BJP નેતા અને યુટ્યુબર Manish Kashyap ને હોસ્પિટલમાં ડોક્ટરોએ કેમ માર માર્યો,જાણો શું બની હતી ઘટના?

Manish Kashyap: બિહારના પટનાથી આ સમયે મોટા સમાચાર સામે આવ્યા છે. આ મામલો બિહારના પ્રખ્યાત યુટ્યુબર અને ભાજપ નેતા મનીષ કશ્યપ સાથે સંબંધિત છે. મનીષ કશ્યપ વિશે ચર્ચા હતી કે સોમવારે પટના મેડિકલ કોલેજ હોસ્પિટલમાં (PMCH) તેમને માર મારવામાં આવ્યો હતો. આ ઘટનાથી પટનાની પ્રખ્યાત મેડિકલ કોલેજ અને હોસ્પિટલમાં (PMCH) હોબાળો મચી ગયો હતો. કહેવામાં આવી રહ્યુ છે કે, પીએમસીએચમાં વીડિયો બનાવતી વખતે ઝઘડો થયો જેથી ડોક્ટરોએ ભાજપના નેતા અને યુટ્યુબર મનીષ કશ્યપને માર માર્યો અને તેમનો મોબાઈલ છીનવી લીધો તેમજ તેમને 3 કલાક સુધી રૂમમાં બંધ પણ રાખ્યા હતા. આ ઘટનાથી સમગ્ર શહેરમાં સનસનાટી મચી ગઈ છે.

શું છે આખો મામલો?

સોમવારે (19 મે) બિહારની સૌથી મોટી હોસ્પિટલ પીએમસીએચમાં ભાજપના નેતા અને યુટ્યુબર મનીષ કશ્યપ એક દર્દીની મદદ માટે પીએમસીએચ પહોંચ્યા હતા. આ સમય દરમિયાન, તેમણે હોસ્પિટલની ખામીઓ વિશે વીડિયો બનાવવાનું શરૂ કર્યું. આ દરમિયાન ફરજ પરની એક મહિલા ડૉક્ટર સાથે તેનો ઝઘડો થયો. મામલો એટલો વધી ગયો કે અન્ય ડોક્ટરોએ મનીષનો વિરોધ કર્યો અને તેને ધક્કો માર્યો. ડોક્ટરોએ મનીષનો રેકોર્ડ કરેલો વીડિયો પણ ડિલીટ કરાવી દીધો.જે બાદ મનીષને લગભગ 3 કલાક સુધી રૂમમાં બંધ રાખવામાં આવ્યો હતો. એવું કહેવામાં આવી રહ્યું છે કે મનીષે ડોક્ટરોની માફી માંગી હતી, ત્યારબાદ મામલો શાંત થયો. ભાજપના નેતાઓના હસ્તક્ષેપ બાદ તેમને મુક્ત કરવામાં આવ્યા હતા. મનીષ ત્યાંથી તેના મિત્ર મણિ દ્વિવેદી સાથે કાર દ્વારા રવાના થયો.

પોલીસે શું કહ્યું

મનીષ પર હુમલાના સમાચાર ફેલાતા જ તેમના સમર્થકો પીએમસીએચની બહાર એકઠા થઈ ગયા હતા. અને આ મામલે પોલીસને જાણ કરવામાં આવી હતી. આ મામલે પટના સદરનાં એએસપી દીક્ષાએ જણાવ્યું હતું કે, “હજી સુધી કોઈએ ફરિયાદ નોંધાવી નથી. મારામારીની જાણ થઈ છે. ફરિયાદ મળ્યા બાદ કાર્યવાહી કરવામાં આવશે. જો કે, કહેવામાં આવી રહ્યું છે કે, બાદમાં બંને વચ્ચે મામલો ઉકેલાઈ ગયો. બંનેમાંથી કોઈએ પોલીસ સ્ટેશનમાં કોઈ અરજી આપી નથી. પોલીસે પુષ્ટિ આપી હતી કે ધક્કામુક્કી અને મારપીટ થઈ હતી, પરંતુ કોઈ ગંભીર હુમલો થયો નથી અને બંને પક્ષો દ્વારા કોઈ ફરિયાદ નોંધાઈ નથી.

મનીષ અગાઉ પણ રહી ચૂક્યા છે વિવાદોમાં

મનીષ કશ્યપ અગાઉ તમિલનાડુમાં બિહારી મજૂરો પર થતી હિંસાનો નકલી વીડિયો શેર કરવા બદલ મુશ્કેલીમાં મુકાઈ ચૂક્યા છે. બિહાર પોલીસના આર્થિક ગુના એકમે તેમની વિરુદ્ધ FIR નોંધી હતી. ધરપકડથી બચવા માટે, મનીષ ઘણા દિવસો સુધી ફરાર રહ્યો હતો. 18 માર્ચ, 2023 ના રોજ, બેતિયા પોલીસે તેનું ઘર જપ્ત કરવાનું શરૂ કર્યું, ત્યારબાદ તેણે શિકારપુર પોલીસ સ્ટેશનમાં આત્મસમર્પણ કર્યું. EOU એ તેને કસ્ટડીમાં લીધો અને જેલમાં મોકલી દીધો. ડિસેમ્બર 2023 માં, મનીષને કોર્ટમાંથી જામીન મળ્યા હતા.