ-1ના કર્મચારી છે, તેમની સામે મની લોન્ડરિંગના આરોપ હેઠળ તપાસ માટે EDએ RMCની સ્ટેન્ડિંગ કમિટી પાસે મંજૂરી માંગી છે. આજે, 2 જુલાઈ 2025ના રોજ, સ્ટેન્ડિંગ કમિટી આ મુદ્દે ચર્ચા કરીને તપાસને મંજૂરી આપવાનો નિર્ણય જનરલ બોર્ડને સોંપશે.
જનરલ બોર્ડની મંજૂરી બાદ ED સાગઠિયા સામે ઔપચારિક કાર્યવાહી શરૂ કરશે. EDની એન્ટ્રીથી સાગઠિયાની મુશ્કેલીઓ વધી શકે છે. ભ્રષ્ટાચારના આરોપો અને અપ્રમાણસર મિલકતગુજરાતના એન્ટી-કરપ્શન બ્યુરો (ACB) દ્વારા કરવામાં આવેલી તપાસમાં સાગઠિયા અને તેમના પરિવારજનોના નામે રૂ. 28.17 કરોડની સ્થાવર અને જંગમ મિલકતો મળી આવી હતી, જે તેમની કાયદેસર આવક રૂ. 3.86 કરોડની સરખામણીએ 628.42% વધુ છે.
આ અપ્રમાણસર મિલકતોમાં રૂ. 23.15 કરોડની મિલકતોને જપ્ત કરવા માટે રાજ્ય સરકારના ગૃહ વિભાગે મંજૂરી આપી હતી, અને હવે આ મિલકતો ટૂંક સમયમાં ટાંચમાં લેવામાં આવશે. ACBની તપાસ દરમિયાન સાગઠિયાના ભાઈ દિલીપ સાગઠિયાની રાજકોટના 150 ફૂટ રિંગ રોડ પર આવેલી ટ્વીન ટાવર ખાતેની ઓફિસમાંથી રૂ. 18 કરોડથી વધુની મિલકતો જપ્ત કરવામાં આવી હતી. જેમાં નીચેની વસ્તુઓનો સમાવેશ થાય છે.
22 કિલો સોનું (દાગીના અને બિસ્કિટ): આશરે રૂ. 15 કરોડ
અઢી કિલો ચાંદીના દાગીના: આશરે રૂ. 2 લાખ
ડાયમંડ જ્વેલરી: આશરે રૂ. 8.50 લાખ
રોકડ ચલણી નોટો: રૂ. 3,05,33,500
વિદેશી ચલણ: ભારતીય મૂલ્યમાં આશરે રૂ. 1,82,000
સોનાના પટ્ટાવાળી ઘડિયાળો (2) અને અન્ય કિંમતી ઘડિયાળો (6): આશરે રૂ. 1.03 લાખ
સાગઠિયાએ આ મિલકતો ગેરકાયદેસર રીતે ભ્રષ્ટાચાર દ્વારા મેળવી હોવાનું ACBની તપાસમાં સામે આવ્યું છે, અને તેમણે સ્વીકાર્યું છે કે આમાંની મોટાભાગની જ્વેલરી ભ્રષ્ટાચારના પૈસામાંથી ખરીદવામાં આવી હતી.
અગ્નિકાંડની ઘટના બનતા સાંગઠિયાની પોલી ખુલી
TRP ગેમઝોન અગ્નિકાંડમાં સાગઠિયાની ભૂમિકા 25 મે, 2024ના રોજ રાજકોટના નાના મવા રોડ પર આવેલા TRP ગેમઝોનમાં થયેલા અગ્નિકાંડમાં 27 લોકોના મોત થયા હતા. આ ગેમઝોન ગેરકાયદે બાંધકામ હેઠળ ચાલી રહ્યું હતું અને તેની પાસે ફાયર NOC કે બિલ્ડિંગ યુઝ પરમિશન (BUP) નહોતું. સાગઠિયા, જે 10 વર્ષથી વધુ સમયથી RMCના TPO તરીકે ફરજ બજાવતા હતા, તેમણે 2021થી આ ગેરકાયદે બાંધકામ વિશે જાણ હોવા છતાં કોઈ કાર્યવાહી કરી ન હતી.
આ ઘટનામાં તેમની બેદરકારી અને ભ્રષ્ટાચારના આરોપોને કારણે તેમને 30 મે, 2024ના રોજ સ્પેશિયલ ઈન્વેસ્ટિગેશન ટીમ (SIT) દ્વારા ધરપકડ કરવામાં આવી હતી. ACBના એક અધિકારીએ નામ ન આપવાની શરતે જણાવ્યું હતું કે સાગઠિયાએ ગેમઝોનના ઓપરેટર્સ પાસેથી પણ લાંચ લીધી હોવાનું સ્વીકાર્યું છે, જેના કારણે ગેરકાયદે બાંધકામ તોડવામાં આવ્યું ન હતુ. ઉપરાંત, સાગઠિયાએ અગ્નિકાંડ બાદ RMCના રેકોર્ડમાં નકલી મીટિંગ મિનિટ્સ બનાવીને પોતાનો બચાવ કરવાનો પ્રયાસ કર્યો હતો, જેના માટે રાજકોટ ક્રાઈમ બ્રાન્ચે તેમની સામે 8 જૂન, 2024ના રોજ અલગ ગુનો નોંધ્યો હતો.
સાગઠિયા અને પરિવારની મિલકતો
જય બાબરી પેટ્રોલ પંપ: સોખડા, જિ. રાજકોટ
ઈન્ડસ્ટ્રિયલ ગોડાઉન (3): સોખડા, જિ. રાજકોટ
જય બાબરી પેટ્રોલ પંપ: ગોમટા, તા. ગોંડલ
અન્ડર કન્સ્ટ્રક્શન હોટલ: ગોમટા, તા. ગોંડલ
ફાર્મ હાઉસ: ગોમટા, તા. ગોંડલ
ખેતીની જમીન: ગોમટા અને ચોરડી, તા. ગોંડલ
ગેસ ગોડાઉન: ઉર્જા ઈન્ડસ્ટ્રિયલ, શાપર, તા. કોટડા સાંગાણી
પ્લોટ: બાલાજી ગ્રીનપાર્ક, મોવૈયા, તા. પડધરી
અન્ડર કન્સ્ટ્રક્શન બંગલો: અનામિકા સોસાયટી, યુનિવર્સિટી રોડ, રાજકોટ
ટેનામેન્ટ: આસ્થા સોસાયટી, માધાપર, રાજકોટ
ફ્લેટ્સ: સી-1701, એસ્ટર ફ્લેટ અને બી-7, 802, લા મરીના, અદાણી શાંતીગ્રામ ટાઉનશીપ, અમદાવાદ
વાહનો: કુલ 6
આ મિલકતો ગેરકાયદેસર રીતે ભ્રષ્ટાચાર દ્વારા મેળવવામાં આવી હોવાનું ACBએ જણાવ્યું છે.
કાનૂની સ્થિતિહાલ મનસુખ સાગઠિયા રાજકોટ મધ્યસ્થ જેલમા ન્યાયિક કસ્ટડીમાં છે. તેની જામીન અરજી 14 ઓક્ટોબર, 2024ના રોજ રાજકોટની કોર્ટે નકારી હતી, જેમાં ફરિયાદ પક્ષે તેમના ભ્રષ્ટાચારના આરોપો અને અપ્રમાણસર મિલકતોનો મુદ્દો ઉઠાવ્યો હતો. ગુજરાત હાઈકોર્ટે પણ આ કેસમાં RMCના અધિકારીઓની જવાબદારી નક્કી કરવા અને પીડિતોને વળતર આપવા અંગે ચર્ચા કરી છે, જેમાં સાગઠિયા સહિતના અધિકારીઓને વ્યક્તિગત રીતે વળતર ચૂકવવાની શક્યતા પર વિચારણા થઈ રહી છે.
સોશિયલ મિડિયામાં આરોપ લાગી રહ્યા છે કે સાગઠિયાને 2021માં રૂ. 56 કરોડની લાંચ મળી હતી, અને તેમની અપ્રમાણસર મિલકતોના સ્ત્રોત જાહેર થવા જોઈએ. જોકે, આ આરોપોની સત્તાવાર પુષ્ટિ થઈ નથી. આ ઘટનાએ રાજકોટના વહીવટી તંત્રમાં ભ્રષ્ટાચાર અને બેદરકારીના મુદ્દાઓને ઉજાગર કર્યા છે, જેના કારણે સ્થાનિક લોકોમાં રોષ અને ન્યાયની માંગ વધી છે.
