Kheda: ડીજે વગાડતા પહેલા સાવધાન, કલેક્ટરે ડીજે પર પ્રતિબંધ ફરમાવ્યો, થશે કડક કાર્યવાહી

Kheda: છેલ્લા કેટલાક સમયથી ખેડા જિલ્લામાં કેટલાક ચોક્કસ ગામોમાં ડી.જે. સંચાલકો વચ્ચે ખૂબ તીવ્ર સ્પર્ધા ચાલી રહી છે. જેના કારણે અતિશય ઘોંઘાટ થાય છે તેમજ ધ્વની પ્રદુષણ તો થાય છે સાથે સાથે વિદ્યાર્થીઓના અભ્યાસમાં, દર્દીઓના આરામમાં, સિનિયર સીટીઝન અને લોકોના સ્વાસ્થ્યને નુકસાન પણ પહોંચાડે છે અનેક વખત જિલ્લામાં ડી.જે. સંચાલકો સામે ફરિયાદ પણ નોંધાઈ છે છતા પણ તેના પર અંકુશ ન આવતા હવે ધ્વનિ પ્રદૂષણને અંકુશમાં લેવા અને જનતાના જીવનધોરણની ગુણવત્તા જાળવવા માટે ખેડા જિલ્લા વહીવટી તંત્રે મહત્ત્વનું પગલું ભર્યું છે.

ખેડા જિલ્લા કલેક્ટરે બહાર પાડયું જાહેરનામુ

ધ્વનિ પ્રદૂષણને અંકુશમાં લાવવા અને જનતાના જીવનધોરણની ગુણવત્તાની જાળવણી માટે સુપ્રીમ કોર્ટના નિર્દેશોનું પાલન કરતાં ખેડા જિલ્લા કલેક્ટરે જાહેરનામુ બહાર પાડયું છે. ખેડા જિલ્લાના કલેક્ટર અને જિલ્લા મેજિસ્ટ્રેટની કચેરીએ જાહેરનામું બહાર પાડીને સ્પષ્ટ કર્યું છે કે રાતના 10 વાગ્યા બાદ સવારના 6 વાગ્યા સુધીમાં ડીજે વગાડી શકાશે નહીં. માત્ર સવારે 6 વાગ્યાથી રાતે 10 વાગ્યા સુધી જ ડી.જે. વગાડી શકાશે. તેમજ જો કોઈએ જાહેરનામાનો ભંગ કરનારા ડીજે સંચાલક સામે પીએસઆઈ કે ઉચ્ચ અધિકારીઓ સીધી કાર્યવાહી કરી શકશે તેવી પણ જોગવાઈ છે.

ડી.જે. સંચાલકો સામે ઉઠી હતી ફરિયાદો

ઉલ્લેખનીય છે કે, નડિયાદ શહેરમાં ખાડ, ચકલાસી ભાગોળ, પીજ ભાગોળ, ઈન્દિરાનગર, પારસ સર્કલ, સિવિલ રોડ પર તેમજ પીપળાતા, ટુંડેલ, પીપલગ, ચકલાસી, કણજરી સહિત આજુબાજુના તાલુકાઓમાં ડી.જે. સંચાલકો કાન ફાડી નાખે તેવા ભયકંર અવાજ કરતા હોવાની ફરિયાદો ઉઠી હતી.

અનેક પ્રકારના થાય છે નુકસાન

મહત્વનું છે કે,વિભિન્ન પાર્ટી પ્લોટ, જાહેર સંસ્થાઓ, ખાનગી માલિકોના ફાર્મ તથા અન્ય જગ્યાઓએ તીવ્ર અવાજ કરતા હોય છે. જાહેર માર્ગો પર લાંબા સમય સુધી ડી જે વગાડતા ટ્રાફિકને અડચણ કરી ટ્રાફિક જામ કરે છે. તેમજ અતિશય ઘોંઘાટ કરી વિદ્યાર્થીઓના અભ્યાસમાં, દર્દીઓના આરામમાં, સિનિયર સીટીઝન અને લોકોના સ્વાસ્થ્યને નુકસાન કરે છે. આ તમામ બાબતોને ધ્યાનમાં રાખીને જિલ્લા પ્રશાસને કાયદાની જોગવાઈઓને ધ્યાને લઈ ડીજેને નિયંત્રણમાં લેવા જાહેરનામુ બહાર પાડયું છે.

અન્ય જિલ્લાઓ માટે પણ પ્રેરણા

ખેડા જિલ્લાનો આ નિર્ણય અન્ય જિલ્લાઓ માટે પણ એક ઉદાહરણ બની શકે છે. ગુજરાતમાં ધ્વનિ પ્રદૂષણ એક વધતી જતી સમસ્યા બની રહી છે, અને સુપ્રીમ કોર્ટના નિર્દેશોનું પાલન કરીને આવા પગલાંઓથી જનજીવનની ગુણવત્તામાં સુધારો થઈ શકે છે. આ પ્રતિબંધનો અમલ કેવી રીતે થાય છે અને તેની લાંબા ગાળે શું અસર થાય છે, તે આગામી દિવસોમાં જોવું રહ્યું. પરંતુ હાલમાં, ખેડા જિલ્લાનું આ પગલું ધ્વનિ પ્રદૂષણ સામેની લડાઈમાં એક મહત્ત્વનું પગલું ગણાઈ રહ્યું છે.