Ukraine Drone Attack Hostel: રશિયા અને યુક્રેન વચ્ચે ફેબ્રુઆરી, ૨૦૨૨ થી ચાલી રહેલું ભીષણ યુદ્ધ હવે વધુ રક્તરંજિત અને ગંભીર વળાંક પર પહોંચી ગયું છે. રશિયાએ સત્તાવાર દાવો કર્યો છે કે યુક્રેનની સેનાએ શુક્રવારે રાત્રે સ્ટારોબિલ્સ્ક (Starobilsk) શહેરમાં આવેલી એક વિદ્યાર્થીઓની છાત્રાલય (હોસ્ટેલ) પર જાણીજોઈને ઘાતક ડ્રોન હુમલો કર્યો છે. આ હુમલાને લઈને રશિયાના રાષ્ટ્રપતિ વ્લાદિમીર પુતિને અત્યંત આક્રોશ વ્યક્ત કર્યો છે અને રશિયન સેનાને યુક્રેન વિરુદ્ધ સખત વળતી કાર્યવાહી કરવા માટેના તમામ સંભવિત વિકલ્પો અને રણનીતિઓ તાત્કાલિક તૈયાર કરવાનો કડક આદેશ આપી દીધો છે. પુતિને સ્પષ્ટ કર્યું છે કે સામાન્ય નાગરિકો અને નિર્દોષ વિદ્યાર્થીઓ પરના આવા કાયરતાપૂર્ણ હુમલાને કોઈપણ સંજોગોમાં નજરઅંદાજ કરી શકાય નહીં અને આનો ખૂબ જ કડક જવાબ આપવામાં આવશે.
રશિયન સરકાર દ્વારા બહાર પાડવામાં આવેલી સત્તાવાર માહિતી અનુસાર, આ આત્મઘાતી ડ્રોન હુમલામાં અત્યાર સુધીમાં ૧૦ નિર્દોષ લોકોના મોતાની પુષ્ટિ થઈ ચૂકી છે. બ્રિટિશ ન્યૂઝ એજન્સીએ સ્થાનિક ગવર્નરના હવાલાથી જણાવ્યું છે કે લુહાન્સ્ક (Luhansk) ક્ષેત્રમાં રાતભર ચાલેલા આ ભયાનક હુમલામાં ૩૮ લોકો ગંભીર રીતે ઇજાગ્રસ્ત થયા છે, જ્યારે ૧૧ લોકો હજુ પણ કાટમાળ નીચે ગુમ છે જેથી મૃત્યુઆંક વધવાની આશંકા છે. તાજેતરના દિવસોમાં રશિયન સરહદની અંદર યુક્રેન તરફથી કરાયેલો આ સૌથી મોટો અને વિનાશક હુમલો માનવામાં આવી રહ્યો છે. હુમલા સમયે પેડાગોજિકલ યુનિવર્સિટી કોલેજની આ પાંચ માળની ડોર્મિટરી ઇમારતની અંદર ૧૪ થી ૧૮ વર્ષની ઉંમરના ૮૬ માસૂમ બાળકો હાજર હતા, જેઓ આ હુમલાનો ભોગ બન્યા છે.
આજુબાજુ કોઈ લશ્કરી મથક નથી
રાષ્ટ્રપતિ વ્લાદિમીર પુતિને આ મામલે આકરું વલણ અપનાવતા જણાવ્યું છે કે, જે હોસ્ટેલ પર હુમલો થયો છે તેની આસપાસના ઘણા કિલોમીટરના વિસ્તારમાં કોઈ સૈન્ય મથક, લશ્કરી છાવણી, ગુપ્તચર એજન્સીઓની સુવિધા કે સંરક્ષણ મંત્રાલય સાથે જોડાયેલી કોઈ સેવા હાજર નથી. આ ભૌગોલિક સ્થિતિ જ સાબિત કરે છે કે યુક્રેન શાસન દ્વારા માત્ર દહેશત ફેલાવવા માટે સામાન્ય લોકો અને બાળકો પર સમજી-વિચારીને ટાર્ગેટ હુમલો કરવામાં આવ્યો છે. પુતિને યુક્રેનના એ દાવાઓને પણ પાયાવિહોણા ગણાવીને ફગાવી દીધા છે જેમાં કહેવામાં આવ્યું હતું કે રશિયાની પોતાની એર ડિફેન્સ (Air Defense) કે ઈલેક્ટ્રોનિક વોરફેર સિસ્ટમના મિસફાયર થવાના કારણે ડ્રોન હોસ્ટેલની ઇમારત પર પડ્યું હતું.
યુક્રેનનો વળતો દાવો
રશિયાના ગંભીર આક્ષેપો સામે યુક્રેનની સેનાએ પણ સત્તાવાર નિવેદન જારી કરીને પોતાનો પક્ષ રજૂ કર્યો છે. યુક્રેન આર્મીના કમાન્ડરોએ દાવો કર્યો છે કે ગુપ્તચર બાતમીના આધારે તેમણે સ્ટારોબિલ્સ્કમાં રશિયન સેનાની અતિ આધુનિક અને વિશેષ ‘રુબિકોન ડ્રોન સૈન્ય ટુકડી’ ના (Rubicon Drone Military Unit) મુખ્ય મથક (હેડક્વાર્ટર) પર સફળતાપૂર્વક હુમલો કર્યો છે. જો કે, રશિયા દ્વારા રજૂ કરવામાં આવેલા સામાન્ય બાળકોના મોતના આંકડા અને કોઈ ખોટી શૈક્ષણિક ઇમારતને નિશાન બનાવવાની માનવીય ભૂલ કે સંભાવના અંગે યુક્રેનિયન સેનાએ મીડિયા સામે સીધો જવાબ આપવાનું ટાળ્યું છે. પુતિનના વળતા પ્રહારના આદેશથી બંને દેશો વચ્ચેનો સશસ્ત્ર સંઘર્ષ હવે ચરમસીમાએ પહોંચે તેવી આંતરરાષ્ટ્રીય સ્તરે ચિંતા સેવાઈ રહી છે.
આ હુમલા અંગે રશિયાના વિદેશ મંત્રાલયે અત્યંત તીખી પ્રતિક્રિયા આપતા આંતરરાષ્ટ્રીય સમુદાય સમક્ષ કીવ સરકારને કઠેડામાં ઊભી કરી છે. મંત્રાલયે કહ્યું કે, લાચાર અને નિર્દોષ બાળકો વિરૂદ્ધ કરવામાં આવેલો આ અમાનવીય હુમલો દર્શાવે છે કે કીવ (Kyiv) શાસને હવે યુદ્ધના નિયમો નેવે મૂકીને હિંસાનું એક નવું નૃશંસ પ્રકરણ શરૂ કર્યું છે. રશિયાએ આક્ષેપ કર્યો છે કે યુક્રેનને લડાઈના મેદાનમાં સતત હારનો સામનો કરવો પડી રહ્યો છે, જેના લીધે તે હતાશામાં પશ્ચિમી દેશો અને નાટો (NATO) તરફથી મળેલા લાંબી દૂરીના અત્યાધુનિક શસ્ત્રોનો ઉપયોગ કરીને સામાન્ય નાગરિકોને નિશાન બનાવી રહ્યું છે. આ કોઈ સામાન્ય ભૂલ નથી પરંતુ જર્મન નાઝીઓની (German Nazis) ક્રૂર અને હિંસક ભાવનાથી પ્રેરિત થઈને કરાયેલું પૂર્વયોજિત કૃત્ય છે.
વૈશ્વિક સંગઠનોને રશિયાની અપીલ
રશિયન વિદેશ મંત્રાલયે આ ગંભીર માનવીય સંકટ પર વૈશ્વિક સમર્થન મેળવવા માટે અપીલ જારી કરી છે. તેમણે સંયુક્ત રાષ્ટ્ર (UN) સહિતના તમામ આંતરરાષ્ટ્રીય માનવાધિકાર સંગઠનો, વિશ્વના વિવિધ દેશોની લોકશાહી સરકારો અને દુનિયાભરની ન્યાયપ્રિય જનતાને સ્ટારોબિલ્સ્કમાં શૈક્ષણિક સંસ્થાઓ પર થયેલા આ ભયાનક ડ્રોન હુમલાની ખુલ્લા શબ્દોમાં સખત નિંદા કરવાની અપીલ કરી છે. રશિયાએ ચેતવણી આપી છે કે જો પશ્ચિમી દેશો યુક્રેનના આવા આતંકવાદી વલણને રોકવામાં નિષ્ફળ રહેશે, તો રશિયા પોતાની સુરક્ષા અને નાગરિકોના હિત માટે યુક્રેન પર એવા સખત લશ્કરી હુમલા કરશે જેની કલ્પના પણ કીવ શાસને નહીં કરી હોય.
આ પણ વાંચો:
